1, 2. (a) Sapos iu savve long eniwan wea hem famous, waswe, datwan minim iu savve gud long hem? Explainim. (b) Long tingting bilong staka pipol, hu nao Jesus?

LONG world staka pipol olketa famous. Maet iu savve long nem bilong eniwan wea famous. Nomata iu savve long nem bilong hem, datwan no minim iu savve gud long hem. Iu no savve long evri samting abaotem hem and wei bilong hem.

² Maet iu herem story abaotem Jesus nomata hem laef long earth samting olsem 2,000 year go finis. Bat staka pipol no savve long hem and olketa wei bilong hem. Samfala sei hem wanfala gud man, olketa narawan sei hem wanfala profet, and samfala moa sei hem nao God. Hao nao tingting bilong iu?—Lukim Endnote 12.

3. Why nao hem barava important for iu savve long tru samting abaotem Jehovah God and Jesus Christ?

³ Hem barava important for iu savve long tru samting abaotem Jesus. Why nao olsem? Bible sei: “For olketa kasem laef olowe, olketa mas lane abaotem iu, wea iu nomoa trufala God, and lane abaotem Jesus Christ, wea iu sendem kam.” (John 17:3) Tru nao, sapos iu savve long tru samting abaotem Jehovah and Jesus, bae iu fit for laef olowe long paradaes long earth. (John 14:6)  And tu, wei for lane abaotem Jesus bae helpem iu distaem bikos Jesus nao showimaot gud example long wanem man mas duim for hapi long laef bilong hem and for stap gud witim narawan. (John 13:34, 35) Long Chapter 1, iumi lanem truth abaotem God. Distaem bae iumi lanem truth abaotem Jesus.

4. Wanem nao tufala title hia “Messiah” and “Christ” showimaot?

⁴ Staka year bifor Jesus hem born, Jehovah talem insaed Bible bae hem sendem kam Messiah, wea nara nem bilong hem tu Christ. Datfala title “Messiah” hem Hebrew word, and “Christ” hem Greek word. Tufala title hia showimaot God bae chusim datfala Messiah and markem hem for duim wanfala important waka. Messiah nao bae mekem evri promis bilong God for kamap tru. Bat bifor Jesus hem born, staka pipol laek for savve hu nao bae hem datfala Messiah?

5. Waswe, olketa disaepol bilong Jesus bilivim hem nao datfala Messiah?

⁵ Olketa disaepol bilong Jesus barava sure hem nao datfala Messiah. (John 1:41) Olsem example, Simon Peter sei olsem long Jesus: “Iu nao datfala Christ.” (Matthew 16:16) Hao nao iumi sure Jesus nao datfala Messiah?

6. Wanem nao Jehovah duim for helpem pipol wea garem gudfala heart for luksavve hu nao Messiah?

⁶ Staka year bifor Jesus hem born, olketa profet  bilong God raetem staka samting abaotem hem wea bae helpem pipol for luksavve hu nao datfala Messiah. Hao nao diswan helpem pipol for luksavve long hem? Tingim sapos olketa askem iu for go pikim samwan long wharf or long airport, bat iu no meetim hem enitaem bifor. Bae iu fit for luksavve long hem sapos olketa storyim staka samting abaotem hem. Olsem tu, Jehovah iusim olketa profet bilong hem for talem iumi wanem Messiah bae duim and wanem bae happen long hem. Wei wea evri profesi hia kamap tru helpem pipol wea garem gudfala heart for luksavve Jesus nao hem datfala Messiah.

7. Wanem tufala profesi nao pruvim Jesus hem datfala Messiah?

⁷ Distaem bae iumi storyim tufala profesi. First wan, 700 year bifor Jesus hem born, Micah profesi abaotem Messiah bae hem born long wanfala smol taon long Bethlehem. (Micah 5:2, NW) And hem nao ples wea Jesus born long hem! (Matthew 2:1, 3-9) Mek-tu, Daniel talem profesi abaotem year wea Messiah bae kam, wea hem nao long 29 C.E. (Daniel 9:25, NW) Diswan hem tufala nomoa long staka profesi wea pruvim Jesus hem datfala Messiah wea God promis for sendem kam.—Lukim Endnote 13.

8, 9. Taem Jesus baptaes, wanem nao happen wea pruvim hem nao datfala Messiah?

⁸ Jehovah duim samting wea mekem pipol  luksavve Jesus nao hem datfala Messiah. God promisim John Baptaesa bae hem lukim wanfala saen wea bae mekem hem for savve hu nao datfala Messiah. Taem Jesus go for John baptaesim hem long Jordan River long 29 C.E., John lukim datfala saen. Bible talem samting wea happen: “Stretawe bihaen Jesus hem go anda [or, insaed] long wata and hem standap moa, skae hem open, and John lukim spirit bilong God wea olsem wanfala kurukuru kam daon antap long Jesus. And tu, wanfala toktok from skae hem sei: ‘Diswan nao Son bilong mi wea mi lovem and wea mi hapi long hem.’” (Matthew 3:16, 17) Taem John lukim datfala saen and hem herem toktok bilong God, hem savve Jesus nao datfala Messiah. (John 1:32-34) Long datfala day, Jesus kamap Messiah taem Jehovah pourimaot holy spirit long hem. Hem nao man wea God chusim for kamap leader and for kamap King.—Aesaea 55:4.

