Chapter 20

Mek-tu Mirakol Long Cana

TAEM Jesus go back long hom ples bilong hem bihaen hem preach long Judea, hem no go for rest. But, hem startim bigfela ministry moa long Galilee, ples wea hem grow ap. But olketa disaepol bilong hem no stap withim hem, from olketa go back hom long famili and work bilong them bifor.

Wanem message nao Jesus start for preachim? Hem olsem: “Kingdom bilong God hem kam klosap. Repent, iufela pipol, and garem faith long disfela gud nius.” And wanem nao happen? Pipol bilong Galilee they acceptim Jesus. Evriwan barava respectim hem. Diswan hem no just from message bilong hem, but, bikos planti stap long datfela Passova long Jerusalem samfela month go finis and they lukim olketa nambawan saen wea hem duim.

Luk olsem Jesus hem startim bigfela ministry long Galilee long taon bilong Cana. Maet iu remember bifor, taem hem kam back from Judea, hem mekem wata for kamap wine long wanfela wedding feast long there. Long disfela mek-tu taem, pikinini bilong wanfela bigman long gavman bilong King Herod Antipas hem sik for gud. Taem disfela bigman herem Jesus hem kam from Judea for go long Cana, hem kam from hom bilong hem long Capernaum for faendem Jesus. Disfela man hem sorry tumas, and ask olsem: ‘Please kam kwiktaem, bifor pikinini bilong mi hem dae.’

Jesus ansa: ‘Go back long hom. Son bilong iu hem gud back nao!’ Bigman bilong Herod hem believim diswan and startim longfela go-go bilong hem for go back hom. Taem hem go-go, hem meetim wanfela servant bilong hem, wea kam for talem hem hao evri samting olraet nao​—⁠son bilong hem gud nao! ‘Wanem taem nao hem kamap gud moa?’ hem ask.

‘Yesterday long wan klok long aftanun,’ they say.

Datfela bigman luksavvy hem nao barava taem wea Jesus say, ‘Son bilong iu hem gud back nao!’ Bihaen datwan, datfela man and full famili bilong hem they kamap disaepol bilong Kraest.

So Cana hem kasem spesel blessing olsem ples wea Jesus hem duim mirakol tufela taem bihaen hem kam back from Judea. But, they no only mirakol wea hem duim kam kasem distaem, but they markem taem wea hem kam back long Galilee.

Jesus hem go hom long Nazareth. Wanem nao bae happen long there? John 4:​43-54; Mark 1:​14, 15; Luke 4:​14, 15.

▪ Taem Jesus kam back long Galilee, wanem nao happen long olketa disaepol bilong hem, and hao nao pipol ting longhem?

▪ Wanem mirakol Jesus duim, and hao nao diswan affectim olketa?

▪ Hao nao Cana kasem spesel blessing from Jesus?