1, 2. Wea nao sef ples wea iumi savve go haed long hem for kasem protection?

TINGIM diswan: Wanday iu wakabaot followim road and iu lukim skae hem start for dark. Then iu lukim laetning and thunder hem gohed bosta. Seknomoa hem start for rain big nao. Iu ran and lukaotem ples for haed. Iu hapi tumas taem iu faendem sef ples for haed wea savve protectim iu from rain.

² Distaem, iumi tu stap long wanfala taem wea evri samting hem nogud. Evri samting long world hem kamap worse. Maet iu ting olsem, ‘Wea nao sef ples wea mi savve go haed long hem for kasem protection? Man wea raetem psalm hem sei: “Yu nao yu God blong mi wea mi trastem. Yu nao yu lukaftarem mi, an yu gadem mi.” (Sams 91:1, 2) Tru nao, Jehovah savve helpem iumi for deal witim olketa problem wea iumi kasem distaem, and hem givim iumi nambawan hope for future.

3. Wanem nao Jehovah savve duim for protectim iumi?

³ Wanem nao Jehovah savve duim for protectim iumi? Hem savve helpem iumi for deal witim eni problem wea kasem iumi. And tu, hem garem bigfala paoa winim eniwan wea maet laek for spoelem iumi. Nomata eni nogud samting hem happen long iumi distaem, iumi barava sure Jehovah bae stretem datwan long future. Bible encouragem iumi for  duim olketa samting wea bae mekem God gohed for lovem iumi. (Jude 21) For Jehovah hem helpem iumi long olketa hard taem bilong iumi, iumi mas fren gud witim hem. Bat hao nao bae iumi duim datwan?

4, 5. Wanem nao samfala samting wea Jehovah duim wea showimaot hem lovem iumi?

⁴ Taem iumi tingim bigfala love wea Jehovah showimaot long iumi, datwan bae helpem iumi for fren gud witim hem. Tingim evri gud samting wea Jehovah duim for iumi. Hem givim iumi disfala earth wea luk naes tumas and wea garem staka naes plant and animal. Hem givim tu olketa kaikai wea teist naes and klin wata for iumi. Hem givim kam Bible wea helpem iumi for savve long nem and olketa nambawan wei bilong hem. And winim evri samting hia, hem sendem kam Son bilong hem, Jesus, wea hem lovem tumas for dae for iumi. (John 3:16) And bikos long sakrifaes bilong Jesus, iumi garem nambawan hope for future.

⁵ Jehovah hem startim tu wanfala Kingdom long heven wea klosap nao bae hem finisim evri nogud samting long disfala world. Datfala Kingdom bae mekem disfala earth kamap paradaes, wea evriwan bae stap long peace and hapi for olowe. (Sams 37:29) Nara samting wea showimaot Jehovah lovem iumi tu hem teachim iumi wanem iumi savve duim for garem gudfala laef distaem. And tu, hem laekem iumi for prea long hem, and hem evritaem redi for  herem olketa prea bilong iumi. Evri samting wea Jehovah duim for iumi showimaot hem lovem iumi evriwan.

6. From iu luksavve Jehovah barava lovem iu, wanem nao iu shud duim?

⁶ From iu luksavve Jehovah barava lovem iu, wanem nao iu shud duim? Iu shud showimaot iu tinghae long evri samting wea hem duim for iu. Bat staka pipol distaem no tinghae long samting wea narawan duim for olketa. Sem samting hem happen taem Jesus hem stap long earth bifor. Wantaem Jesus healim tenfala man wea garem leprosy. Bat wanfala nomoa kam bak for sei thankiu long hem. (Luke 17:12-17) Iumi laek for olsem datfala man wea kam bak for talem thankiu long Jesus. Iumi tu laek for showimaot iumi tinghae long evri samting wea Jehovah duim for iumi.

7. Hao nao iumi shud lovem Jehovah?

⁷ Iumi tu mas duim samting for showimaot iumi lovem Jehovah. Jesus talem olketa disaepol for mas lovem Jehovah long full heart, full soul, and long full mind bilong olketa. (Readim Matthew 22:37.) Wanem nao datwan minim?

8, 9. Wanem nao iumi savve duim for showimaot iumi lovem Jehovah?

⁸ Waswe, for talem nomoa iumi lovem Jehovah hem inaf? Nomoa. Sapos iumi lovem Jehovah long full heart, soul, and mind bilong iumi, bae hem showaot long samting wea iumi duim. (Matthew 7:16-20) Bible sei sapos iumi lovem God iumi bae obeyim olketa law bilong hem. Waswe, hem hard  for duim datwan? Nomoa, bikos olketa law bilong Jehovah “no hard tumas for obeyim.”—Readim 1 John 5:3.

