Chapter 64

Leson Abaotem Way for Forgive

JESUS hem still stap long haos long Capernaum withim olketa disaepol. Hem story withim them abaotem hao for deal withim olketa problem wea kamap midlwan long olketa brata, so Peter ask: “Lord, haomas taem nao brata bilong mi savvy sin againstim mi and mi mas forgivim hem?” From olketa teacher bilong Jew religion say man mas forgive go kasem threefela taem, maet Peter ting say hem kaen tumas for say “go kasem sevenfela taem?”

But disfela way for kaontem haomas taem for forgive hem rong. Jesus stretem Peter olsem: “Mi talem iu, no, Go kasem sevenfela taem, but, Go kasem seventi-seven taem.” Hem show aot hem rong for Peter kaontem haomas taem hem mas forgivim brata bilong hem.

For showim olketa disaepol hao they mas garem fasin for forgive, Jesus talem wanfela tok piksa. Hem abaotem wanfela king wea wantim olketa slave bilong hem for peim back kaon bilong them. Wanfela slave garem bigfela kaon bilong 60,000,000 denarii. Hem kanduit for peim back datwan. So, datfela king givim order for they sellim hem and waef and olketa pikinini bilong hem olsem slave for peim back datfela kaon.

Then datfela slave fall daon front long masta bilong hem and barava ask olsem: “Iu patient withim mi and bae mi peim back evri samting bilong iu.”

From hem feel sorry long hem, datfela masta showim aot mercy and finisim bigfela kaon bilong datfela slave. But no longtaem bihaen, slave hia go and faendem narafela slave wea kaonem 100 denarii nomoa long hem. Hem squeeze-im neck bilong slave hia and say: “Peim back evri samting wea iu kaonem.”

But narafela slave hia no garem any shilling. So hem fall daon front long datfela slave wea hem kaon long hem and barava ask olsem: “Iu patient withim mi and bae mi peim back samting bilong iu.” But long way wea different evribit from masta bilong hem, datfela slave no showim aot mercy, and hem talem olketa for putim slave hia insaed prison.

Well, Jesus say, olketa otherfela slave wea lukim diswan go and talem long masta. Hem kros for gud, so hem kolem kam datfela slave. “Badfela slave,” hem say, “mi finisim evri kaon bilong iu taem iu askim mi. Waswe, fitim iu tu for showim aot mercy long narafela slave hia, olsem mi tu showim aot mercy long iu?” From hem barava kros, datfela masta sendem datfela slave wea no showim aot mercy go long prison go kasem taem wea hem mas peim back evri samting wea hem kaonem.

Then Jesus say: “Long sem way tu Father bilong mi long heven bae duim long iufela sapos iufela no forgivim brata bilong iufela from heart bilong iufela.”

Hem nambawan leson abaotem way for forgive! Taem iumi tingim hao God forgivim bigfela kaon bilong sin bilong iumi, any rong samting wea Kristian brata duim long iumi, hem small nomoa. And tu, Jehovah God forgivim iumi planti thousand taem. Planti taem, iumi no savvy iumi sin againstim hem. So, waswe, fitim iumi for forgivim brata bilong iumi samfela taem, nomata samting wea hem duim long iumi hem rong? Remember, olsem Jesus teach long Sermon Long Maunten, God bae “forgivim rong bilong iumi, olsem iumi forgivim olketa wea duim rong long iumi.” Matthew 18:​21-35; 6:12; Colossians 3:13.

▪ Why nao Peter askim kwestin abaotem way for forgivim brata bilong hem, and why nao maet hem ting say sevenfela taem for forgive hem kaen tumas?

▪ Wanem nao wanfela king duim taem slave bilong hem askim mercy? Hao nao fasin wea datfela slave showim aot long narafela slave hem different?

▪ Wanem nao iumi learnim from tok piksa bilong Jesus?