1. Long wea nao iumi savve lane abaotem future?

TAEM iu lukluk nius long TV or herem nius long radio, maet iu garem disfala tingting, ‘Mae krangge, distaem evri samting wea happen long world tumas nao!’ Samfala pipol tingse world klosap for finis nao bikos staka nogud samting hem happen, and wei for spoelem pipol kamap big tumas. Waswe, datwan hem tru? Waswe, eni wei stap for iumi savve long olketa samting wea bae happen long future? Ia. Nomata iumi olketa man no fit for savve wanem bae happen, Jehovah savve wanem bae happen long future. Hem talem insaed Bible samting wea bae happen long future bilong iumi olketa man and bilong disfala world.—Aesaea 46:10; James 4:14.

2, 3. Wanem samting nao olketa disaepol askem long Jesus, and wanem nao hem talem long olketa?

² Taem Bible storyim disfala world bae finis, hem no minim disfala planet earth, bat hem minim olketa nogud pipol nao bae finis. Jesus sei Kingdom bilong God nao bae rulim earth. (Luke 4:43) Olketa disaepol bilong Jesus laek for savve wanem taem nao Kingdom bilong God bae rul so olketa askem Jesus: “Wanem taem nao olketa  samting hia bae happen and wanem nao saen wea bae showimaot iu stap and world hem gogo for finis?” (Matthew 24:3) Jesus no talem olketa wanem taem nao datwan bae happen, bat hem storyim olketa samting wea bae happen bifor world hem finis. Olketa samting wea Jesus storyim hem gohed for happen distaem.

³ Long disfala chapter bae iumi storyim olketa samting wea pruvim iumi stap long taem wea world hem klosap tumas for finis. Bat firstaem bae iumi storyim wanfala war wea happen long heven. Datwan bae helpem iumi for minim why evri samting wea happen long world distaem hem worse tumas.

4, 5. (a) Wanem nao happen long heven no longtaem bihaen Jesus kamap King? (b) Wanem nao Revelation 12:12 sei bae happen bihaen olketa torowem Satan kam daon long earth?

⁴ Long Chapter 8 iumi storyim Jesus kamap King long heven long 1914. (Daniel 7:13, 14, NW) Bible buk Revelation storyim samting wea happen. Hem sei: “Then bigfala faet hem kamap long heven. Michael [wea hem Jesus] witim olketa angel bilong hem faetem datfala big snek [wea hem Satan], and datfala big snek witim olketa angel bilong hem faetem olketa tu.” * Satan and olketa demon bilong hem lus long datfala faet  and Jesus torowem olketa kam daon long earth. Masbi, olketa angel hapi fogud! Bat waswe olketa man long earth? Bible sei olketa man bae kasem barava nogud samting. Why nao olsem? Bikos Satan hem “kros fogud from hem savve hem garem lelebet taem nomoa.”—Revelation 12:7, 9, 12.

⁵ Devil hem kosim staka trabol long disfala earth. Hem kros tumas bikos hem savve lelebet taem nomoa stap bifor God bae finisim hem. Distaem bae iumi storyim olketa samting wea Jesus sei bae happen long world long olketa last day.—Lukim Endnote 24.

6, 7. Hao nao iumi savve samting wea Jesus talem abaotem war and bigfala hangre hem kamap tru?

⁶ War. Jesus sei: “Bae pipol long wanfala ples faetem pipol long nara ples and pipol long wanfala kantri faetem pipol long nara kantri.” (Matthew 24:7) Start long 1914 kam kasem distaem, staka pipol dae long war winim eni narataem long history. Wanfala organization wea nem bilong hem Worldwatch Institute hem sei, insaed 1,900 year bifor 1914, samting olsem 30 million pipol dae long war. Bat start long 1914 go kasem year 2000, winim 100 million pipol dae long war. Trae tingim go nomoa hao staka million pipol safa tumas and kasem barava nogud samting bikos long war!

