LUKIM bigfala waka wea gohed long hia. Olketa Israelite busy for wakem wall bilong Jerusalem. Taem King Neb·u·chad·nezʹzar hem distroem Jerusalem 152 year bifor, hem brekem olketa wall and bonem olketa gate bilong datfala big taon. Olketa Israelite no stretawe wakem olketa wall moa taem olketa kam bak from Babylon.

Hao nao pipol hia feel taem olketa stap plande year long taon bilong olketa wea no garem eni wall? Olketa no feel sef. Hem isi for olketa enemy for kam and attakim olketa. Bat disfala man Ne·he·miʹah hem helpem olketa pipol for wakem moa olketa wall. Waswe, iu savve hu nao Ne·he·miʹah?

Ne·he·miʹah hem wanfala Israelite wea kam from taon bilong Shuʹshan, wea Morʹde·cai and Esther stap. Ne·he·miʹah hem waka insaed long haos bilong king, so maet hem gudfala fren bilong Morʹde·cai and Queen Esther. Bat Bible no sei Ne·he·miʹah hem waka for hasband bilong Esther, King A·has·u·eʹrus. Hem waka for nextfala king, King Ar·ta·xerxʹes.

Remember hao Ar·ta·xerxʹes hem datfala gud king wea givim Ezʹra bigfala selen for tekem go bak long Jerusalem for fixim temple bilong Jehovah. Bat Ezʹra no wakem wall bilong datfala taon wea pisis. Iumi laek savve wanem nao happen wea mekem Ne·he·miʹah duim disfala waka.

Thirtin year bihaen Ezra kasem selen from Ar·ta·xerxʹes for fixim temple, Ne·he·miʹah hem main wan wea servem wine bilong king and for mek sure no eniwan trae for poisonim king. Diswan hem barava important waka.

Wanday brata bilong Ne·he·miʹah, Ha·naʹni, and samfala nara man from land bilong Israel olketa kam for visitim Ne·he·miʹah. Olketa talem hem abaotem trabol wea kasem olketa Israelite, and hao wall bilong Jerusalem hem nogud yet. Diswan mekem Ne·he·miʹah feel sorre tumas, and hem prea long Jehovah abaotem diswan.

Wanday king lukim hao Ne·he·miʹah hem luk sorre, and hem ask: ‘Why nao iu luk sorre tumas?’ Ne·he·miʹah talem hem hao diswan hem from evri samting long Jerusalem hem nogud tumas and olketa wall pisis. King hem askem hem: ‘Wanem nao iu laekem?’

Ne·he·miʹah hem sei: ‘Letem mi go long Jerusalem, mekem mi savve wakem moa olketa wall.’ King Ar·ta·xerxʹes hem kaenfala man. Hem letem Ne·he·miʹah for go, and hem helpem hem for kasem timba for datfala waka. No longtaem bihaen Ne·he·miʹah kasem Jerusalem, hem talem olketa pipol abaotem plan bilong hem. Olketa laekem idea bilong hem and sei: ‘Iumi start for wakem nao.’

Taem olketa enemy bilong olketa Israelite lukim wall wea olketa start for wakem, olketa sei: ‘Iumi bae go and killim olketa dae, and stopem datfala waka.’ Bat Ne·he·miʹah hem herem diswan, and hem givim sword and spia long olketa wakman. And hem sei: ‘No fraet long olketa enemy bilong iumi. Faet for olketa brata bilong iu, for olketa pikinini bilong iu, for waef bilong iu, and haos bilong iu.’

Olketa pipol nating fraet. Long day and naet, olketa redi witim olketa samting bilong olketa for faet, and olketa gohed for waka. So insaed long 52 day nomoa, olketa wall hem finis nao. Olketa pipol feel sef insaed long datfala taon. Ne·he·miʹah and Ezʹra teachim pipol abaotem olketa law bilong God, and olketa pipol hapi.

Bat nomata olsem, evri samting no olsem bifor olketa Israelite kamap prisoner long Babylon. King bilong Persia rulim olketa pipol and olketa mas servem hem. Bat Jehovah hem promis for sendem wanfala niu king, and disfala king bae mekem pipol stap long peace. Hu nao disfala king? Hao nao hem bae mekem peace kamap long earth? Samting olsem 450 year go pas bifor eni samting hem showaot klia abaotem diswan. Then wanfala barava important baby hem born. Bat datwan hem narafala story moa.