Evritaem lo nius olketa report hem abaotem pipol wea talem olketa toktok or duim olketa nogud samting bikos lo heit, pipol attakim olketa narawan bikos olketa ting daonem pipol from difren ples, and war.

•   “Bikos lo war wea gohed between Israel and Gaza and pipol promotim violence and wei for heit, datwan mekem pipol talem staka toktok lo social media wea showim wei for heit narawan. Datwan winim enitaem bifor.”​—The New York Times, November 15, 2023.

•   “Since October 7th, violence and toktok wea showim pipol heitim narawan hem barava increase bikos pipol ting daonem olketa pipol from nara ples.”​—Dennis Francis, president of the United Nations General Assembly, November 3, 2023.

 Toktok wea showim pipol heitim narawan, violence, and war hem no niu samting. Bible story abaotem samfala lo bifor wea “aimim nogud toktok blo olketa olsem olketa arrow” and wea faet lo war and duim olketa raf samting. (Psalm 64:3; 120:7; 140:1) Bat Bible storyim hao wei for heit wea iumi lukim distaem hem garem important minim.

 Bible storyim tufala reason why wei for heit hem big tumas distaem.

1.  1. Hem profesi abaotem wanfala taem wea “love bilong staka bae no strong nao olsem bifor.” (Matthew 24:12) Instead for showim love, pipol bae garem olketa attitude wea kosim wei for heitim each other.​—2 Timothy 3:1-5.

2.  2. Wei for heit wea big tumas lo world distaem showim hao Satan datfala Devil nao influencim pipol. Bible sei “full world hem stap long paoa bilong Satan.”​—1 John 5:19; Revelation 12:9, 12.

 Nomata olsem, Bible storyim tu dat klosap nao God bae finis rut kos blo wei for heit. And tu, hem bae finisim evri wei for safa wea pipol kasem bikos lo heit. Bible promisim:

•   God “bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.”​—Revelation 21:4.