1. Wanem prea wea staka pipol savve long hem nao bae iumi story abaotem?

STAKA million pipol savve long prea wea olketa kolem Lord’s Prea, or Our Father Prea. Jesus talem datfala prea for teachim olketa disaepol bilong hem hao for prea. Wanem nao hem prea for hem? And why nao disfala prea hem important for iumi distaem?

2. Wanem thrifala important samting nao Jesus teachim iumi for prea for hem?

² Jesus sei: “Iufala mas prea long wei olsem: ‘Dadi bilong mifala long heven, mifala laekem nem bilong iu for holy. Mifala laekem Kingdom bilong iu for kam. Duim samting wea iu laek for duim long earth, olsem iu duim long heven.’” (Readim Matthew 6:9-13.) Why nao Jesus talem iumi for prea for thrifala samting hia?—Lukim Endnote 20.

3. Wanem nao bae iumi lanem abaotem Kingdom bilong God?

³ Iumi lanem insaed Bible nem bilong God hem Jehovah. And iumi storyim tu wanem nao plan bilong God for iumi olketa man and for disfala earth. Bat wanem nao Jesus minim taem hem sei: “Mifala laekem Kingdom bilong iu for kam”? Bae iumi lanem wanem nao Kingdom bilong God,  wanem hem bae duim, and hao hem bae mekhae long nem bilong God.

4. Wanem nao Kingdom bilong God, and hu nao King bilong hem?

⁴ Jehovah startim wanfala gavman long heven and markem Jesus nao for King long hem. Bible sei datfala gavman nao hem Kingdom bilong God. Jesus hem “King bilong olketa wea rul olsem king and Lord bilong olketa wea rul olsem lord.” (1 Timothy 6:15) Jesus barava fit for helpem olketa man winim eni nara ruler long earth. And tu, hem garem bigfala paoa winim eni nara ruler long earth.

5. Gavman bilong God bae rul long wea and bae hem rul ovarem wanem?

⁵ Jesus go ap long heven fotifala day bihaen hem laef bak. Gogo, Jehovah mekem hem King long datfala Kingdom. (Acts 2:33) Gavman bilong God bae rul long heven ovarem earth. (Revelation 11:15) Dastawe Bible sei Kingdom bilong God hem ‘Kingdom long heven.’—2 Timothy 4:18.

6, 7. Wanem nao mekem Jesus hem winim eni nara king long earth?

⁶ Bible storyim Jesus hem winim eni nara king long disfala earth bikos “hem nomoa no savve dae.” (1 Timothy 6:16) Olketa man wea rul long earth gogo olketa savve dae, bat Jesus bae no dae moa enitaem. Evri gud samting wea iumi bae kasem from rul bilong Jesus bae hem stap for olowe.

 ⁷ Profesi long Bible sei Jesus bae hem King wea no favorim eniwan and hem kaen tumas. Hem sei: “Disfala king ya, bae spirit blong [Jehovah] nao hemi stap long hem. Ya, hemi mekem hem fo waes fogud an fo save fogud. Bae disfala spirit hemi givim gudfala toktok long hem an paoa fo rul. An bae hemi mekem king ya fo save long wanem [Jehovah] hemi laekem hem fo save, an fo tinghae long hem. Ya, bae king ya hemi hapi tumas fo tinghae long [Jehovah]. Hemi no jajem man jes long wanem hemi herem an lukim, bat bae hemi jajem kot blong olketa pua pipol long stretfala wei.” (Aesaea 11:2-4) Waswe, iu laekem king olsem nao for rulim iumi olketa man?

8. Hao nao iumi savve Jesus bae no rul seleva?

⁸ God chusim samfala man long earth tu for rul witim Jesus insaed datfala gavman long heven. Aposol Paul sei long Timothy: “Sapos iumi no givap, bae iumi olketa king wea rul tugeta witim hem.” (2 Timothy 2:12) Haomas man nao bae rul witim Jesus long heven?

9. Haomas man nao bae rul witim Jesus, and wanem taem nao God start for chusim olketa?

⁹ Olsem iumi lanem long Chapter 7, aposol John lukim long vision Jesus hem King long heven witim nara 144,000 king tu. Hu nao olketa 144,000 king hia? John sei olketa hia “olketa garem nem bilong [Jesus] and nem bilong Dadi bilong hem long forhed bilong olketa.” Hem sei moa: “Olketa gohed followim datfala Pikinini  Sheepsheep [wea minim, Jesus] long eni ples wea hem go. God hem peim olketa from earth.” (Readim Revelation 14:1, 4.) Datfala 144,000, wea God chusim for “kamap olketa king for rulim disfala earth” witim Jesus, hem olketa faithful Christian. Taem olketa dae, olketa bae laef bak and go ap long heven. (Revelation 5:10) Start kam long taem bilong olketa aposol, Jehovah start for chusim olketa faithful Christian for joinim datfala 144,000 wea bae king.

