DISWAN hem piksa bilong wanfala paradaes wea maet olsem datwan wea God showim long profet bilong hem Isaiah. Isaiah hem laef bihaen long taem bilong Joʹnah.

Paradaes hem minim “garden” or “park.” Waswe, diswan mekem iu tingim wanfala piksa wea iu lukim finis insaed disfala buk? Hem klosap luk olsem naesfala garden wea Jehovah mekem for Adam and Eve. Bat waswe, bae full earth kamap wanfala paradaes enitaem?

Jehovah talem profet bilong hem Isaiah for raet abaotem niufala paradaes wea bae kam for pipol bilong God. Hem sei: ‘Olketa wild dog and sheep bae stap tugeta long peace. Young buluka and baby lion bae kaikai tugeta, and olketa smol pikinini bae lukaftarem olketa. Poison snek bae no spoelem baby wea plei klosap long hem.’

Maet pipol sei: ‘Diswan hem hard tumas for happen. Earth hem garem trabol evritaem and diswan bae hard for finis.’ Bat tingim diswan: Wanem kaen hom nao God givim long Adam and Eve?

God putim Adam and Eve insaed wanfala paradaes. From olketa no obeyim God, olketa lusim datfala naes hom bilong olketa, kamap olo, and dae. God promis for givim olketa samting wea Adam and Eve lusim long pipol wea lovem hem.

Long niufala paradaes wea klosap for kam, no eni samting bae spoelem or finisim eniwan. Bae iumi garem bigfala peace. Evri pipol bae healthy and hapi. Hem bae olsem long firstaem, bifor Adam and Eve sin. Bat bihaen iumi bae lane abaotem hao God bae mekem diswan kamap.