Chapter 101

Long Bethany Long Haos Bilong Simon

TAEM Jesus lusim Jericho, hem go for Bethany. From Jericho stap long barava lowfela ples, and Bethany long haefela ples, hem wakabaot for klosap full day, from hem mas klaem go ap for samting olsem 12-fela mile long olketa raf ples. Maet iu remember, Bethany hem hom bilong Lazarus and tufela sista bilong hem. Datfela smallfela vilij hem samting olsem tufela mile from Jerusalem, wea stap long east saed long Maunten Bilong Olives.

Planti they kasem Jerusalem finis for Passova. They kam early for klinim themseleva for fitim law. Maet they touchim body bilong wanfela man wea dae finis or duim samting wea mekem olketa no klin. So they followim olketa rul for klinim themseleva mekem they kamap fit for celebrate-im Passova. Taem olketa hia wea kam firstaem they kasem temple, planti they tingting sapos Jesus bae kam long Passova or no moa.

Long Jerusalem evriwan tok abaotem hem. Evriwan savvy olketa bigman bilong religion want for kasholem hem for killim hem dae. Yes, they givim order long evriwan for reportim ples wea hem stap sapos they savvy. Threefela taem insaed long olketa month wea just go past​—⁠long Festival Bilong Tabernacle, long Festival Bilong Dedication, and bihaen hem resurrectim Lazarus⁠—​olketa bigman hia they trae for killim hem dae. So, olketa tingting, waswe, bae Jesus kam moa long pablik? “Wanem nao tingting bilong iu?” olketa askim each other.

But long datfela taem, Jesus kasem Bethany sixfela day bifor Passova, wea savvy start long Nisan 14 for followim kalenda bilong olketa Jew. Jesus hem kasem Bethany long Friday evening, wea hem start bilong Nisan 8. Hem no fit for go long Bethany long Saturday bikos for go-go long Sabbath​—⁠wea start from taem sun go daon long Friday go kasem taem sun go daon long Saturday⁠—​hem samting wea law bilong Jew tambuim. Maet Jesus go long haos bilong Lazarus, olsem hem duim bifor, and sleep long there long Friday naet.

But, narafela man wea stap long Bethany hem invitim Jesus and olketa fren bilong hem for kaikai long Saturday evening. Datfela man hem Simon, wanfela leprosy man bifor, wea maet Jesus nao healim hem. From hem fasin bilong hem, Martha hem busy for readyim kaikai for olketa wea kam. But Mary hem stap klosap long Jesus, and hem duim samting wea mekem any kaen toktok kamap.

Mary openem wanfela botol, wea insaed hem garem samting olsem haf kilo oil wea smel nice, wea hem “really nard.” Diswan kostim bigfela shilling. Yes, man fit for baem diswan withim wages bilong hem for full year! Taem Mary pourim oil hia long hed and leg bilong Jesus and hem draem leg bilong Jesus withim hair bilong hem, nicefela smel hem fulap long whole haos.

Olketa disaepol they kros and ask olsem: “Why nao hem waste-im diswan?” Then Judas Iscariot hem say: “Why nao hem no sellim disfela oil wea smel nice for three hundred denarii and givim datfela shilling long poor pipol?” But Judas hem no really worry abaotem olketa poor pipol, from hem start for stealim shilling insaed long money box bilong olketa disaepol.

Jesus hem tok for saed bilong Mary. “Leavim hem,” hem komandim them. “Why nao iufela trae for mekem trabel for hem? Hem duim gudfela samting for mi. Olketa poor wan bae evritaem stap withim iufela, and anytaem iufela wantim iufela savvy duim gudfela samting for olketa, but mi bae no stap withim iufela olawe. Hem duim samting wea hem fit for duim; hem putim oil wea smel nice long body bilong mi for ready for olketa buryim mi. Tru nao mi talem iufela, Long evri ples wea they preachim gud nius insaed long world, pipol bae story abaotem samting wea disfela woman duim for rememberim hem.”

Jesus hem stap long Bethany for winim 24 hour finis, and pipol long there herem. So planti kam long haos bilong Simon for lukim Jesus, but olketa kam for lukim Lazarus tu, wea stap long there. So olketa chief priest no plan for killim dae Jesus nomoa but Lazarus tu. Diswan hem from planti pipol putim faith long Jesus bikos they lukim man wea hem bringim back from dae! Yes, olketa bigman bilong religion they badfela tumas! John 11:​55–12:11; Matthew 26:​6-13; Mark 14:​3-9; Acts 1:⁠12.

▪ Wanem nao pipol tok abaotem long temple long Jerusalem, and why nao olsem?

▪ Why nao Jesus hem kasem Bethany long Friday and no long Saturday?

▪ Taem Jesus kasem Bethany, wea nao hem stap long Sabbath?

▪ Wanem nao Mary duim wea mekem any kaen toktok kamap, and wanem nao Jesus talem for saed bilong Mary?

▪ Wanem nao showim aot olketa chief priest they badfela tumas?