KLOSAP tufala year go pas from taem wea olketa long Media and Persia tekovarem Babylon. And lukim samting wea happen distaem! Olketa Israelite lusim Babylon. Hao nao olketa go free? Hu nao letem olketa for go?

Cyʹrus, king bilong Persia nao duim diswan. Longfala taem bifor Cyʹrus hem born, Jehovah mekem profet bilong hem Isaiah for raet olsem abaotem hem: ‘Iu bae barava duim samting wea mi wantem iu for duim. Olketa gate bae open for iu go tekovarem datfala taon.’ Tru nao, olsem Isaiah talem, Cyʹrus nao hem lead for tekovarem Babylon. Olketa bilong Media and Persia kam insaed long datfala taon long naet thru long olketa gate wea open.

Bat profet bilong Jehovah, Isaiah, talem tu hao Cyʹrus bae givim komand for olketa buildim moa Jerusalem and temple bilong hem. Waswe, Cyʹrus givim datfala komand? Ia, hem duim olsem. Samting wea Cyʹrus talem long olketa Israelite hem olsem: ‘Go, distaem, long Jerusalem and buildim temple bilong God bilong iufala, Jehovah.’ Hem nao samting olketa Israelite hia go for duim.

Bat no evri Israelite long Babylon savve wakabaot go bak long Jerusalem. Hem longfala wakabaot bilong samting olsem 800 kilometer and plande long olketa olo or sik tumas for wakabaot farawe olsem. And olketa nara samting tu mekem samfala pipol no go. Bat Cyʹrus talem olketa wea no go: ‘Givim silver and gold and olketa nara present long pipol wea go bak for buildim moa Jerusalem and temple bilong hem.’

So, olketa givim plande present long olketa Israelite hia wea go bak long Jerusalem. And tu, Cyʹrus givim olketa dish and kap wea King Neb·u·chad·nezʹzar hem tekem from temple bilong Jehovah taem hem finisim Jerusalem. Olketa pipol garem plande samting for karem go bak.

Bihaen fofala month wea olketa wakabaot, olketa Israelite kasem Jerusalem long barava taem. Hem 70 year nao from taem wea datfala ples hem finis evribit, and no eniwan stap long there. Bat nomata olketa Israelite kam bak long kantri bilong olketa seleva, olketa bae kasem samfala hard taem, olsem iumi bae lukim.