WASWE, iu savve lukim braet star wea wanfala long olketa man hia hem point go long hem? Taem olketa lusim Jerusalem, datfala star hem showaot. Olketa man hia from East, and olketa studyim olketa star. Olketa bilivim hao disfala niu star hem leadim olketa go long wanfala man wea important tumas.

Taem olketa man hia kasem Jerusalem, olketa ask olsem: ‘Wea nao pikinini wea hem bae king bilong olketa Jew?’ “Olketa Jew” hem narafala nem for olketa Israelite. Olketa sei moa: ‘Taem mifala stap long East, mifala lukim star bilong datfala pikinini and mifala kam for worshipim hem.’

Taem Herod, wea hem king long Jerusalem, hem herem diswan, hem kros fogud. Hem no wantem narafala king for changem hem. So hem kolem olketa chief priest and ask olsem: ‘Wea nao disfala king wea God promis for givim bae born?’ Olketa sei: ‘Bible hem sei long Bethʹle·hem.’

So Herod kolem kam olketa man from East, and sei: ‘Go and lukaotem pikinini hia. Taem iufala faendem hem, kam talem mi. Mi want for go and worshipim hem tu.’ Bat really, Herod want for faendem pikinini hia for killim hem dae!

Then star hia hem muv go long Bethʹle·hem, and hem stop long ples wea pikinini hem stap. Taem olketa man go insaed long haos, olketa faendem Mary and smol Jesus. Olketa givim olketa present long Jesus. Bat bihaen, Jehovah warnim olketa man long wanfala dream for no go bak long Herod. So olketa go bak long hom bilong olketa followim narafala road.

Taem Herod herem olketa man from East hia olketa go bak long hom bilong olketa, hem kros fogud. So hem givim komand for killim dae evri boy long Bethʹle·hem wea no kasem tu year. Bat Jehovah warnim Joseph long wanfala dream, and Joseph tekem famili bilong hem go long Egypt. Bihaen, taem Joseph hem herem hao Herod hem dae, hem tekem Mary and Jesus go bak hom long Nazʹa·reth. Hem nao ples wea Jesus growap.

Long tingting bilong iu, hu nao mekem star hia for shaen? Remember hao olketa man hia olketa go firstaem long Jerusalem bihaen olketa lukim datfala star. Satan want for killim dae Son bilong God, and hem savve King Herod bilong Jerusalem bae trae for killim hem dae. So masbi Satan nao man wea mekem datfala star hem shaen.