Spending for war hem narawe nao.

•   “Last year olketa gavman spendem 2.2 trillion for samfala war. Diswan exceedim selen wea olketa spendem for war lo eni nara year.”—The Washington Post, February 13, 2024.

 Spending hia no selen nomoa. Tingim example hia: War lo Ukraine.

•   Soldia. Samfala expert sei klosap 500,000 soldia dae or wounded since war start tu years ago.

•   Pipol. United Nations reportim dat winim 28,000 dae or injured. Bat, wanfa senior UN official sei: “Hem no possible for really savve hao war hia barava affectim laef blo pipol.” a

 Evriwea lo world barava staka pipol safa bikos lo war.

•   114 million. Namba blo pipol wea displace bikos lo war and violence wea happen lo staka kantri start lo September 2023.

•   783 million. Namba blo pipol wea no garem inaf food. “War nao kosim hangere, and 70 percent blo pipol wea hangere stap lo olketa kantri wea war and violence continue for happen.”—World Food Programme.

 Hao, enitaem war bae finis? Eni hope for peace? Hao, staka resource lo earth savve help for mekem pipol garem inaf food, and no eniwan poor? Wat nao Bible sei?

 Bible profesi dat war bae happen evriwea lo earth and hem describim datwan olsem man wea raedem horse.

•   “Mi lukim nara horse hem kam wea kala bilong hem red. Man wea sidaon antap long hem kasem paoa for aotem peace from earth mekem olketa pipol killim dae olketa narawan. Hem kasem tu wanfala big sword.”—Revelation 6:4.

 Datfala man wea raedem horse stand for war, and nara tufala man wea raed kam bihaen lo hem representim bigfala hangere wea happen lo staka kantri, and staka pipol dae bikos lo sik or eni nara samting. (Revelation 6:5-8) Iu savve lanem samfala nara samting abaotem Bible profesi hia, and why iumi barava sure hem fulfil lo taem blo iumi, readim article “Fofala Man wea Raedem Horse—Hu Nao Olketa?”

 Klosap nao pipol bae no iusim riches blo world for war. Bat, pipol bae no mekem diswan happen. Bible sei:

•   God bae “finisim olketa war lo evri ples lo earth.”—Psalm 46:9.

•   God bae finisim olketa nogud samting wea happen bikos lo war. “Hem bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.”—Revelation 21:4.

•   God bae mek sure evriwan stap lo peace for olowe. “Pipol blo mi bae stap lo ples wea peace hem stap, lo olketa sef ples, and olketa ples for rest wea kwaet.”—Isaiah 32:18.

 Olketa profesi lo Bible abaotem olketa war and olketa nara event wea happen distaem showim dat klosap nao iumi bae stap lo peace.

 Hao nao God bae mekem peaceful future hia for happen? Hem bae iusim gavman blo hem lo heven or Kingdom for duim datwan. (Matthew 6:10) Iu savve lane abaotem wat nao datfala Kingdom, and wat hem bae duim for iu, watchim short video hia Wanem Nao Kingdom Bilong God?