Chapter 12

Jesus Hem Baptaes

SAMTING olsem sixfela month bihaen John hem start for preach, Jesus, wea hem 30-year-old distaem, hem kam long John long Jordan River. For wanem? Waswe, hem kam for visit nomoa? Waswe, Jesus hem interest nomoa long hao work bilong John hem go ahed? No moa, Jesus askim John for baptaesim hem.

John kwiktaem for no agree and say: “Mi nao man wea iu need for baptaesim, so why nao iu kam long mi?” John savvy kasin bilong hem Jesus hem spesel Son bilong God. Tru nao, John hem jump withim hapi insaed long bele bilong mami bilong hem taem Mary, wea babule withim Jesus, hem visitim them! And bihaen, Elizabeth, mami bilong John, talem hem abaotem diswan. And hem talem hem tu abaotem toktok bilong angel abaotem taem wea Jesus bae born and hao olketa shepherd lukim olketa angel long naet wea Jesus hem born.

So John hem savvy gud long Jesus. And John savvy baptism bilong hem no fitim Jesus. Baptism bilong hem for olketa wea repent from sin bilong them, but Jesus hem no garem any sin. But, nomata John no want for duim diswan, Jesus go ahed for say: “Duim disfela samting distaem, from long disfela way bae iumi savvy duim evri samting wea raeteous.”

Why nao hem stret for Jesus for baptaes? Bikos baptaes bilong Jesus hem wanfela saen, no for show aot hem repent from sin, but for givim hemseleva for duim will bilong Father bilong hem. Jesus hem wanfela carpenter, but distaem hem ready for startim ministry wea Jehovah God sendem hem long earth for duim. Waswe, iu ting say John hem savvy any spesel samting bae happen taem hem baptaesim Jesus?

Bihaen, John hem talem diswan: “Dat Wan wea sendem mi for baptaesim pipol long wata hem say long mi, ‘Man wea iu lukim spirit kam daon long hem and stap withim hem, hem nao bae baptaesim pipol long holy spirit.’” So John hem savvy spirit bilong God bae kam daon long samwan wea hem bae baptaesim. So, maet John no sapraes taem Jesus kamaot from wata and hem lukim “spirit bilong God kam daon long hem olsem wanfela kurukuru.”

But samting moa hem happen taem Jesus hem baptaes. “Heven hem open” long hem. Wanem nao diswan hem meanim? Luk olsem diswan meanim hao taem hem baptaes, hem rememberim nao laef bilong hem long heven bifor. So, Jesus hem rememberim evribit laef bilong hem olsem wanfela spirit son bilong Jehovah God, and evri samting wea God talem long hem taem hem stap long heven bifor.

And tu, long taem wea hem baptaes, wanfela voice from heven hem say: “Hem nao Son bilong mi wea mi love-im, mi hapi long hem.” Datfela voice hem bilong hu? Voice bilong Jesus seleva? No moa! Hem voice bilong God. Yes, Jesus hem Son bilong God, hem no God, olsem samfela pipol talem.

But, Jesus hem wanfela son bilong God long earth, olsem firstfela man Adam. Disaepol Luke, bihaen hem story abaotem baptism bilong Jesus, hem raet olsem: “Jesus seleva, taem hem startim work bilong hem, hem abaot thirti year old nao, and pipol savvy long hem olsem son bilong Joseph, son bilong Heli, . . . son bilong David, . . . son bilong Abraham, . . . son bilong Noah, . . . son bilong Adam, son bilong God.”

Olsem Adam hem “son bilong God” long earth, so Jesus tu hem olsem. Jesus hem nambawan man wea winim evri otherfela man, wea show aot klia tumas taem iumi lukluk long laef bilong hem. But long baptism bilong hem, Jesus hem fren withim God long niufela way, hem kamap spiritual Son bilong God. Hem olsem God kolem hem go back long heven, from hem start for followim wanfela living wea lead go for givim laef bilong hem olsem sakrifaes for olawe for olketa man wea garem sin. Matthew 3:​13-17; Luke 3:​21-38; 1:​34-36, 44; 2:​10-14; John 1:​32-34; Hebrews 10:​5-9.

▪ Why nao John hem savvy gud long Jesus?

▪ From hem no duim any sin, why nao Jesus hem baptaes?

▪ From samting wea John savvy abaotem Jesus, why nao maet hem no sapraes taem spirit bilong God kam daon long Jesus?