1, 2. Hu nao samfala man wea Jehovah fren witim olketa?

OLKETA wanem kaen fren nao iu laek for garem? Maet iu laek for fren witim samwan wea iu laekem wei bilong hem and hem tu laekem olketa wei bilong iu. Maet hem samwan wea kaen and iu tinghae long hem.

² Jehovah hem fren witim samfala man tu. Olsem example, wanfala man wea Jehovah fren witim nao hem Abraham. (Aesaea 41:8; James 2:23) Jehovah laekem tu wei bilong David. Hem sei David hem man wea ‘barava wan mind witim hem.’ (Acts 13:22) And Jehovah sei hem ‘lavem tumas’ profet Daniel.—Daniel 9:23.

3. Hao nao gogo Abraham, David, and Daniel fren witim Jehovah?

³ Hao nao gogo Abraham, David, and Daniel fren witim Jehovah? Jehovah sei long Abraham: “Yu bin obeim . . . toktok blong mi.” (Jenesis 22:18) So Jehovah hem fren witim olketa wea hapi for obeyim hem. Wanfala full nation tu savve fren witim hem. Jehovah sei long nation bilong Israel: “Sapos yufala lisin kam gudfala long mi, an sapos yufala obeim evrisamting mi gohed fo talem yufala, bae mi God blong yufala an yufala i pipol blong mi.” (Jeremaea 7:23) So sapos iu laek for fren witim Jehovah, iu mas obeyim hem tu.

4, 5. Wanem nao Jehovah duim for protectim olketa fren bilong hem?

⁴ Bible sei Jehovah lukaotem chance for “strongim olketa pipol hu i tinghevi fo obeim hem.” (Mektu Kronikols 16:9) Long Sams 32:8, Jehovah promisim olketa fren bilong hem olsem: “Bae mi tisim yu olketa stretfala wei fo yu falom. An bae mi gohed fo givim gudfala tingting long yu, an mi gohed fo lukaftarem yu.”

⁵ Wanfala enemy wea strong tumas hem no laekem iumi for fren witim Jehovah. Bat Jehovah bae protectim iumi. (Readim Sams 55:22) For fren witim hem, iumi mas worshipim hem long full heart bilong iumi. Iumi gohed faithful long hem nomata long taem wea iumi kasem hard taem. Iumi tu savve trustim Jehovah olsem man wea raetem psalm, wea hem sei: “From [Jehovah] stap long raet saed bilong mi, mi bae no fraet.” (Psalm 16:8; 63:8, NW) Wanem nao Satan duim for trae stopem iumi for no fren witim God?

6. Wanem nao Satan talem abaotem iumi olketa man?

⁶ Long Chapter 11, iumi lanem Satan hem sei Jehovah hem laea and spoelem Adam and Eve taem hem no letem tufala for disaedem seleva samting wea stret and samting wea no stret. Bible buk Job storyim Satan tok spoelem tu iumi olketa man wea laek for fren witim God. Satan  sei olketa man worshipim God nomoa bikos Hem givim gud samting long olketa, and no bikos olketa lovem hem. Satan sei hem savve switim eniwan for againstim God tu. Distaem bae iumi story abaotem wanem iumi savve lanem from example bilong Job, and wanem Jehovah duim for protectim hem.

7, 8. (a) Wanem nao Jehovah talem abaotem Job? (b) Wanem nao Satan talem abaotem Job?

⁷ Hu nao Job? Hem wanfala gudfala man wea stap samting olsem 3,600 year go finis. Jehovah sei no eni nara man wea stap long datfala taem hem olsem Job. Job barava tinghae long God, and hem heitim nogud samting. (Job 1:8) Tru nao, Job hem barava fren gud witim Jehovah.

⁸ Satan sei Job worshipim God nomoa bikos hem kasem olketa gudfala samting from God. Satan sei olsem long Jehovah: “Olowe nao, yu gohed fo lukaftarem [Job] wetem olketa pikinini blong hem an evrisamting wea hemi onam, an yu gohed fo gadem olketa. Yu blesim waka blong hem, an disfala eria wea hemi stap hemi fulap nao long olketa animol wea yu givim long hem. Bat sapos yu tekemaot evrisamting ya from hem, bae hemi tokspoelem yu nogud long ae blong yu ya.”—Job 1:10, 11.

9. Wanem nao Jehovah letem Satan for duim?

⁹ Satan sei Job worshipim Jehovah nomoa bikos Jehovah givim olketa gud samting long hem. Satan sei tu hem savve mekem Job stop for  worshipim Jehovah. Jehovah no bilivim datwan so Hem letem Satan for testim Job for pruvim sapos Job fren witim Jehovah bikos hem lovem Hem.

