Bihaen 4026 B.C.E.

“Datfala snek” kwestinim sapos Jehovah garem raet for rul and sapos hem rul long gudfala wei or nomoa. Jehovah promis for givim kam wanfala “seed” wea minim wanfala “pikinini,” wea bae smasem datfala snek. (Genesis 3:1-5, 15, footnote) Nomata olsem, Jehovah letem olketa man wea stap anda long paoa bilong datfala snek for rulim olketa seleva.

1943 B.C.E.

Jehovah talem Abraham disfala “pikinini” wea hem promis for sendem kam bae kam from laen bilong hem.—Genesis 22:18.

Bihaen 1070 B.C.E.

Jehovah talem King David and son bilong hem Solomon tu, datfala “pikinini” wea hem promis for sendem kam bae kam from laen bilong tufala.—2 Samuel 7:12, 16; 1 Kings 9:3-5; Isaiah 9:6, 7.

29 C.E.

Jehovah talemaot Jesus nao datfala “pikinini” wea hem promis for sendem kam and Jesus nao bae rul long throne bilong David. —Galatia 3:16; Luke 1:31-33; 3:21, 22.

 33 C.E.

Taem datfala snek, wea hem Satan, killim Jesus dae, hem “killim leg bilong [datfala pikinini].” Jehovah resurrectim Jesus and hem go bak long heven. Jehovah acceptim ransom, wea hem perfect laef bilong Jesus wea hem sakrifaesim. Diswan openem wei for Jehovah forgivim sin bilong olketa man, and olketa pikinini bilong Adam savve kasem laef olowe.—Genesis 3:15; Acts 2:32-36; 1 Corinth 15:21, 22.

Samting olsem 1914 C.E.

Jesus torowem snek, wea minim Satan, kam daon long earth, wea hem stap for lelebet taem.—Revelation 12:7-9, 12.

Future

Jesus putim Satan long prison for 1,000 year and then bae hem “smasem hed” bilong hem, wea minim bae hem killim hem dae. Then plan bilong Jehovah for earth and for olketa man bae kamap tru. Jehovah finisim evriwan wea spoelem nem bilong hem, and evriwan bae luksavve Jehovah nomoa garem raet for rul.—Revelation 20:1-3, 10; 21:3, 4.