Chapter 5

Jesus Hem Born—Wea and Wanem Taem?

KING bilong Rome, Caesar Augustus, hem mekem wanfela law for evriwan mas go back and register long taon wea they born. So Joseph hem go back long ples wea hem born, taon bilong Bethlehem.

Planti pipol kam long Bethlehem for register, and only ples wea Joseph and Mary savvy faendem for stap hem long wanfela haos for keepim olketa animal. Long hia nao, wea olketa donkey and otherfela animal they stap, Jesus hem born. Mary paselem hem long wanfela kaleko and putim hem long ples for putim gras for olketa animal.

Tru nao, God mekem way for Caesar Augustus for mekem law for register. Diswan mekem Jesus fit for born long Bethlehem, taon wea Scripture say promis ruler bae hem born.

Diswan hem barava important naet! Long field aotsaed, braetfela laet hem shine long wanfela grup bilong shepherd. Hem glory bilong Jehovah! And angel bilong Jehovah talem them: “No fraet, from, lukim! mi talem iufela gud nius long wanfela hapi samting wea evriwan bae kasem, bikos long tuday wanfela Man for Sevem iufela hem born, hem nao Kraest disfela Lord, long taon bilong David. And diswan nao wanfela saen for iufela: iufela bae faendem wanfela baby wea they paselem long kaleko and layim daon long ples for putim gras for olketa animal.” Sek nomoa planti angel kam and singsing: “Givim glory long God wea stap on top, and long earth peace stap midlwan long olketa man bilong gudwill.”

Taem olketa angel lusim them, olketa shepherd say long each other: “Iumi go long Bethlehem and lukim disfela samting wea hem happen finis, wea Jehovah showim long iumi.” They go kwiktaem and barava faendem Jesus long ples wea angel talem. Taem olketa shepherd talem samting wea angel talem, evriwan wea herem they sapraes for gud. Mary hem keepim gud evri toktok hia insaed long heart bilong hem.

Planti pipol distaem believe Jesus hem born long December 25. But December hem coldfela taem wea hem rain tumas long Bethlehem. Olketa shepherd bae no stap aotsaed long field long naet withim olketa sheepsheep bilong them long datfela taem bilong year. And tu, hem hard for Caesar bilong Rome for askim pipol wea start for againstim hem for go and register long barava coldfela season. Luk olsem Jesus hem born samtaem long start bilong October long datfela year. Luke 2:​1-20; Micah 5:⁠2.

▪ Why nao Joseph and Mary go long Bethlehem?

▪ Wanem nambawan samting nao happen long naet wea Jesus hem born?

▪ Hao nao iumi savvy Jesus no born long December 25?