10. Wanem nao Satan duim for attakim Job, and wanem nao Job duim?

¹⁰ First samting, Satan stealim and killim dae evri animal bilong Job. Then hem killim dae klosap evri wakaman bilong Job. Job lusim evri samting wea hem ownim. Then Satan iusim wanfala big wind for killim dae tenfala pikinini bilong Job. Bat Job gohed faithful long Jehovah. Bible sei: “Nomata evri trabol ya i kasem Job olsem, bat hemi no sin an hemi nating talem dat God hemi duim eni nogud samting.”—Job 1:12-19, 22.

11. (a) Wanem moa nara samting wea Satan duim long Job? (b) Wanem nao Job duim?

¹¹ Satan no givap. Hem sei long God: “Sapos yu go spoelem bodi blong hem, bae hemi tokspoelem yu nogud long ae blong yu ya.” So Satan mekem Job kasem barava nogud sik wea mekem hem safa tumas. (Job 2:5, 7) Nomata olsem, Job gohed for faithful long Jehovah. Hem sei: “Go kasem taem mi dae, mi bae gohed faithful!”—Job 27:5, NW.

12. Hao nao Job showimaot evri samting wea Satan talem hem no tru?

¹² Job nating savve Satan tok spoelem hem, and why hem kasem olketa barava nogud samting hia. Hem tingse Jehovah nao mekem olketa nogud  samting hia for kasem hem. (Job 6:4; 16:11-14) Nomata olsem, Job gohed faithful long Jehovah. So datwan pruvim Job no worshipim God bikos God givim olketa gudfala samting long hem, bat hem fren witim God bikos hem lovem hem. Evri samting wea Satan talem abaotem Job hem no tru!

13. Wanem gud samting nao Job kasem from hem faithful long Jehovah?

¹³ Nomata Job no savve wanem hem gohed long heven, hem faithful long God and pruvim Satan hem barava nogud man. Jehovah blessim fren bilong hem Job bikos hem faithful.—Job 42:12-17.

14, 15. Wanem nao Satan talem abaotem iumi evriwan?

¹⁴ Iumi savve lanem olketa important samting from story bilong Job. Satan sei iumi tu worshipim Jehovah bikos iumi laekem hem for blessim iumi. Long Job 2:4, Satan sei: “Man save lusim evrisamting blong hem fo mekem hem seleva i laef.” So Satan no tok spoelem Job nomoa, bat hem tok spoelem iumi evriwan tu. Staka handred year bihaen Job dae, Satan gohed yet for tok spoelem Jehovah and olketa wea worshipim hem. Dastawe Jehovah sei long Provebs 27:11: “Pikinini blong mi, sapos yu kamap waes, bae mi hapi, an bae mi save ansarem eniwan [“man,” NW] hu hemi tokspoelem mi.”

¹⁵ Taem iu disaed for fren witim Jehovah, obeyim hem, and faithful long hem, iu pruvim Satan hem man for laea. Nomata sapos iu mas mekem samfala big change long laef bilong iu for  fren witim God, datwan hem barava best disison! Disfala disison hem barava important. Satan sei bae iu no faithful long God taem iu kasem hard taem. Hem trae for trikim iumi for duim samting wea showimaot iumi no faithful long God. Wanem nao hem duim?

16. (a) Wanem nao samfala difren wei wea Satan iusim for trae stopem iumi for no worshipim Jehovah? (b) Wanem nao samfala samting wea iuseleva tingse maet Satan iusim for stopem iu for no worshipim Jehovah?

¹⁶ Satan iusim staka difren wei for trae mekem iumi stop for fren witim God. Hem attakim iumi olsem “wanfala lion wea singaot big and hem laekem tumas for kaikaim eniwan.” (1 Peter 5:8) No sapraes sapos olketa fren, famili, or olketa narawan trae for stopem iu for studyim Bible wea diswan hem stret samting for iu duim. Maet iu tingse Satan nao bihaenem olketa for againstim iu. * (John 15:19, 20) Satan savve changem hemseleva tu for “act olsem wanfala angel wea givim laet.” So maet bae hem trae for trikim iumi for no obeyim Jehovah. (2 Corinth 11:14) Narafala wei wea Satan iusim for stopem iumi for worshipim Jehovah hem for mekem iumi ting daonem iumiseleva and tingse God bae no acceptim iumi.—Proverbs 24:10, NW.

