LUKIM olketa pipol hia wea mekfani long disfala young man. Waswe, iu savve hu nao hem? Hem Jeremiah. Hem wanfala barava important profet bilong God.

No longtaem bihaen King Jo·siʹah start for finisim evribit olketa idol from datfala land, Jehovah talem Jeremiah for kamap profet bilong Hem. Bat, Jeremiah tingse hem young tumas for kamap wanfala profet. Bat Jehovah sei Hem bae helpem hem.

Jeremiah talem olketa Israelite for finis for duim nogud samting. Hem sei: ‘Olketa god wea pipol bilong olketa nation worshipim olketa giaman.’ Bat plande Israelite want for worshipim olketa idol winim wei for worshipim trufala God Jehovah. Taem Jeremiah talem pipol hao God bae panisim olketa from nogud fasin bilong olketa, olketa laf nomoa.

Plande year go pas. Jo·siʹah hem dae, and thrifala month bihaen, son bilong hem Je·hoiʹa·kim kamap king. Jeremiah gohed for talem olketa pipol: ‘Jerusalem bae finis sapos iufala no changem olketa nogud wei bilong iufala.’ Olketa priest kasholem Jeremiah and singaot: ‘Iu fit for dae from samting wea iu talem.’ Then olketa talem olketa prince bilong Israel: ‘Jeremiah mas dae, bikos hem talem samting againstim taon bilong iumi.’

Wanem nao Jeremiah bae duim? Hem nating fraet! Hem sei long olketa: ‘Jehovah talem mi for talem olketa samting hia long iufala. Sapos iufala no changem olketa nogud wei bilong iufala, Jehovah bae finisim Jerusalem evribit. Bat iufala mas savve long diswan: Sapos iufala killim mi dae, iufala killim dae man wea no duim eni rong samting.’

Olketa prince letem Jeremiah for stap laef, bat olketa Israelite no changem olketa nogud wei bilong olketa. Bihaen Neb·u·chad·nezʹzar, king bilong Babylon, kam and faet againstim Jerusalem. Gogo Neb·u·chad·nezʹzar mekem olketa Israelite kamap servant bilong hem. Hem tekem plande thousand long olketa go long Babylon. Bae hem nogud tumas sapos olketa stranger tekem iu go long difren kantri and keepim iu olsem prisoner, iaman?