“Iu mas evritaem storyim disfala buk bilong Law, and iu mas readim and ting raonem evri day and evri naet, mekem iu savve followim gud evri samting wea hem talem. Sapos iu duim datwan, bae iu garem gudfala laef and bae iu duim samting wea wise.”

Joshua 1:8

“Olketa gohed for read big from datfala buk, wea hem nao Law bilong tru God. Olketa explainim gud, wea datwan helpem pipol hia for minim samting wea olketa readim.”

Nehemiah 8:8

“Man wea no followim advaes bilong nogud pipol bae hapi. . . . Hem barava tinghae long law bilong Jehovah and hem readim and ting raonem law hia evri day and evri naet. . . . Hem bae win long evri samting wea hem duim.”

Psalm 1:1-3

“Taem Philip ran go kasem chariot hia, hem herem datfala man hem readim profesi bilong Isaiah, and hem sei: ‘Hao, iu minim samting wea iu readim?’ Man hia sei: ‘Hao nao bae mi savve sapos no eniwan minim kam long mi?’”

Acts 8:30, 31

 “Nomata olketa man no savve lukim God, olketa wei bilong hem showaot klia start long taem wea hem wakem world kam kasem distaem. Olketa fit for luksavve hem God and for luksavve long paoa bilong hem wea stap for olowe. Dastawe olketa no garem eni excuse for no biliv long hem.”

Rome 1:20

“Ting raonem olketa samting hia and tingting strong long olketa mekem evriwan lukim wei wea iu gohed for kamap strongfala Christian.”

1 Timothy 4:15

“Iumi mas barava tingim narawan mekem iumi savve encouragem olketa for showimaot love and duim olketa gudfala samting. No misstim wei for hipap tugeta.”

Hebrew 10:24, 25

“Sapos eniwan long iufala hem needim wisdom, hem mas gohed askem God and bae hem kasem datwan, bikos God hem kaen tumas for givim samting long evriwan and bae hem no kros long man wea askem hem.”

James 1:5