⁹ Olketa profesi long Bible, toktok bilong Jehovah seleva, and saen wea John lukim taem Jesus baptaes pruvim Jesus nao datfala Messiah. Bat Jesus hem kam from wea, and wanem kaen man nao hem? Distaem bae iumi storyim wanem Bible talem abaotem datwan.

10. Wanem nao Bible talem abaotem laef bilong Jesus bifor hem kam long earth?

¹⁰ Bible talem Jesus hem stap for staka year long heven bifor hem kam daon long earth. Profet Micah sei Messiah hem “from taem bifor  kam.” (Micah 5:2, NW) Staka taem Jesus seleva tu sei hem stap long heven bifor hem born long earth. (Readim John 3:13; 6:38, 62; 17:4, 5.) Bifor Jesus kam long earth, hem barava fren gud witim Jehovah.

11. Why nao Jehovah barava lovem Jesus?

¹¹ Jehovah hem barava lovem Jesus. Why nao olsem? Bikos God creatim Jesus firstaem bifor hem creatim evri nara samting. Dastawe Bible sei Jesus hem “firstborn long evri samting wea God wakem.” * (Colossae 1:15) Jehovah lovem Jesus tu bikos hemseleva nao creatim Jesus. Dastawe Bible sei Jesus hem “spesol son” bilong God. (John 3:16) Only Jesus nomoa helpem Jehovah for creatim evri nara samting. (Colossae 1:16) And only Jesus nomoa garem datfala nem “Word” bikos Jehovah iusim hem for talem olketa message and instruction long olketa angel and olketa man.—John 1:14.

12. Waswe, Jesus and God tufala wan nomoa? Explainim.

¹² Samfala pipol bilivim Jesus and God tufala wan nomoa. Bat Bible no talem datwan. Bible sei God nao wakem Jesus, so diswan minim Jesus hem garem start. Bat Jehovah wea hem wakem evri samting, hem no garem eni start. (Sams 90:2) No enitaem Jesus, wea hem son bilong God, hem trae for kamap God. Bible talem klia  hao Dadi hem winim Son. (Readim John 14:28; 1 Corinth 11:3.) Jehovah nomoa hem “Olmaeti God.” (Revelation 16:7) Hem garem barava bigfala paoa winim eniwan long universe.—Lukim Endnote 14.

13. Why nao Bible sei Jesus “hem olsem God wea no eniwan savve lukim”?

¹³ For staka billion year bifor God wakem heven and earth, Jehovah and Son bilong hem Jesus tufala waka tugeta. Tufala barava lovem each other! (John 3:35; 14:31) Bible sei Jesus “hem olsem God wea no eniwan savve lukim” bikos hem garem olketa sem wei olsem Dadi bilong hem.—Colossae 1:15.

14. Hao nao spesol Son bilong Jehovah hem born olsem wanfala man long earth?

¹⁴ Disfala spesol Son bilong Jehovah hem willing for lusim heven and born olsem wanfala man long earth. Hao nao datwan happen? Jehovah duim mirakol taem hem putim laef bilong Son bilong hem insaed long bele bilong wanfala young gele wea nem bilong hem Mary. So Jesus hem no born long wanfala man long earth. From datwan, Mary hem bonem wanfala Son wea perfect, and Mary nemim hem long Jesus.—Luke 1:30-35.

15. Wanem nao savve helpem iu for savve long Jehovah?

¹⁵ Sapos iu readim Bible buk Matthew, Mark, Luke, and John bae iu lanem staka samting  abaotem Jesus, laef bilong hem, and olketa wei bilong hem. Pipol kolem olketa buk hia olketa Gospel. Taem iu readim olketa buk hia, bae iu savve gud long Jehovah bikos Jesus hem barava olsem Dadi bilong hem. Dastawe Jesus sei: “Man wea lukim mi hem lukim Dadi tu.”—John 14:9.

16. Wanem barava important samting nao Jesus teachim long pipol? Olketa samting wea Jesus teachim hem lanem from hu?

¹⁶ Taem Jesus stap long earth, staka pipol kolem hem “Teacher.” (John 1:38; 13:13) Wanfala barava important samting wea hem teachim long pipol nao hem “gud nius abaotem Kingdom.” Wanem nao datfala Kingdom? Kingdom hem gavman bilong God wea stap long heven and bae hem rul ovarem full earth and mekem pipol wea obeyim God for kasem olketa blessing. (Matthew 4:23) Evri samting wea Jesus teachim long pipol hem lanem from Jehovah. Jesus sei: “Samting wea mi teachim long pipol hem no bilong mi bat hem bilong God wea sendem mi kam.” (John 7:16) Jesus savve Jehovah laekem pipol for herem datfala gud nius abaotem Kingdom bilong God wea bae rul ovarem full earth.

