From economy lo kantri hem nogud, waswe, datwan forcem iu for tekem pei wea no mas gud olsem bifor? Olketa pandemic, natural disaster, problem lo politik, and war savve kwiktaem affectim economy. Hem savve mekem iu stress sapos pei blo iu hem kwiktaem katdaon, bat wise advaes lo Bible savve helpem iu for deal witim datwan.

 Bible principle: “Nomata mi garem staka samting or nomoa, mi lane for satisfae nomoa.”—Philippi 4:12.

 Nomata iu no kasem selen olsem bifor, iu savve lane for deal witim datwan. Sapos iu kwiktaem acceptim hao situation blo iu hem change and trae for change fitim datwan, bae datwan helpem iu and famili blo iu for deal witim change hia.

 Faendaot sapos iu savve kasem eni help saed lo selen from gavman or olketa nara organization. No delay for apply for eni help bikos maet datfala help bae stap for lelebet taem nomoa.

 Bible principle: “No eni advaes, bae plan gorong, plande advaes, bae plan gohed.”—Provebs 15:22.

 Storyim situation blo iu witim marit partner and olketa pikinini blo iu. Taem iu story gud witim famili blo iu, iu bae helpem evriwan lo famili for minim and sapotim olketa change wea olketa maet need for duim. Taem evriwan lo famili waka tugeta for no weistim selen, bae famili iusim selen lo wisefala wei.

 Bible principle: “Hem mas ting raonem firstaem haomas selen nao hem needim.”—Luke 14:28.

 From iu no kasem selen olsem bifor, hem important tumas for iu savve gud wat nao iu spendem evri selen blo iu lo hem. First samting, mekem wanfala budget lo wei for raetem daon haomas selen iu ting iu bae kasem each month. Next samting, raetem daon olketa expense blo iu and wat iu savve spendem selen lo hem, nomata iu savve iu need for changem diswan. Evri month trae for keepim samfala extra selen for olketa expense wea seknomoa maet kamap or for olketa emergency.

 Idea: Taem iu recordim olketa expense, no forget for raetem daon tu olketa smol samting wea iu peim. Maet iu sapraes lo haomas selen iu iusim for peim olketa samting hia. For example, wanfala man wea recordim haomas selen hem spendem for olketa smol samting luksavve hem bin spendem tu-thri handred dollar evri year for peim gum nomoa!

 Bible principle: “Luksavve long olketa samting wea barava important.”—Philippi 1:10.

 Comparem selen wea iu kasem witim olketa expense blo iu, then disaedem wat iu savve katdaon lo hem, mekem iu no ovam selen wea iu kasem distaem. Ting raonem samfala example hia:

•   Transport. Sapos iu ownim tufala car, waswe, iu savve salem wanfala? Sapos iu garem expensive car, waswe, iu savve salem and peim wan wea moa cheap? Waswe, iu savve salem car blo iu and iusim nomoa pablik transport or baesikol?

•   Hapitaem. Waswe, iu savve cancelim satellite TV wea iu peim, or stopem for lelebet taem? Waswe, iu savve faendem samting wea moa cheap? For example, maet iu savve borrowim olketa movie and buk from olketa narawan.

•   Wata, Paoa, and Gas. Story witim famili abaotem hao for katdaon lo haomas wata, paoa, and gas iufala iusim. Wei for offem olketa laet and no iusim staka wata tumas for swim savve sevem selen.

•   Kaikai. Trae for kuki lo haos and no go tumas lo kai bar. Planim wat iu bae kukim, and sapos fitim trae for kukim lelebet moa samting, mekem iu savve garem leftova kaikai for narataem. Bifor iu go lo stoa, raetem list lo samting wea iu needim mekem iu no peim samting wea iu no needim. Baem olketa fresh frut and vegetable lo market, bikos plande taem bae hem moa cheap. Trae for no peim olketa kaikai wea no healthy. Maet iu savve wakem garden for help sevem selen.

•   Kaleko. Peim olketa niu kaleko taem iu needim nomoa and no from iu laekem niu stael. Peim kaleko taem price hem go daon, or lukaotem gud kaleko lo secondhand stoa. Bihaen iu wasim kaleko blo iu, trae for draem lo sun and no iusim machine for draem.

•   Samting Iu Laek Baem lo Future. Bifor iu baem samting, tingim diswan: ‘Hao, mi garem inaf selen for peim diswan? Waswe, mi really needim?’ Waswe, iu savve weit for samfala taem bifor iu changem samting lo haos, olketa electronic device, or car? And waswe, iu savve salem samfala samting wea iu no iusim or needim distaem? Sapos iu duim olsem, hem savve helpem iu for garem simpol laef and kasem samfala extra selen tu.

 Idea: Sapos seknomoa selen wea iu kasem hem katdaon, maet diswan helpem iu for lusim samfala wei wea nogud and wea kostim staka selen, olsem wei for smoke, gambol, or drink tumas. Wei for mekem olketa change hia bae helpem iu for garem moa selen and for healthy tu.

 Bible principle: “Olketa wea luksavve olketa needim God bae hapi.”—Matthew 5:3.

 Bible givim disfala gud advaes: “Seleni save gadem yu, an waes tingting save gadem yu tu. Bat waes tingting hemi moabeta bikos sapos yu save long waes tingting, hemi mekem laef blong yu gudfala olowe.” (Eklesiastes 7:12) Wise toktok olsem hem stap lo Bible, and plande pipol wea followim datfala advaes sei diswan helpem olketa for no wari tumas abaotem selen.—Matthew 6:31, 32.