LUKIM disfala young boy wea toktok long olketa bigman hia. Olketa hia teacher insaed long temple bilong God long Jerusalem. And boy hia hem Jesus. Hem big lelebet nao. Distaem hem 12 year.

Olketa teacher sapraes tumas from Jesus hem savve long plande samting abaotem God and Bible. Bat why nao Joseph and Mary no stap tu long hia? Olketa long wea nao?

Evri year Joseph tekem famili bilong hem long Jerusalem for spesol celebration wea olketa kolem Passover. Hem longfala wakabaot from Nazʹa·reth go kasem Jerusalem. No eniwan garem trak. Olketa no garem olketa samting olsem long datfala taem. Plande pipol wakabaot, and olketa mas wakabaot for thrifala day for kasem Jerusalem.

Distaem Joseph garem bigfala famili. So hem mas lukaftarem tu nara young brata and sista bilong Jesus. Long disfala year, Joseph and Mary start for go bak hom long Nazʹa·reth. Tufala tingse Jesus hem witim nara pipol wea olketa gogo tugeta. Bat taem olketa stop long evening, olketa no savve faendem Jesus. Olketa lukaotem hem long olketa wantok and fren bilong olketa, bat hem no stap witim olketa! So tufala go bak long Jerusalem for lukaotem hem long there.

Gogo olketa faendem Jesus long hia witim olketa teacher. Hem gohed for lisin long olketa and askem olketa kwestin. And evriwan sapraes long savve bilong Jesus. Bat Mary hem sei: ‘Son, why nao iu duim diswan long mifala? Mi and dadi bilong iu wari tumas taem mifala trae for faendem iu.’

Jesus hem sei: ‘Why nao iufala lukaotem mi? Waswe, iufala no savve mi mas stap long haos bilong Dadi bilong mi?’

Tru nao, Jesus hem laekem tumas for stap long ples wea hem savve lane abaotem God. Iumi shud garem sem feeling tu, iaman? Long Nazʹa·reth, Jesus savve go long olketa meeting for worship evri week. From hem lisin gud evritaem, hem lanem plande samting from Bible. Iumi laek for followim example bilong Jesus.