17. Olketa wanem ples nao Jesus teach long hem? Why nao Jesus barava waka hard for teachim pipol?

¹⁷ Long wea nao Jesus savve teachim pipol? Hem teach long evri ples wea pipol stap. Hem teachim pipol wea stap long bakwei, olketa taon, olketa vilij, long market, long temple, insaed olketa sinagog, and long haos bilong pipol. Hem no weitim pipol for kam long hem. Staka taem  hem nao go long olketa. (Mark 6:56; Luke 19:5, 6) Jesus barava waka hard and hem iusim staka taem and strong bilong hem for teachim pipol. Why nao hem duim olsem? Jesus savve datwan nao samting wea God laekem hem for duim, and hem evritaem obeyim Dadi bilong hem. (John 8:28, 29) Nara samting wea mekem Jesus for preach tu hem bikos hem feel sorre long pipol. (Readim Matthew 9:35, 36.) Hem luksavve olketa bigman long religion no teachim pipol olketa tru samting abaotem God and Kingdom bilong hem. So hem laek for helpem pipol for herem datfala gud nius.

18. Olketa wanem wei bilong Jesus nao iu tinghae tumas long hem?

¹⁸ Jesus hem lovem pipol and hem helpem olketa. Hem kaen and pipol no fraet for story long hem. Olketa pikinini tu no fraetem hem. (Mark 10:13-16) Jesus hem evritaem duim samting wea stret. Hem heitim corruption and samting wea no followim justice. (Matthew 21:12, 13) Taem Jesus stap long earth pipol no respectim olketa woman. Bat Jesus hem evritaem respectim olketa woman. (John 4:9, 27) Jesus hem barava hambol tu. Olsem example, wantaem hem wasim leg bilong olketa aposol bilong hem, wea datwan wakaman long haos nao shud duim.—John 13:2-5, 12-17.

19. Wanem samting nao Jesus duim wea showimaot hem luksavve wanem pipol barava needim and hem laek for helpem olketa?

¹⁹ Jesus luksavve wanem nao pipol barava  needim, and hem laek for helpem olketa. Dastawe hem iusim paoa wea God givim long hem for duim mirakol and for healim pipol. (Matthew 14:14) Olsem example, wantaem wanfala man wea garem leprosy hem kam long Jesus and sei: “Sapos iu willing, iu savve mekem mi gud bak moa.” Jesus hem sorre tumas taem hem lukim disfala man kasem pain and hem safa, and hem laek for helpem hem. So Jesus tasim hem and sei: “Mi barava laek for duim datwan! Iu gud bak nao.” Semtaem nomoa datfala man wea garem leprosy hem gud nao! (Mark 1:40-42) Masbi hem hapi fogud!

20, 21. Hao nao Jesus hem showimaot gudfala example for obeyim God?

²⁰ Jesus hem showimaot gudfala example for obeyim God. Nomata wanem samting kasem hem or wanem olketa enemy bilong hem duim long hem, hem faithful long Dadi bilong hem. Olsem example, Jesus no duim eni sin taem Satan testim hem. (Matthew 4:1-11) Olketa relative bilong Jesus tu no bilivim hem nao datfala Messiah, and olketa tok spoelem hem and sei: “Man hia mas krangge nao ia.” Nomata olsem, Jesus gohed for duim waka wea God talem hem for  duim. (Mark 3:21) Taem olketa enemy bilong Jesus duim nogud samting long hem, hem gohed faithful long God and hem no duim eni samting for spoelem olketa.—1 Peter 2:21-23.

²¹ Nomata olketa enemy killim Jesus nogud and hem kasem bigfala pain taem hem dae, hem gohed faithful long Jehovah. (Readim Philippi 2:8.) Tingim olketa barava nogud samting wea kasem Jesus long sem day wea hem dae. Olketa arrestim hem, olketa man laea for sei hem talem nogud toktok, olketa nogud judge olketa judgem hem for dae, pipol laflaf long hem, olketa soldia killim hem nogud, and nilam hem long post. Taem hem redi for dae hem sei: “Mi duim finis evri samting wea iu askem mi for duim!” (John 19:30) Thrifala day bihaen Jesus dae, Jehovah mekem hem laef bak and givim hem wanfala spirit body. (1 Peter 3:18) Samfala week bihaen, Jesus go bak long heven and “hem sidaon long raet saed bilong God.” Then hem weitim taem wea God bae mekem hem for kamap King.—Hebrew 10:12, 13.

22. From Jesus hem faithful long Dadi bilong hem, datwan mekem wei for iumi kasem wanem?

²² From Jesus hem faithful long Dadi bilong hem, hem mekem wei for iumi garem chance for laef olowe long paradaes long earth, wea hem nao plan bilong Jehovah for iumi olketa man. Long next chapter, bae iumi storyim wei wea dae bilong Jesus hem mekem wei for iumi savve laef olowe.