10. Why nao iumi sei Jehovah lovem iumi taem hem chusim Jesus and 144,000 for rulim iumi olketa man?

¹⁰ Bikos Jehovah lovem iumi tumas hem mekem arrangement for olketa man nao for rul witim Jesus. Jesus hem wanfala gudfala King bikos hem savve gud long iumi olketa man. Hem laef bifor long earth and hem barava safa tu. Paul sei Jesus “savve minim olketa wik point bilong iumi, bikos evri samting wea traem iumi hem traem hem tu.” (Hebrew 4:15; 5:8) Olketa 144,000 olketa man tu olsem iumi. Olketa tu stragol witim olketa wik point and deal witim olketa difren kaen sik. So Jesus and 144,000 barava minim feeling bilong iumi and olketa problem wea iumi feisim tu.

11. Why nao Jesus teachim olketa disaepol bilong hem for prea for plan bilong God mas kamap long heven?

¹¹ Jesus teachim olketa disaepol bilong hem for prea for plan bilong God for kamap long heven.  Why nao olsem? Bikos long datfala taem samfala angel long heven no obeyim God. Long Chapter 3 iumi storyim Devil hem againstim Jehovah. Bihaen datwan, Jehovah letem Satan and olketa nara angel wea saedem hem, wea hem nao olketa demon, for stap long heven for lelebet taem. Long Chapter 10, bae iumi lanem moa samting abaotem Satan and olketa demon.

12. Wanem tufala important samting wea happen nao Revelation 12:10 storyim?

¹² Bible storyim no longtaem bihaen Jesus kamap King insaed Kingdom bilong God, bae hem faetem Satan. (Readim Revelation 12:7-10.) Verse 10 storyim tufala barava important samting wea bae happen: (1) Kingdom bilong God start for rul and Christ nao hem King. (2) Jesus torowem Satan kam daon long earth. Distaem bae iumi storyim olketa samting wea pruvim tufala samting hia happen finis.

13. Olketa long heven olketa hao bihaen olketa torowem Satan kam daon long earth?

¹³ Bible sei olketa faithful angel long heven hapi tumas taem Jesus torowem Satan and olketa demon bilong hem kam daon long earth. Hem sei: “Iufala evriwan wea stap long heven, iufala mas hapi!” (Revelation 12:12) Distaem heven garem peace and evriwan gohed wan mind for duim wanem God laekem.

14. Taem Jesus torowem Satan kam daon long earth, wanem nao happen?

¹⁴ Bat long earth olketa nogud samting nao  kasem pipol “bikos Devil hem kam daon” and hem “kros fogud from hem savve hem garem lelebet taem nomoa.” (Revelation 12:12) Satan barava kros tumas. Olketa aotem hem from heven, and hem savve klosap nao olketa bae finisim hem. Dastawe hem kosim staka trabol and nogud samting wea mekem pipol long full world for safa.

15. Wanem nao plan bilong God for earth?

¹⁵ Bat plan bilong God for earth hem no change. Hem still laekem olketa perfect pipol for laef olowe insaed paradaes long earth. (Sams 37:29) So wanem nao Kingdom bilong God bae duim for mekem datfala plan kamap tru?

16, 17. Wanem nao iumi lanem from Daniel 2:44 abaotem Kingdom bilong God?

¹⁶ Profesi long Daniel 2:44 sei: “Long taem blong olketa king ya, disfala God long heven bae hemi mekem wanfala kingdom fo kamap wea no eniwan save spoelem enitaem. An bae no eni narafala king moa save winim hem. Disfala kingdom ya bae hemi pisisim finis olketa narafala kingdom, an rul blong hem bae hemi stap evritaem olowe.” Wanem nao iumi lanem from disfala profesi abaotem Kingdom bilong God?

¹⁷ First samting, iumi lanem Kingdom bilong God bae start for rul “long taem blong olketa king ya.” Diswan minim olketa narafala gavman bae stap yet long earth taem Kingdom bilong God start for rul. Mek-tu samting, no eni narafala  gavman bae winim Kingdom bilong God, bat hem nomoa bae rul for olowe. And mek-thri samting, Kingdom bilong God bae faet againstim olketa nara gavman long earth. Bat Kingdom bilong God bae winim datfala faet and hem nomoa only gavman wea bae rul ovarem earth. Bihaen datwan nao olketa man long earth bae stap anda long gavman wea winim eni nara gavman.

