Lo May 24, 2022, wanfala barava nogud samting happen lo Uvalde, wanfala smol taon lo Texas, U.S.A. Wanfala article lo The New York Times niuspepa sei, “wanfala man witim gun hem killim dae 19-fala pikinini and tufala teacher . . . lo Robb Elementary School.”

 Sorre samting nao, kaen nogud samting olsem hem happen staka taem finis. Datfala niuspepa USA Today hem sei “249 taem nao pipol bin sutsut lo olketa skul” insaed year wea go pas lo United States, and “datfala namba hem hae winim eni nara year from 1970 kam kasem distaem.”

 Why nao kaen nogud samting hem happen? Hao nao iumi savve deal witim olketa nogud report olsem? Waswe, enitaem lo future kaen raf samting olsem bae no happen moa? Ansa hem stap lo Bible.

•    Iumi stap lo taem wea Bible kolem lo “olketa last day” and Bible sei hem taem wea staka pipol bae “no garem love insaed long famili” and olketa bae “raf,” and olketa bae duim olketa nogud samting lo narawan. Bible sei tu, olketa nogud wei blo pipol hia “bae worse moa.” (2 Timothy 3:1-5, 13) Sapos iu laek for lanem moa samting abaotem diswan, readim disfala English article “Did the Bible Predict the Way People Think and Act Today?”

 Staka pipol laek savve, ‘Why nao God no stopem olketa nogud samting for happen, olsem for sutsut lo olketa skul?’ Sapos iu laek savve lo ansa from Bible, readim lo English disfala article “Bad Things Happen to Good People—Why?”

•    “Evri samting wea olketa raetem bifor hem for teachim iumi. Hem givim iumi hope bikos olketa Holy Raeting hia . . . comfortim iumi.”—Rome 15:4.

 Olketa Bible principle savve helpem iu for deal witim olketa nogud samting wea happen lo disfala world. Sapos iu laekem moa information abaotem diswan, lukim Awake! magasin lo English wea garem title “Will Violence Ever End?”

 Sapos iu laek lukim samfala idea wea parents savve followim for helpem olketa pikinini for no fraet taem olketa herem olketa nogud nius report olsem, readim disfala English article “Disturbing News Reports and Your Children.”

•    “[God bae] stopem olketa hu i mekem olketa safa, an hemi stopem olketa hu i spoelem olketa ya.”—Sams 72:14, SIPB.

•    “Bae olketa hamarem olketa naef fo faet an spia blong olketa fo kamap olsem aean fo digim graon an huknaef fo katem olketa grep. Nao olketa pipol long wol bae i no faetem moa olketa long narafala kantri, an no tisim moa olketa yanga fo faet.”—Maeka 4:3, SIPB.

 God bae duim samting wea olketa man no fit for duim. Kingdom blo God, wea hem wanfala gavman lo heven, bae distroem olketa weapon and stopem pipol for no raf. Sapos iu laek lanem moa samting abaotem wanem Kingdom blo God bae duim, readim disfala article “Kingdom Bilong God Bae Mekem Peace Kamap.”