Chapter 8

Ranawe From Raf-fela Ruler

JOSEPH hem wekapem Mary for talem hem important nius. Angel bilong Jehovah just kam long hem and say: “Get ap, tekem youngfela pikinini and mami bilong hem and ranawe go long Egypt, and stap long there go kasem taem mi talem iu; from Herod hem ready for lukaotem disfela youngfela pikinini for killim hem dae.”

Kwiktaem nomoa, threefela ranawe nao. And they ranawe long barava taem from Herod hem just savvy sekson wea studyim star they trikim hem and they lusim kantri finis. Remember, olketa should go back and talem hem taem they faendem Jesus. Herod hem kros for gud. So from hem trae for killim dae Jesus, hem givim order for killim dae evri boy long Bethlehem and olketa area raonem datfela ples, wea they tu year old or wea moa young. Hem talem disfela age from samting wea hem herem from sekson wea studyim star wea kam from East.

Way wea they killim dae evri baby boy hem samting wea barava no gud tumas! Olketa soldia bilong Herod go insaed long each haos. And taem they faendem wanfela baby boy, they aotem hem from mami bilong hem. Iumi no savvy haomas baby nao they killim dae, but bigfela krae and sorry bilong olketa mami hem fulfillim wanfela profesi long Bible wea profet bilong God, Jeremiah talem.

Long datfela taem, Joseph and famili bilong hem arrive safe long Egypt, and they stap long there. But wanfela naet angel bilong Jehovah kam moa long Joseph long narafela dream. “Get ap, tekem disfela youngfela pikinini and mami bilong hem and go back long land bilong Israel, from olketa wea lukaotem soul bilong disfela youngfela pikinini they dae finis.” So for fulfillim narafela Bible profesi wea say Son bilong God bae kamaot from Egypt, famili hia go back long hom bilong them.

Luk olsem Joseph hem want for stap long Judea, wea they stap long taon bilong Bethlehem bifor they ranawe go long Egypt. But hem herem hao badfela son bilong Herod, Archelaus hem king bilong Judea long distaem, and insaed long narafela dream hem kasem warning from Jehovah long disfela danger. So Joseph and famili bilong hem go long north and stap long taon bilong Nazareth long Galilee. Long disfela ples, wea farawe from main ples bilong Jew religion, Jesus hem grow ap. Matthew 2:​13-23; Jeremiah 31:15; Hosea 11:⁠1.

▪ Taem sekson wea studyim star no go back, wanem barava no gud samting nao King Herod duim, but hao nao Jesus stap safe?

▪ Taem they kam back from Egypt, why nao Joseph no stap moa long Bethlehem?

▪ Wanem nao olketa Bible profesi wea fulfill long datfela taem?