18. Wanem nao nem bilong datfala war wea bae kamap midolwan Kingdom bilong God and olketa gavman long earth?

¹⁸ Hao nao Kingdom bilong God bae finisim olketa gavman long earth? Olketa demon bae “hipimap olketa king for datfala war wea bae kamap long bigfala day bilong Olmaeti God.” Nem bilong lastfala war hia hem Armageddon. Tru nao, olketa gavman long earth bae faet againstim Kingdom bilong God, bat Kingdom bilong God bae winim olketa.—Revelation 16:14, 16. Lukim Endnote 10.

19, 20. Why nao iumi needim Kingdom bilong God for rul ovarem earth?

¹⁹ Why nao iumi needim Kingdom bilong God? Bikos long thrifala reason. First reason, iumi evriwan born witim sin so iumi savve sik and dae. Bat Bible sei taem Kingdom bilong God hem rul, iumi bae laef olowe. John 3:16 sei: “God barava lovem tumas pipol long world dastawe hem givim kam spesol Son bilong hem, mekem evriwan wea showimaot faith long hem no dae bat kasem laef olowe.”

 ²⁰ Mek-tu reason, iumi stap midolwan olketa nogud pipol. Staka pipol laea, ravem narawan, and durong. Iumi no garem paoa for aotem nogud pipol hia from earth, bat God nomoa garem paoa for duim datwan. God bae finisim eniwan wea gohed for duim nogud samting long Armageddon. (Readim Sams 37:10.) Mek-thri reason, olketa gavman bilong man spoelem pipol, no fit for helpem pipol, and ravem pipol. Olketa no laek for helpem pipol for obeyim God. Bible sei “taem man rulim narawan hem spoelem hem nomoa.”—Ecclesiastes 8:9, NW.

21. Hao nao Kingdom bilong God bae mekem plan bilong hem for earth kamap tru?

²¹ Bihaen Armageddon, Kingdom bilong God bae mekem plan bilong hem for earth kamap tru. Hem bae torowem Satan and olketa demon  bilong hem insaed hol wea deep tumas. (Revelation 20:1-3) Gogo, no eniwan bae sik or dae. Ransom bilong Jesus bae helpem evriwan wea faithful for laef olowe insaed Paradaes long earth. (Revelation 22:1-3) Datfala Kingdom bae mekem nem bilong God for holy. Datwan hem minim wanem? Taem gavman bilong God rul ovarem earth, evriwan long earth bae mekhae long nem bilong Jehovah.—Lukim Endnote 21.

22. Hao nao iumi savve Jesus no kamap King taem hem stap long earth, or stretawe bihaen hem laef bak and go ap long heven?

²² Jesus teachim olketa disaepol for prea olsem: “Mifala laekem Kingdom bilong iu for kam.” Datwan showimaot gavman bilong God wea Jesus bae King long hem bae hem rul long future. Waswe,  God mekem Jesus kamap King stretawe bihaen hem laef bak and go ap long heven? Nomoa, hem mas weit firstaem. Samfala year bihaen Jesus laef bak, Peter and Paul sei, Jesus hem mekem profesi long Sams 110:1 hem kamap tru. Long profesi hia Jehovah sei olsem long Jesus: “Yu sidaon long raet saet blong mi, go-go kasem taem wea mi mekem olketa enemi blong yu fo stap andanit long paoa blong yu.” (Acts 2:32-35; Hebrew 10:12, 13) Hao long nao Jesus mas weit bifor Jehovah mekem hem for kamap King?

23. (a) Wanem taem nao Jesus kamap King insaed Kingdom bilong God? (b) Wanem nao bae iumi storyim long nextfala chapter?

²³ Staka year bifor 1914, wanfala grup bilong olketa Bible student studyim olketa Bible profesi and luksavve datfala year hem wanfala important year. Evri samting wea happen long world start long 1914 kam kasem distaem, showimaot tingting bilong olketa abaotem datfala year hem stret. Jesus kamap King insaed datfala Kingdom long 1914. (Psalm 110:2, NW.) No longtaem bihaen, Jesus torowem Satan kam daon long earth, and distaem Satan “garem lelebet taem nomoa.” (Revelation 12:12) Long next chapter bae iumi storyim olketa pruv wea showimaot iumi stap long “lelebet taem” hia wea Satan garem. Bae iumi lanem tu klosap nao Kingdom bilong God bae mekem plan bilong God for earth kamap tru.—Lukim Endnote 22.