TAEM iu readim niuspepa, lukluk long TV, or herehere long radio, iu herem and lukim nius abaotem war and staka nogud samting wea olketa criminal and terrorist duim. Maet iuseleva tu safa bikos iu sik or iu kasem hard taem bikos wanfala famili member or fren hem dae.

Ting raonem olketa kwestin hia:

• Waswe, diswan nao plan bilong God for mi and famili bilong mi?

• Wanem nao savve helpem mi taem mi kasem olketa problem?

• Waswe, enitaem bae iumi garem trufala peace?

Bible nomoa garem stretfala ansa for olketa kwestin hia.

• Pipol bae no feelim pain, no olo, and no dae.—Revelation 21:4

• “Olketa wea lek blong olketa hemi dae, bae i savve jam olobaot moa olsem dia.”—Aesaea 35:6

• “Olketa hu i blaen bae i save lukluk moa.”—Aesaea 35:5

•  Olketa wea dae finis bae laef bak.—John 5:28, 29

• No eniwan bae sik.—Aesaea 33:24

• Evriwan long earth bae garem staka kaikai.—Sams 72:16

Maet iu tingse olketa samting wea iu just read abaotem hem hard for happen. Bat God sei klosap nao bae hem duim olketa samting hia long earth, and Bible storyim hao hem bae duim datwan.

Bible storyim olketa narafala samting tu. Hem showim wanem iumi mas duim for hapi and enjoyim laef distaem. Tingim firstaem samfala samting wea iu savve wari abaotem. Maet iu wari abaotem selen, famili, sik, or wanfala famili member or fren hem dae. Bible savve helpem iu for deal witim olketa problem hia, and hem savve comfortim iu bikos hem garem ansa for olketa kwestin hia:

• Why nao olketa nogud samting kasem iumi?

• Wanem nao iumi savve duim for deal witim olketa problem bilong iumi?

• Wanem nao iumi savve duim mekem famili bilong iumi hapi?

• Wanem nao hem happen long iumi bihaen iumi dae?

• Waswe, bae iumi lukim moa famili member or fren wea dae finis?

• Hao nao iumi savve God bae duim evri samting wea hem promisim?

 From iu readim disfala buk, luk olsem iu laek for lanem wanem Bible talem. Disfala buk bae helpem iu. Long each chapter, olketa paragraf garem olketa kwestin wea bae helpem iu for lanem wanem Bible talem. Staka million pipol kasem gud samting taem olketa studyim Bible witim Olketa Jehovah’s Witness. Mifala hope iu tu bae kasem gud samting. Taem iu lanem wanem Bible talem, God bae blessim iu!