Lo daon iu savve readim samfala nius report abaotem olketa leader blo religion and datfala war lo Ukraine:

•   “Leader blo Russian Orthodox Church, Patriarch Kirill, hem no talem eni samting for tok againstim datfala attak blo Russia. . . . Church blo hem gohed spredim olketa laea story abaotem Ukraine, and Putin iusim olketa laea story hia olsem reason for sei datfala war hem stret.”—EUobserver, March 7, 2022.

•   “Patriarch Kirill . . . just talem samting wea showimaot hem tingse hem barava stret for Russia attakim Ukraine. Hem sei datfala war hem wanfala faet againstim sin.”—AP News, March 8, 2022.

•   “Lo Monday, leader blo Ukrainian Orthodox Church, Metropolitan Epiphanius I of Kyiv, givim blessing for pipol blo hem ‘faet againstim olketa Russian wea attakim kanti’ . . . And tu, [hem] sei for killim dae olketa Russian soldia hem no wanfala sin.”—Jerusalem Post, March 16, 2022.

•   “Mifala [Ukrainian Council of Churches and Religious Organizations (UCCRO)] sapotim Army blo Ukraine and evri soldia wea faet for defendim kantri blo mifala. Mifala blessim wanem olketa duim for defendim Ukraine againstim datfala enemy, and mifala prea for olketa.”—UCCRO a Statement, February 24, 2022.

 Hao nao tingting blo iu? Waswe, olketa religion wea sei olketa followim Jesus Christ shud encouragem olketa member blo olketa for faet lo war? Wat nao Bible talem abaotem diswan?

History blo religion lo war

 Staka taem lo history olketa religion sei hem gud or hem fitim for faet lo war, and samfala taem olketa encouragem war tu, nomata olketa religion hia act olsem olketa laekem peace. For staka year finis, Olketa Jehovah’s Witness helpem pipol for luksavve wanem olketa religion hia talem hem no stret. Tingim samfala example lo wanem olketa pablikeson blo mifala storyim finis.

•   “The Crusades—A ‘Tragic Illusion’” (article lo English) hem storyim hao Roman Catholic Church garem responsibility for olketa attak wea killim dae staka pipol lo nem blo God and Christ.

•   “The Catholic Church in Africa” (article lo English) hem storyim wanfala example lo hao religion no stopem war wea kamap between olketa difren tribe, wea lead go lo genocide.

•   Olketa article “Is Religion to Blame?,” “Religion’s Role in Man’s Wars,” and “Religion Takes Sides” (thrifala article hia lo English) storyim hao olketa bigman blo olketa Catholic, Orthodox, and Protestant church sapotim tufala saed evriwan lo staka war.

Waswe, olketa Christian religion shud sapotim war?

 Wanem Jesus teachim: “Iu mas lovem narawan long sem wei wea iu lovem iuseleva.” (Matthew 22:39) “Gohed lovem olketa enemy bilong iufala.”—Matthew 5:44-47.

 Wanem Jesus talem: “Kingdom bilong mi hem no bilong disfala world. Sapos hem bilong disfala world, hard for olketa wea followim mi letem olketa Jew kam tekem mi.” (John 18:36) “Eniwan wea iusim sword for killim dae narawan, bae olketa iusim sword for killim hem dae tu.”—Matthew 26:47-52.

 Tingim diswan: Sapos hem rong for olketa Christian faet for protectim Jesus, waswe, hem fitim for olketa faet for nara reason? Readim disfala article “Waswe, Olketa Christian Savve Sapotim War?” wea storyim hao olketa Christian lo first century faithful for followim example blo Jesus and wanem hem teachim.

Wanem nao bae happen lo olketa religion wea encouragem war?

 Bible talem klia God rejectim olketa religion wea sei olketa teachim pipol abaotem Jesus bat no obeyim olketa teaching blo hem.—Matthew 7:21-23; Titus 1:16.

•   Lo Bible buk Revelation hem sei lo tingting blo God olketa religion hia guilty for dae blo “evriwan wea [pipol] killim dae long earth.” (Revelation 18:21, 24) For faendaot why nao olsem, readim disfala article (lo English) “What Is Babylon the Great?”

•   Jesus sei God bae distroem evri religion wea hem rejectim bikos lo nogud samting wea olketa duim, olsem ‘olketa man bae katem olketa nogud tree wea garem rabis frut,and bonem long fire.’ (Matthew 7:15-20) Readim disfala article “Klosap Nao False Religion Bae Finis!” for faendaot hao diswan bae happen.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images