Chapter 10

Go Long Jerusalem

HEM klosap nao long taem bilong hotfela season. And hem taem for famili bilong Joseph, withim olketa fren and relative, for go long Jerusalem for celebrate-im Passova wea they savvy duim evri year. Evriwan they hapi for go nomata they mas wakabaot for samting olsem 65 mile. Distaem Jesus hem 12-year-old, and hem barava luk forward for disfela festival.

For Jesus and famili bilong hem, Passova hem no samting for wanfela day nomoa. They stap for narafela seven day moa for Festival Bilong Olketa Cake Wea No Garem Yeast, wea hem part bilong Passova taem. So, start from taem wea they lusim hom long Nazareth, go kasem taem wea they stap long Jerusalem, hem samting olsem tufela week. But dis year, hem longfela moa from samting wea happen long Jesus.

Disfela problem hem kamap taem they wakabaot go back from Jerusalem. Joseph and Mary ting say Jesus hem stap withim olketa relative and fren wea they wakabaot tugeta. But taem they stop long naet, hem no kam back so they go lukaotem hem midlwan long olketa wea they wakabaot tugeta. But they no faendem hem anywea. So Joseph and Mary go back moa long Jerusalem for lukaotem hem.

For wan full day they lukaotem hem, but they no faendem hem. Long mek-tu day they no savvy faendem hem tu. Go-go, long mek-three day, they go long temple. Long there, insaed long wanfela hall bilong temple, they lukim Jesus hem sidaon midlwan long olketa teacher bilong Jew and hem listen long them and askim them olketa kwestin.

“Pikinini, why nao iu duim diswan long mifela?” Mary hem askim hem. “Dadi bilong iu and mi, mi tufela worry tumas for lukaotem iu.”

Jesus hem sapraes from they no savvy wea nao for faendem hem. “Why nao iufela lukaotem mi?” hem say. “Waswe, iufela no savvy mi mas stap long haos bilong Father bilong mi?”

Jesus no meanim why nao dadi and mami bilong hem no savvy long diswan. Bihaen Jesus go back withim dadi and mami bilong hem and hem go ahed for stap under long them. Hem go ahed for grow long wisdom and long physical way and luk gud long eye bilong God and olketa man. Yes, from taem wea hem smallfela pikinini, Jesus showim aot gudfela example for lukaotem olketa spiritual samting and tu for show aot respect for dadi and mami bilong hem. Luke 2:​40-52; 22:⁠7.

▪ Wea nao Jesus savvy go evritaem withim famili bilong hem, and they go for hao long?

▪ Wanem nao happen taem Jesus hem 12-year-old?

▪ Wanem example nao Jesus hem showim aot for youngfela pipol distaem?