Chapter 33

Fulfillim Profesi Bilong Isaiah

TAEM Jesus savvy olketa Farisi and sekson bilong Herod plan for killim hem dae, hem and olketa disaepol lusim datfela ples and go long Sea Bilong Galilee. Long there, planti pipol from evriwea long Palestine, and long otherfela ples tu they kam long hem. Hem healim planti long olketa, and diswan mekem evriwan wea garem no gud sik for trae for kam klosap and touchim hem.

From pipol staka tumas, Jesus talem olketa disaepol for readyim wanfela boat for iusim. Sapos hem pushim go lelebet disfela boat from sandbis, then olketa pipol bae no klosap tumas long hem. Then hem savvy sidaon insaed long boat and teachim them or go long narafela area for helpem pipol.

Disaepol Matthew luksavvy work wea Jesus duim hem fulfillim “samting wea profet Isaiah tok abaot.” Then Matthew talem profesi wea Jesus fulfillim:

“Lukim! Servant bilong mi wea mi choosim, dat wan wea mi love-im, wea soul bilong mi hapi long hem! Mi bae putim spirit bilong mi long hem, and hem bae mekem justice kamap klia long olketa nation. Hem bae no argue, or singaot big, and no anywan bae herem voice bilong hem long road. Bae hem no pisisim stik wea klosap for brek, and bae hem no aotem laet bilong lamp wea klosap for dae, go kasem taem wea hem win for duim justice. Tru nao, olketa nation bae hope long nem bilong hem.”

Yes, Jesus hem servant wea God love-im and hapi long hem. And Jesus showim aot klia wanem nao trufela justice, wea kastom bilong olketa giaman religion haedem. From they no followim stret law bilong God, olketa Farisi nating savvy helpem man wea sik long Sabbath! Taem hem showim aot klia justice fasin bilong God, Jesus aotem hevi wea kam from no gud kastom wea pipol followim, and from diswan nao, olketa bigman bilong religion trae for killim hem dae.

Wanem nao hem meanim for ‘hem bae no argue, or tok big mekem pipol long olketa road herem hem’? Taem hem healim pipol, Jesus ‘barava stopem them for talem nem bilong hem long otherfela pipol.’ Hem no want for apim hemseleva long olketa ples or for pipol talem rong story olabaot.

And tu, Jesus givim message bilong comfort long pipol wea olsem stik wea klosap for brek, wea otherfela pipol step on top long them. They olsem lamp wea klosap for dae. Jesus hem no pisisim stik wea klosap for brek or offim lamp wea klosap for dae. But withim kaenfela fasin and love, hem savvy hao for liftim ap olketa wea humble. Tru nao, Jesus nao man wea olketa nation savvy hope long hem! Matthew 12:​15-21; Mark 3:​7-12; Isaiah 42:​1-4.

▪ Hao nao Jesus showim aot klia justice fasin, hem no argue or singaot big long olketa road?

▪ Hu nao olsem stik wea klosap for brek and lamp wea klosap for dae, and hao nao Jesus deal withim them?