⁹ Taem iumi obeyim Jehovah, iumi bae hapi and garem gudfala laef. (Aesaea 48:17, 18) Bat wanem nao bae helpem iumi for gohed fren gud witim Jehovah? Bae iumi storyim distaem.

10. Why nao iu mas gohed lane abaotem Jehovah?

¹⁰ Wanem nao mekem iu laek for fren witim Jehovah? From iu studyim Bible, datwan helpem iu for savve long Jehovah and iu start for fren witim hem. Tingim diswan: Sapos iu laekem wanfala fire for no dae, bae iu gohed putim firewood long hem mekem hem gohed laet gud. Long sem wei tu, taem iu fren witim Jehovah, iu mas gohed for lane abaotem hem mekem datwan savve strongim wei wea iutufala gohed fren gud.—Proverbs 2:1-5, NW.

11. Taem iu gohed studyim Bible, hao nao bae hem affectim iu?

¹¹ Taem iu gohed for studyim Bible, bae iu lanem olketa samting wea barava kasem heart bilong iu. Tingim feeling wea tufala disaepol bilong Jesus garem taem hem explainim olketa Bible profesi long tufala. Tufala sei: “Taem iumi wakabaot kam long road and hem minim kam olketa Holy Raeting long iumi, iumi hapi tumas, iaman?”—Luke 24:32.

12, 13. (a) Wanem nao savve happen long love wea iumi garem for God? (b) Wanem nao iumi savve duim for strongim love wea iumi garem for Jehovah?

¹² Olsem tufala disaepol bilong Jesus hapi tumas  taem tufala minim olketa profesi wea Jesus explainim long tufala, maet iu tu garem sem feeling taem iu start for minim olketa teaching insaed long Bible. Taem iu gohed studyim Bible, diswan helpem iu for savve long Jehovah and for lovem hem. Bat sapos iu no careful, bae iu savve lusim datfala love wea iu garem for Jehovah.—Matthew 24:12.

¹³ Taem iu fren witim God, iu mas waka hard for strongim datwan. Iu mas gohed for lane abaotem hem and Jesus. And tu, iu mas ting raonem wanem iu lanem and hao for followim long laef bilong iu. (John 17:3) Taem iu readim or studyim Bible, tingim diswan: ‘Wanem nao mi lanem abaotem Jehovah from diswan? Why nao mi mas lovem hem long full heart and soul bilong mi?’—1 Timothy 4:15.

14. Hao nao prea savve helpem iumi for strongim love wea iumi garem for Jehovah?

 ¹⁴ Taem iu garem wanfala gud fren, bae iu story witim hem evritaem, and diswan mekem iutufala barava fren gud. Olsem tu, taem iumi story witim Jehovah evritaem, datwan bae strongim love wea iumi garem for hem. (Readim 1 Thessalonica 5:17.) Prea hem olsem nambawan present wea Dadi bilong iumi long heven givim long iumi. Iumi shud storyim long hem evri samting wea stap insaed heart bilong iumi. (Sams 62:8) Iumi shud no baeheartim olketa prea bilong iumi bat iumi shud talem olketa prea wea kam from heart bilong iumi. Tru nao, sapos iumi gohed for studyim Bible and talem olketa prea wea kam from heart, datwan bae strongim love wea iumi garem for Jehovah.

15, 16. Wanem tingting nao iu shud garem abaotem preaching waka?

¹⁵ Nara samting wea bae helpem iumi for gohed fren gud witim Jehovah hem for story abaotem biliv bilong iumi long olketa narawan. Hem nambawan privilege for iumi story abaotem Jehovah long olketa narawan. (Luke 1:74) And diswan hem waka wea Jesus sei evri tru Christian mas duim. Iumi evriwan mas talemaot gud nius abaotem Kingdom bilong God. Waswe, iu start for duim diswan finis?—Matthew 24:14; 28:19, 20.

¹⁶ Long tingting bilong aposol Paul, datfala preaching waka hem wanfala barava “spesol waka.”  (2 Corinth 4:7) No eni nara waka hem important winim waka for story abaotem Jehovah and plan bilong hem long olketa narawan. Diswan hem part long worship bilong iu for Jehovah, and hem barava tinghae long wanem iu duim for hem. (Hebrew 6:10) Preaching waka savve helpem iu and man wea iu story witim bikos datwan helpem hem and iuseleva for fren witim Jehovah, and for kasem laef olowe. (Readim 1 Corinth 15:58.) No eni nara waka savve mekem iu hapi and satisfae olsem preaching waka!

