1. From iu lanem finis staka samting long Bible, wanem kwestin nao maet iu garem?

KAM kasem distaem iu lanem finis staka samting long Bible insaed long disfala buk. Iu lanem promis bilong God for iumi laef olowe long future, samting wea happen long man bihaen hem dae, and olketa wea dae finis bae laef bak. (Eklesiastes 9:5; Luke 23:43; John 5:28, 29; Revelation 21:3, 4) Maet iu kakam finis long olketa meeting  bilong Olketa Jehovah’s Witness and iu luksavve olketa nao worshipim God long stretfala wei. (John 13:35) Maet iu start for savve gud long Jehovah and iu disaed nao for worshipim hem. So maet iu ting olsem, ‘Wanem moa mi shud duim for worshipim God?’

2. Wanem nao mekem wanfala man bilong Ethiopia for laek baptaes?

² Wanfala man bilong Ethiopia wea stap long first century tu mas disaedem sem samting. Philip wea hem wanfala disaepol bilong Jesus, hem nao preach long disfala man no longtaem bihaen Jesus laef bak. Hem pruvim long disfala man, Jesus nao datfala Messiah. Datfala man bilong Ethiopia barava tinghae long wanem hem lanem and hem sei: “Lukim! Wata nao long there. Hao, hem fitim mi for baptaes distaem?”—Acts 8:26-36.

3. (a) Wanem komand nao Jesus talem long olketa disaepol? (b) Wanem nao stretfala wei for baptaesim man?

³ Bible sei sapos iu laek for worshipim Jehovah, iu mas baptaes. Jesus sei olsem long olketa disaepol: “Teachim pipol long evri kantri for kamap disaepol bilong mi” and “baptaesim olketa.” (Matthew 28:19) Jesus tu hem baptaes. Hem nao showim stretfala wei for baptaes. Olketa no kapsaetem lelebet wata nomoa antap long hed bilong hem, bat full body bilong hem nao go insaed long wata taem hem baptaes. (Matthew 3:16) Distaem tu, taem wanfala Christian baptaes, full body nao mas go insaed long wata.

4. Taem iu baptaes, datwan showimaot wanem samting?

 ⁴ Taem iu baptaes, datwan showimaot iu barava laek for fren witim God and worshipim hem. (Sams 40:7, 8) So maet iu ting olsem, ‘Wanem nao mi mas duim for mi baptaes?’

5. (a) Wanem nao iu mas duim bifor iu fit for baptaes? (b) Why nao hem important for iu go long olketa meeting?

⁵ Bifor iu fit for baptaes, iu mas lane abaotem Jehovah and Jesus. Datwan nao samting wea iu gohed for duim start taem iu studyim Bible. (Readim John 17:3.) Nomata olsem, iu mas duim nara samting tu. Bible sei iu mas garem “stretfala savve” abaotem wanem Jehovah laekem. (Colossae 1:9) Iu savve lanem staka samting long olketa meeting bilong Olketa Jehovah’s Witness, wea savve helpem iu for fren gud witim Jehovah. Dastawe, hem important for iu go evritaem long olketa meeting hia.—Hebrew 10:24, 25.

6. Waswe, iu mas savve long evri samting insaed Bible bifor iu fit for baptaes? Explainim.

⁶ Jehovah no expectim iu for savve long evri samting insaed long Bible bifor iu baptaes. Datfala man long Ethiopia tu no savve long evri samting insaed olketa Holy Raeting bifor hem baptaes. (Acts 8:30, 31) And from iumi bae laef olowe, bae iumi gohed for lane abaotem God for olowe tu. (Ecclesiastes 3:11, NW) Bat bifor iu baptaes iu mas savve long olketa main teaching  insaed Bible and acceptim olketa teaching hia.—Hebrew 5:12.

7. Taem iu studyim Bible, hao nao datwan helpem iu?

⁷ Bible sei: “Man wea no garem faith no savve mekem God hapi.” (Hebrew 11:6) So iu mas garem faith bifor iu savve baptaes. Bible storyim samfala pipol long Corinth bifor herem wanem olketa disaepol bilong Jesus teachim, and datwan mekem “olketa biliv and baptaes.” (Acts 18:8) From iu studyim Bible, iu tu garem faith long olketa promis bilong God and long sakrifaes bilong Jesus, wea savve sevem iumi from sin and dae.—Josua 23:14; Acts 4:12; 2 Timothy 3:16, 17.

8. Wanem nao bae mekem iu for laek storyim wanem iu lanem long Bible?

⁸ Taem iu gohed for studyim Bible and lukim wei wea hem helpem iu long laef bilong iu, datwan bae strongim go moa faith bilong iu. Bae iu laek for storyim long olketa narawan wanem iu lanem long Bible. (Jeremaea 20:9; 2 Corinth 4:13) Hu nao olketa narawan wea iu savve story long olketa?