17. Wanem nao mekem iumi hapi for obeyim Jehovah?

¹⁷ Taem iumi obeyim Jehovah, iumi pruvim Satan hem man for laea. Wanem nao savve helpem iumi for obeyim Jehovah? Bible sei: “Iu mas lovem God bilong iu Jehovah long full heart bilong iu, long full soul bilong iu, long full mind bilong iu, and long full strong bilong iu.” (Mark 12:30) Iumi obeyim Jehovah bikos iumi lovem hem. Taem iumi strongim love bilong iumi for Jehovah, bae iumi hapi for duim eni samting wea hem askem iumi for duim. Aposol John sei: “Samting wea showimaot iumi lovem God, hem taem iumi obeyim olketa law bilong hem, and olketa law bilong hem no hard tumas for obeyim.”—1 John 5:3.

18, 19. (a) Wanem nao samfala samting wea Jehovah sei hem rong? (b) Hao nao iumi savve hard for Jehovah askem iumi for duim eni samting wea iumi no fit for duim?

 ¹⁸ Bat iumi laek for savve, wanem nao samfala samting wea Jehovah sei hem rong? Samfala example stap long box wea garem title, “ Heitim Samting wea Jehovah Heitim.” Long bifor, maet iu tingse samfala long olketa samting hia hem olraet nomoa. Bat taem iu readim olketa scripture wea join witim olketa example hia, and iu ting raonem gud, bae iu luksavve wise samting for duim nao hem for obeyim olketa law bilong Jehovah. Maet iu luksavve iu mas changem tu samfala samting long laef bilong iu. Nomata maet diswan hem no isi, sapos iu duim olsem, bae iu hapi and garem  peace bikos iu wanfala fren bilong God wea faithful. (Aesaea 48:17, 18) Waswe, iumi fit for mekem olketa change hia long laef bilong iumi?

¹⁹ Hard for Jehovah askem iumi for duim eni samting wea iumi no fit for duim. (Diutronomi 30:11-14) From Jehovah hem gudfala Fren bilong iumi, hem savve gud long iumi. Hem savve wanem iumi fit for duim and olketa wik point bilong iumi. (Sams 103:14) Aposol Paul encouragem iumi olsem: “God hem keepim olketa promis bilong hem and hem bae no letem samting for switim iufala wea iufala no fit for winim. Bae hem helpem iufala for winim datwan mekem iufala no givap.” (1 Corinth 10:13) Iumi barava sure Jehovah bae evritaem helpem iumi for duim stret samting. Hem bae givim iumi “strong wea winim strong bilong man” for helpem iumi gohed faithful taem iumi kasem hard samting. (2 Corinth 4:7) Taem Paul luksavve Jehovah helpem hem long olketa hard taem wea kasem hem, hem sei: “Paoa wea mi kasem from God nao hem strongim mi for gohed.”—Philippi 4:13.

20. Wanem nao samfala wei bilong Jehovah wea iu shud followim, and why nao olsem?

²⁰ Sapos iumi laek for fren witim Jehovah, iumi mas no duim olketa samting wea Jehovah sei hem rong, bat iumi mas duim samting wea stret. (Rome 12:9) Man wea fren witim God bae duim olketa  samting wea mekem God hapi. Samfala long olketa samting hia stap long Sams 15:1-5 (Readim.) Man wea fren witim Jehovah bae followim olketa wei bilong hem. Bae hem waka hard for garem ‘love, hapi, peace, patient, kaen long narawan, duim gudfala samting, garem faith, hambol, and kontrolem seleva.’—Galatia 5:22, 23.

21. Wanem nao iu savve duim for followim olketa wei bilong God?

²¹ Wanem nao iu savve duim for garem olketa nambawan wei hia? Iu mas readim and studyim Bible evritaem mekem iu savve long olketa samting wea God hapi long hem. (Isaiah 30:20, 21, NW) Diswan bae strongim love bilong iu for Jehovah, and datwan bae mekem iu laek for obeyim hem.

22. Wanem gud samting nao bae iu kasem sapos iu obeyim Jehovah?

²² For mekem olketa change long laef bilong iu hem olsem for aotem dirty kaleko and werem klin kaleko. Bible sei: “Iufala mas lusim old wei bilong iufala and iufala mas garem niufala wei.” (Colossae 3:9, 10) Nomata maet hem no isi, taem iumi obeyim Jehovah and mekem olketa change hia, hem promis for givim iumi “bigfala reward.” (Psalm 19:11, NW) So disaed for obeyim Jehovah and pruvim Satan hem man for laea. Worshipim Jehovah no bikos iu laek kasem reward long future, bat bikos iu lovem hem. Taem iu duim olsem, bae iu fren gud witim God!