WASWE, iu savve long nem bilong man wea strong winim evri nara man? Hem Samson, wanfala judge. Jehovah nao givim strong long Samson. Taem hem no born yet, Jehovah talem mami bilong hem: ‘Klosap nao iu bae garem wanfala son. Hem bae lead for sevem Israel from olketa Phi·lisʹtine.’

Olketa Phi·lisʹtine olketa nogud pipol wea stap long Caʹnaan. Olketa garem plande man for faet, and olketa barava spoelem olketa Israelite. Wantaem, taem Samson go long ples wea olketa Phi·lisʹtine stap, wanfala big lion hem kamaot for meetim hem. Bat Samson hem killim dae datfala lion witim hand bilong hem nomoa. Hem killim dae plande handred nogud Phi·lisʹtine tu.

Then gogo, Samson hem lovem wanfala woman wea nem bilong hem De·liʹlah. Each leader bilong olketa Phi·lisʹtine promis for givim De·liʹlah 1,100 silver selen sapos hem talem olketa wanem nao mekem Samson hem strong tumas. De·liʹlah wantem evri selen hia. Hem no wanfala tru fren bilong Samson, or pipol bilong God. So hem gohed for askem Samson abaotem wanem nao mekem hem strong tumas olsem.

Gogo, De·liʹlah hem mekem Samson for talem wanem nao mekem hem strong. ‘Olketa nating katem hair bilong mi enitaem,’ hem sei. ‘Start kam long taem wea mi born, God chusim mi for kamap wanfala spesol servant bilong hem, wanfala Nazʹi·rite. Sapos eniwan katem hair bilong mi, mi bae lusim strong bilong mi nao.’

So, taem De·liʹlah savve long diswan, hem mekem Samson sleep long leg bilong hem. Then hem kolem wanfala man for kam and katem hair bilong Samson. Taem Samson hem wekap, evri strong bilong hem lus nao. So olketa Phi·lisʹtine kam and kasholem hem. Olketa tekaotem tufala eye bilong hem, and mekem hem slave bilong olketa.

Wanday, olketa Phi·lisʹtine garem wanfala big party for worshipim god bilong olketa, Dagon, and olketa aotem Samson from prison for olketa savve mekfani long hem. Bat long datfala taem, hair bilong Samson hem grow moa. Samson sei olsem long boy wea holem hand bilong hem for leadim hem: ‘Letem mi tasim olketa post bilong disfala building.’ Then Samson prea long Jehovah for strong, and hem holem tufala post. Hem singaot olsem: ‘Letem mi dae witim olketa Phi·lisʹtine.’ Samting olsem 3,000 Phi·lisʹtine nao stap long disfala party, and taem Samson hem pushim olketa post hia, building hem foldaon and killim dae evri nogud pipol hia.