Lo February 24, 2022, lo early morning, army blo Russia start for attakim Ukraine, nomata olketa leader blo staka kantri trae for stopem diswan for happen. Hao nao disfala war maet affectim world? Tu-thri day wea go pas, Secretary-general blo United Nations, António Guterres, sei olsem: “Hem barava hard nao for minim olketa samting wea disfala war bae kosim, olsem pipol bae safa, staka samting bae distroe, and diswan bae affectim tu olketa nara kantri lo Europe and full world saed lo security.”

•   Jesus Christ storyim finis “Bae pipol long wanfala ples faetem pipol long nara ples and pipol long wanfala kantri faetem pipol long nara kantri.” (Matthew 24:7) Readim disfala article lo English, “What Is the Sign of ‘the Last Days,’ or ‘End Times’?” for lukim hao Bible storyim olketa war wea happen distaem showimaot profesi blo Jesus hem fulfill.

•   Bible buk Revelation storyim wanfala man hem raedem horse “wea kala bilong hem red,” and datwan piksarem war. Datfala man hem garem paoa for “aotem peace from earth.” (Revelation 6:4) Readim disfala article “Fofala Man wea Raedem Horse—Hu Nao Olketa?” for faendemaot hao datfala profesi hem join witim olketa war wea happen distaem.

•   Bible buk Daniel storyim tu raoa wea happen between “datfala king blo north” and “datfala king blo south.” (Daniel 11:25-45, NWT) Lukim disfala video Profesi wea Kamap Tru—Daniel Chapter 11, for savve why Russia and olketa kantri wea saedem hem nao datfala king blo north. a

•   Revelation storyim tu “datfala war wea bae kamap long bigfala day bilong Olmaeti God.” (Revelation 16:14, 16) Bat, diswan hem no war wea happen between olketa kantri olsem wanem iumi storyim. Readim disfala article “Wat Nao War blo Armageddon?” for savve moa abaotem disfala war wea bae happen lo future.

•   Bible sei God bae finisim “olketa faet long evriples long wol.” (Sams 46:9) Readim disfala article lo English, “A Real Hope for a Better Tomorrow,” for savve moa abaotem olketa promis blo God for future.

•   Jesus teachim olketa disaepol blo hem for prea for Kingdom blo God for kam. (Matthew 6:9, 10) Datfala Kingdom hem wanfala gavman lo heven wea bae mekem plan blo God for disfala earth for kamap, wea insaed diswan tu hem peace wea bae kamap lo full world. For savve moa abaotem olketa gud samting wea Kingdom bae duim for iu, lukim disfala video Wanem Nao Kingdom Bilong God?

 Winim 129,000 Jehovah’s Witness nao stap lo Ukraine. Olsem Olketa Jehovah’s Witness lo olketa nara kantri, evriwan hia followim example blo Jesus for no teksaed saed lo politik and for no join insaed war. (John 18:36) Olketa Jehovah’s Witness evriwea lo world gohed for talemaot datfala “gud nius abaotem Kingdom” wea hem nomoa savve stretem olketa problem blo iumi olketa man and war tu. (Matthew 24:14) Mifala invaetem iu for contactim mifala for lanem moa samting abaotem disfala message blo hope wea stap lo Bible.