LUKIM Moses hem ranawe from Egypt. Waswe, iu savve lukim olketa man wea ronem hem? Iu savve why nao olketa want for killim dae Moses?

Moses hem growap insaed long haos bilong Pharʹaoh, ruler bilong Egypt. Hem kamap wanfala man wea wise and garem paoa. Moses savve hem no man bilong Egypt, bat really dadi and mami bilong hem olketa Israelite slave.

Wanday, taem hem 40 year, Moses hem go for lukim hao nao pipol bilong hem stap. Samting wea kasem pipol bilong hem, hem nogud tumas. Hem lukim wanfala bilong Egypt hem whipim wanfala Israelite slave. Moses hem luk raon, and taem no eniwan lukluk, hem hitim disfala man bilong Egypt, and man hia hem dae. Then Moses haedem body bilong hem long sand.

Next day Moses go moa for lukim pipol bilong hem. Hem tingse hem savve helpem olketa mekem olketa no olsem slave moa. Bat hem lukim tufala Israelite man faet, so hem sei long datwan wea rong: ‘Why nao iu hitim brata bilong iu?’

Man hia hem sei: ‘Hu nao markem iu for kamap ruler and judge bilong mifala? Waswe, iu bae killim mi tu olsem iu killim dae datfala man bilong Egypt?’

Moses hem fraet nao. Hem savve hao pipol savve nao long samting wea hem duim long datfala man bilong Egypt. Pharʹaoh tu hem herem diswan, and hem sendem samfala man for killim dae Moses. Dastawe Moses mas ranawe from Egypt.

Taem Moses lusim Egypt, hem go long land bilong Midʹi·an wea datwan hem farawe. Hem meetim famili bilong Jethʹro long there, and hem maritim wanfala dota bilong hem, Zip·poʹrah. Moses kamap wanfala shepherd and lukaftarem olketa sheep bilong Jethʹro. For 40-fala year hem stap long land bilong Midʹi·an. So hem kasem 80 year nao. Then wanday, taem Moses hem lukaftarem sheep bilong Jethʹro, wanfala spesol samting hem happen wea changem full laef bilong Moses. Tanem page and bae iumi lukim samting wea happen.