9, 10. (a) Hu nao samfala wea maet iu laek for storyim wanem iu lanem long Bible long olketa? (b) Sapos iu laek for preach witim kongregeson, wanem nao iu mas duim?

⁹ Maet iu laek for storyim truth wea iu lanem long Bible long olketa insaed famili, olketa fren, olketa neiba, and olketa wea iu waka witim. Hem gud for duim olsem, bat iu mas kaen  and showimaot love taem iu story long olketa. Gogo bae iu savve joinim kongregeson for duim preaching waka. Taem iu laek for duim datwan, hem gud for iu talem long Witness wea study witim iu. Sapos hem luksavve iu fit, and iu followim olketa standard long Bible long laef bilong iu, then tufala elder long kongregeson bae story witim iutufala.

¹⁰ Wanem nao bae iufala storyim? Tufala elder hia bae story witim iu for lukim sapos iu minim and bilivim olketa main teaching long Bible, sapos iu followim wanem iu lanem long laef bilong iu, and wanem nao mekem iu laek for kamap wanfala Jehovah’s Witness. No fraet for story witim olketa elder bikos olketa nao lukaftarem evriwan insaed kongregeson, and iu tu wanfala long olketa. (Acts 20:28; 1 Peter 5:2, 3) Bihaen iufala story, olketa elder bae letem iu savve sapos iu fit for preach witim kongregeson.

11. Why nao hem important for changem wei bilong iu bifor iu savve preach witim kongregeson?

¹¹ Maet tufala elder storyim samfala samting moa wea iu need for changem long laef bilong iu bifor iu savve preach witim kongregeson. Why nao hem barava important for iu duim diswan? Bikos taem iumi duim preaching waka, iumi stand for Jehovah and evri samting wea iumi duim long laef bilong iumi mas mekhae long Jehovah.—1 Corinth 6:9, 10; Galatia 5:19-21.

12. Wanem nao hem minim for repent, and why nao iumi evriwan mas repent?

¹² Iu mas duim nara samting tu bifor iu fit for baptaes. Aposol Peter sei: “Iufala mas repent and tan raon, mekem Jehovah savve forgivim olketa sin bilong iufala.” (Acts 3:19, footnote) Wanem nao hem minim for repent? Hem minim for barava sorre and feel nogud long olketa rong samting wea iumi duim. Olsem example, sapos wanfala man or woman hem duim olketa rabis samting saed long sex, hem mas repent. Bat maet iu no duim olketa nogud samting olsem. Nomata olsem, iu mas repent tu bikos iumi evriwan sin and iumi mas askem God for forgivim iumi.—Rome 3:23; 5:12.

13. Wanem nao hem minim for “tan raon”?

¹³ Waswe, for man hem repent hem inaf? Nomoa. Iumi mas duim nara samting moa. Peter hem sei iumi mas “tan raon.” Diswan minim iu mas lusim eni nogud samting wea iu duim and start for duim stret samting. For minim diswan, tingim disfala example: Hem firstaem bilong iu for wakabaot followim wanfala road. Gogo, iu luksavve iu go followim rong road. Wanem nao bae iu duim? Bae iu stop, then iu tan raon, and iu go followim stretfala road. Hem olsem tu taem iu studyim Bible. Maet iu luksavve samfala wei bilong iu and samfala samting wea iu duim hem no fitim wanem Bible talem. Iu mas willing for  “tan raon,” wea datwan minim iu mas willing for changem olketa nogud wei hia, and then iu start for duim stret samting.

14. Taem iu dedicate long God, hao nao iu duim datwan?

¹⁴ Nara important samting wea iu mas duim bifor iu baptaes hem for dedicate long Jehovah. Iu duim datwan taem iu prea and mekem promis long Jehovah for worshipim hem nomoa. And tu, long datfala prea, iu talem hem main samting long laef bilong iu nao hem for duim wanem hem laekem.—Diutronomi 6:15.

15, 16. Wanem nao mekem iu disaed for dedicate long God?

¹⁵ Taem iu promis long Jehovah for worshipim hem nomoa, hem olsem taem iu mekem promis for stap olowe witim samwan wea iu lovem. Tingim taem wanfala boy and gele tufala fren. Taem datfala boy start for savve gud long gele hia, gogo hem lovem datfala gele and laek for maritim hem. Nomata diswan hem wanfala serious disison, boy hia bae willing for acceptim datfala responsibility bikos hem lovem datfala gele.

¹⁶ Taem iu gohed for lane abaotem Jehovah, bae iu lovem hem and laek for duim best bilong iu for worshipim hem. Datwan nao bae mekem iu laek for talem datfala prea wea iu mekem promis for worshipim hem. Bible sei eniwan wea laek for followim Jesus mas “givim laef bilong hem for God.” (Mark 8:34) Wanem nao  datwan minim? Hem minim wei for obeyim Jehovah nao hem important winim eni nara samting. Wanem Jehovah laekem nao hem important winim samting wea iumiseleva laekem and olketa goal bilong iumi.—Readim 1 Peter 4:2.