17. Why nao hem barava important for iumi duim preaching waka?

¹⁷ Preaching waka hem barava important. Iumi shud “talemaot toktok bilong God” and “strong for duim” waka hia. (2 Timothy 4:2) Pipol mas herem message abaotem Kingdom bilong God. Bible sei: “Bikfala De blong [Jehovah] fo jajem pipol hemi barava kolsap nao, an hemi kam kuiktaem,” and bae “hemi mas hapen.” (Sefenaea 1:14; Habakuk 2:3) Tru nao, klosap nao Jehovah bae distroem disfala nogud world bilong Satan. Bifor end hem kam, iumi mas warnim pipol mekem olketa savve disaedem sapos olketa laek for worshipim Jehovah or nomoa.

18. Why nao Jehovah laekem iumi for mas worshipim hem witim olketa nara Christian?

¹⁸ Jehovah laekem iumi for worshipim hem witim olketa nara tru Christian. Bible sei: “Iumi mas barava tingim narawan mekem iumi savve encouragem olketa for showimaot love and duim olketa gudfala samting. No misstim wei for hipap tugeta olsem samfala savve duim, bat encouragem  narawan and gohed for duim datwan moa taem iufala lukim datfala day hem kakam klosap.” (Hebrew 10:24, 25) Iumi mas traem best for no misstim eni meeting. Taem bilong olketa meeting hem chance for iumi evriwan encouragem and strongim each other.

19. Wanem nao savve helpem iumi for lovem olketa brata and sista?

¹⁹ Taem iu go long olketa meeting, bae iu garem olketa gudfala fren wea bae helpem iu for worshipim Jehovah. Bae iu meetim olketa difren brata and sista wea duim best bilong olketa tu for worshipim Jehovah olsem iu. Olketa tu no perfect and savve mekem mistek. Taem olketa mekem mistek, hem gud for forgivim olketa. (Readim Colossae 3:13.) Hem gud for evritaem tingim olketa gudfala wei bilong olketa brata and sista. Taem iu duim olsem, datwan bae helpem iu for lovem olketa and bae iu barava fren gud witim Jehovah.

20, 21. Wanem nao “datfala tru laef”?

²⁰ Jehovah laekem evri fren bilong hem for garem barava gudfala laef wea winim wanem iumi savve tingim distaem. Bible hem sei laef bilong iumi long future bae hem barava difren from laef wea iumi garem distaem.

²¹ Long future, bae iumi no laef for 70 or 80 year nomoa, bat bae iumi “laef olowe.” Long datfala taem bae iumi garem perfect health, stap gud witim olketa narawan, and hapi insaed long naesfala paradaes. Datwan nao Bible kolem “datfala tru laef.”  Jehovah promis for givim iumi datfala tru laef, bat iumi mas duim best bilong iumi distaem mekem iumi savve “hol strong” long datfala laef.—1 Timothy 6:12, 19.

22. (a) Wanem nao iumi savve duim for “hol strong long datfala tru laef”? (b) Waswe, laef olowe hem samting wea Jehovah bae givim long iumi bikos long olketa gudfala samting wea iumi duim? Explainim.

²² Wanem nao iumi savve duim for “hol strong long datfala tru laef”? Iumi mas “duim plande gudfala samting.” (1 Timothy 6:18) Diswan minim iumi mas followim wanem iumi lanem long Bible. Nomata olsem, Jehovah hem givim iumi datfala tru laef no bikos long haomas samting wea iumi duim, or bikos hem pei for samting wea iumi duim. Bat datfala tru laef hem wanfala present wea Jehovah givim long olketa wea faithful long hem. Disfala present showimaot Jehovah hem “kaen tumas.” (Rome 5:15) Dadi bilong iumi long heven barava laek givim disfala present long olketa wea faithful for worshipim hem.

23. Why nao hem important for disaedem stretfala samting distaem?

²³ Hem gud for tingim diswan: “Waswe, mi worshipim God long stretfala wei?” Sapos iu luksavve iu mas changem samfala samting long laef bilong iu, iu mas duim datwan kwiktaem. Taem iumi depend long Jehovah and duim best bilong iumi for obeyim hem, Jehovah bae protectim iumi. Hem bae protectim olketa wea faithful long hem long olketa last day bilong disfala nogud world bilong Satan. Then  Jehovah bae givim laef olowe long iumi long Paradaes, olsem hem promisim. Tru nao, iu savve kasem datfala tru laef sapos iu disaedem stretfala samting distaem!