Chapter 112

Lastfela Passova Bilong Jesus Hem Klosap

TUESDAY Nisan 11 hem klosap for finis, and Jesus finis for teachim olketa aposol long Maunten Bilong Olives. Diswan hem busy day wea hem work hard! Distaem, maet taem they go back long Bethany for sleep, hem talem olketa aposol bilong hem: “Iufela savvy bihaen long tufela day passova bae kamap, and olketa bae givim go Son bilong man long olketa pipol for nilam hem long post.”

Luk olsem Jesus rest withim olketa aposol bilong hem long Wednesday, Nisan 12. Long day bifor, hem tok strong long olketa bigman bilong religion long pablik, and hem savvy they lukaotem hem for killim hem dae. So long Wednesday hem no showim hemseleva, bikos hem no wantim any samting for spoelem way wea hem bae celebrate-im Passova withim olketa aposol bilong hem long tomorrow evening.

But long distaem, olketa chief priest and older man hipap long courtyard bilong hae priest, Caiaphas. From they still feel kros long toktok bilong Jesus long day bifor, they plan for trikim hem for kasholem hem and killim hem dae. But they say: “No long taem bilong festival, nogud olketa pipol mekem trabel kamap.” They fraetem olketa pipol wea laekem Jesus.

Taem olketa bigman bilong religion go ahed for mekem no gud plan for killim dae Jesus, wanfela man hem visitim them. They sapraes tumas from hem wanfela aposol bilong Jesus seleva, Judas Iscariot, wea Satan muvim hem for givim go Masta bilong hem long olketa enemy! They hapi tumas taem Judas ask: “Wanem nao iufela bae givim mi for givim hem long iufela?” They agree for peim hem 30 silver shilling, wea hem price bilong wanfela slave for fitim Law covenant bilong Moses. Start long datfela taem, Judas lukaotem chance for givim go Jesus long them taem no staka pipol stap.

Nisan 13 hem start taem sun go daon long Wednesday. Jesus hem kam from Jericho last Friday, so diswan hem mek-six and lastfela naet wea hem stap long Bethany. Long next day, Thursday, bae they readyim olketa lastfela samting for datfela Passova, wea bae start taem sun go daon. Hem nao taem wea they mas busarem Passova sheepsheep and kukim full wan. Wea nao olketa bae celebrate-im feast hia, and hu nao bae readyim evri samting?

Jesus no talem yet wanem they bae duim, maet nogud Judas talem olketa chief priest and bae they kasholem Jesus long taem bilong Passova celebration. But distaem, maet hem Thursday aftanun, so Jesus talem Peter and John for lusim Bethany and say: “Go and readyim passova for iumi kaikaim.”

“Wea nao iu wantim mifela for readyim?” they ask.

“Taem iufela go insaed long taon,” Jesus hem say, “wanfela man wea karem wanfela bottle wata bae meetim iufela. Followim hem long haos wea hem go insaed. And iufela mas say long man wea ownim haos, ‘Teacher hem say long iu: “Wea nao room for olketa visitor wea mi savvy kaikaim passova withim olketa disaepol bilong mi?”’ And datfela man bae showim iufela wanfela bigfela room wea stap on top. Readyim long there.”

Luk olsem man wea ownim haos hem wanfela disaepol bilong Jesus wea savvy Jesus hem want for iusim haos bilong hem for disfela spesel celebration. So, taem Peter and John kasem Jerusalem, they faendem evri samting olsem Jesus hem talem finis. So tufela arrangim olketa samting and readyim sheepsheep and evri otherfela samting wea olketa 13-fela wea bae celebrate-im Passova they needim, Jesus and 12-fela aposol bilong hem. Matthew 26:​1-5, 14-19; Mark 14:​1, 2, 10-16; Luke 22:​1-13; Exodus 21:⁠32.

▪ Wanem nao Jesus duim long Wednesday, and why nao olsem?

▪ Wanem meeting nao kamap long haos bilong hae priest, and why nao Judas visitim olketa bigman bilong religion?

▪ Hu nao Jesus sendem go long Jerusalem long Thursday, and for duim wanem samting?

▪ Wanem nao tufela hia they faendem wea showim aot moa paoa bilong Jesus for duim mirakol?