Chapter 7

Jesus and Sekson wea Studyim Star

SAMFELA man kam from East. They sekson wea studyim star for savvy long future​—⁠sekson wea say they savvy talemaot meaning bilong position bilong star. Taem they stap long East, they lukim wanfela niufela star, and they followim diswan for planti hundred mile go kasem Jerusalem.

Taem sekson hia kasem Jerusalem, they ask olsem: “Wea nao dat wan wea bae king bilong olketa Jew hem born? From mifela lukim star bilong hem taem mifela stap long east, and mifela kam for bow daon long hem.”

Taem King Herod long Jerusalem hem herem diswan, hem kros for gud. So hem kolem olketa chief priest and askim them abaot wea nao Kraest bae born. Followim samting wea stap insaed long olketa Scripture, they ansa: “Long Bethlehem.” So Herod kolem sekson hia wea studyim star and talem them olsem: “Go lukaotem disfela youngfela pikinini, and taem iufela faendem hem, kam back and talem long mi mekem mi tu savvy go and bow daon long hem.” But really, Herod hem want for faendem disfela pikinini for killim hem dae!

Bihaen they go aot, wanfela different kaen samting hem happen. Datfela star wea they lukim long East hem muv front long them. Tru nao, diswan no just wanfela star nating nomoa, but hem for leadim them. Sekson hia followim go kasem taem hem stop on top long haos wea Joseph and Mary they stap.

Taem they go insaed long haos, they lukim Mary withim youngfela pikinini bilong hem, Jesus. So evriwan bow daon long hem. And they givim olketa present olsem gold, frankincense, and myrrh. Bihaen, taem they ready for go back and talem Herod ples wea pikinini hem stap, God hem warnim them insaed long wanfela dream for no duim datwan. So they go back long kantri bilong them followim narafela road.

Iu ting say hu nao mekem datfela star hem muv long skae for leadim sekson hia? Remember, disfela star no leadim them go stret long Bethlehem. But, hem leadim them go long Jerusalem wea they meetim King Herod, wea want for killim dae Jesus. And hem savvy duim datwan sapos God no warnim sekson hia for no talem Herod ples wea Jesus hem stap. Enemy bilong God, Satan nao want for killim dae Jesus, and hem iusim datfela star for trae for kasem goal bilong hem. Matthew 2:​1-12; Micah 5:⁠2.

▪ Wanem nao show aot star wea sekson wea studyim star they lukim hem no wanfela star nating nomoa?

▪ Wea nao Jesus hem stap taem sekson wea studyim star faendem hem?

▪ Why nao iumi savvy Satan nao iusim datfela star for leadim sekson wea studyim star?