17. Why nao samfala pipol hol bak for dedicate long Jehovah?

¹⁷ Samfala pipol hol bak for dedicate long Jehovah bikos olketa fraet nogud nao olketa no keepim promis wea olketa mekem for worshipim hem. Olketa tingse nogud nao olketa duim eni samting wea bae mekem Jehovah feel sorre. Or olketa tingse sapos olketa no dedicate long hem, then bae hem no judgem olketa for eni rong samting wea olketa duim.

18. Wanem nao bae helpem iu for no hol bak for dedicate long Jehovah?

¹⁸ Taem iu lovem Jehovah, datwan bae helpem iu for no hol bak for dedicate long hem. From iu lovem hem bae iu duim best bilong iu for keepim promis wea iu mekem for worshipim hem. (Eklesiastes 5:4; Colossae 1:10) Bae iu tingim hem no hard nomoa for duim wanem Jehovah laekem. Aposol John sei: “Samting wea showimaot iumi lovem God, hem taem iumi obeyim olketa law bilong hem, and olketa law bilong hem no hard tumas for obeyim.”—1 John 5:3.

19. Why nao iu shud no hol bak for dedicate long Jehovah?

¹⁹ No tingse iu mas perfect long evri samting  wea iu duim bifor iu dedicate long Jehovah. Hem no expectim iumi for duim wanem iumi no fit for duim. (Sams 103:14) Hem bae helpem iu for duim stret samting. (Aesaea 41:10) Trustim Jehovah long full heart bilong iu, and “bae hemi stretem rod blong yu.”—Provebs 3:5, 6.

20. Bihaen iu dedicate long God, wanem nao nara samting wea iu mas duim?

²⁰ Waswe, iu dedicate finis long Jehovah? Bihaen iu dedicate long Jehovah, nara samting wea iu mas duim nao hem for iu baptaes.

21, 22. For ‘talemaot faith’ bilong iu front long evriwan, hao nao iu duim datwan?

²¹ Hem gud for iu story witim chairman bilong olketa elder long kongregeson and talem hem iu dedicate finis long Jehovah and iu laek for baptaes. Then bae hem mekem arrangement witim samfala elder for reviewim olketa kwestin abaotem olketa main teaching long Bible witim iu. Sapos olketa luksavve iu fit for baptaes, bae olketa talem iu for baptaes long assembly or convention bilong Olketa Jehovah’s Witness wea bae kamap. Bae iu herem wanfala tok long datfala assembly wea hem abaotem wanem hem minim for baptaes. Brata wea givim datfala tok bae askem tufala kwestin long olketa wea redi for baptaes. Taem iu ansarem tufala kwestin hia  iu ‘talemaot faith’ bilong iu front long evriwan.—Rome 10:10.

²² Bihaen datwan, bae iu baptaes nao. Taem iu baptaes, bae olketa putim full body bilong iu go insaed long wata. Datwan showimaot long evriwan iu dedicate long Jehovah and iu kamap wanfala Jehovah’s Witness.

23. Wanem nao hem minim for baptaes “long nem bilong Dadi and bilong Son and bilong holy spirit”?

²³ Jesus sei olketa disaepol bilong hem bae baptaes “long nem bilong Dadi and bilong Son  and bilong holy spirit.” (Readim Matthew 28:19.) Wanem nao datwan minim? Hem minim iu luksavve long position and paoa bilong Jehovah, important waka wea Jesus duim insaed plan bilong God, and hao God iusim holy spirit for duim wanem hem laekem.—Sams 83:18; Matthew 28:18; Galatia 5:22, 23; 2 Peter 1:21.

24, 25. (a) For baptaes hem stand for wanem samting? (b) Wanem nao bae iumi storyim long last chapter?

²⁴ For baptaes hem stand for barava important samting. Taem olketa putim full body bilong iu insaed long wata, datwan showimaot iu lusim oldfala laef bilong iu, wea hem olsem iu dae from datfala laef. Taem iu kamaot from wata, datwan showimaot iu startim niu laef for duim wanem Jehovah laekem, and bae iu worshipim hem nomoa. Tingim diswan: Iu no dedicate long eni man, wanfala organization, or eni waka, bat iu dedicate long Jehovah.

²⁵ Taem iu dedicate long Jehovah datwan bae helpem iu for fren gud witim hem. (Sams 25:14) Taem man baptaes datwan no minim hem bae sev nao. Aposol Paul sei: “Iufala fraet and seksek taem iufala gohed traem best bilong iufala for kasem laef.” (Philippi 2:12) Taem iu baptaes, iu just start nao for wakabaot followim road for kasem laef. Bat wanem nao iu savve duim for gohed fren gud witim Jehovah? Bae iu kasem ansa for datfala kwestin long last chapter bilong disfala buk.