LOT and famili bilong hem stap witim Abraham long land bilong Caʹnaan. Wanday Abraham sei long Lot: ‘No inaf land nao long hia for evri animal bilong iumi. Plis, iumi divaed. Sapos iu go long wanfala saed, then mi bae go long narasaed.’

Lot hem luk go long datfala land. Hem lukim naesfala ples wea garem wata and plande gudfala grass for olketa animal bilong hem. Hem nao Distrik bilong Jordan. So Lot muvim famili bilong hem and olketa animal long there. Gogo olketa go stap long bigfala taon bilong Sodʹom.

Pipol long Sodʹom nogud tumas. Diswan mekem Lot feel nogud, bikos hem wanfala gudfala man. God tu feel nogud. Gogo, God sendem tufala angel for warnim Lot abaotem hao hem bae finisim Sodʹom and narafala bigfala taon klosap, Go·morʹrah, from badfala fasin bilong olketa.

Olketa angel hia talem Lot: ‘Hariap! Tekem waef bilong iu and tufala dota bilong iu and go aot from hia!’ Lot and famili bilong hem delay lelebet for go, so olketa angel hia holem hand bilong olketa and leadim olketa go aot from datfala ples. Then wanfala angel hem sei: ‘Ran for sevem laef bilong iufala! No luk bak. Ran go long olketa hill, mekem iufala no dae.’

Lot and tufala dota bilong hem obey and ranawe from Sodʹom. Olketa nating stop, and olketa nating luk bak. Bat waef bilong Lot hem no obey. Bihaen olketa go aot lelebet from Sodʹom, hem stop and luk bak. Then waef bilong Lot kamap wanfala ston bilong salt. Waswe, iu savve lukim hem long disfala piksa?

Iumi savve lanem gudfala samting from diswan. Hem showaot hao God sevem olketa wea obeyim hem, bat olketa wea no obeyim hem bae lusim laef bilong olketa.