⁷ Hangre. Jesus sei: “Olketa taem bilong bigfala  hangre bae kasem plande pipol.” (Matthew 24:7) Nomata earth garem staka kaikai distaem winim enitaem bifor staka pipol hangre nomoa. Why nao olsem? Bikos olketa no garem inaf selen for peim kaikai or no garem eni ples for plantim kaikai long hem. Winim wan billion pipol laef nomoa long wan dollar evriday. World Health Organization sei evri year, staka million pikinini dae bikos olketa no garem inaf kaikai for mekem olketa stap healthy.

8, 9. Wanem nao showimaot profesi bilong Jesus abaotem olketa earthquake and sik hem kamap tru?

⁸ Earthquake. Jesus talem disfala profesi: “Olketa bigfala earthquake bae sekem staka ples.” (Luke 21:11) Evri year olketa bigfala earthquake kasem staka ples. Start long year 1900, winim tu million pipol dae long olketa earthquake. Nomata  pipol iusim technology for savve wanem taem earthquake bae happen, olketa earthquake still killim dae staka pipol.

⁹ Sik. Jesus sei pipol bae kasem “olketa barava nogud sik.” Olketa nogud sik bae kwiktaem for spred and killim dae staka pipol. (Luke 21:11) Nomata olketa doctor lane for treatim staka difren kaen sik, samfala sik no garem eni medicine for kiurim. Wanfala report sei evri year, staka million pipol dae long olketa sik, olsem TB, malaria, and cholera. Nara samting tu, olketa doctor faendem moa 30-fala niu sik, and samfala long olketa no garem eni medicine for kiurim.

10. Hao iu lukim olketa samting wea 2 Timothy 3:1-5 storyim hem happen distaem? Storyim samfala example.

¹⁰ Long 2 Timothy 3:1-5, Bible sei: “Long olketa last  day bae hem barava difren and bae evri samting hem hard tumas.” Aposol Paul storyim wei bilong pipol long olketa last day. Hem sei pipol bae

• tingim olketa seleva nomoa

• laekem tumas selen

• no obeyim dadi and mami

• no faithful

• no garem love insaed long famili

• no savve kontrolem seleva

• raf tumas

• no lovem God bat interest nomoa for enjoyim seleva

• luk olsem olketa worshipim God bat olketa nating obeyim hem

11. Olsem Psalm 92:7 talem, wanem nao bae happen long olketa nogud pipol?

¹¹ Waswe, pipol long ples bilong iu garem olketa kaen wei olsem tu? Long evri ples long world, hem nao wei bilong staka pipol. Bat  klosap nao, God bae finisim nogud pipol. Hem promis olsem: “Taem olketa nogud man kamap staka olsem rabis grass and win long olketa nogud samting wea olketa duim, datwan hem for olketa mas finis for olowe.”—Psalm 92:7, NW.

12, 13. Start long 1914, wanem nao Jehovah teachim long iumi?

¹² Bible sei long olketa last day, pipol bae safa and kasem staka nogud samting. Bat hem sei olketa gudfala samting bae happen long olketa last day tu.

¹³ Minim gud Bible. Profet Daniel sei long olketa last day, “stretfala savve bae hem staka.” (Daniel 12:4, NW) Start kam long 1914, Jehovah barava helpem pipol bilong hem, and olketa fit for minim gud olketa truth insaed Bible winim enitaem bifor. Olsem example, God teachim iumi why hem barava important for nem bilong hem kamap holy, plan bilong hem for earth, ransom, wanem hem happen long iumi taem iumi dae, and pipol wea dae bae laef bak. Iumi lanem tu Kingdom bilong God nomoa savve stretem evri problem bilong iumi, wanem nao savve mekem iumi hapi, and wanem iumi savve duim for mekem God hapi long iumi. Taem iumi savve long olketa truth hia, datwan shud mekem iumi for duim wanem? Narafala profesi bae ansarem disfala kwestin.—Lukim Endnote 21 and Endnote 25.

14. Waka for preachim gud nius abaotem Kingdom kasem olketa wanem ples, and hu nao duim disfala waka?

 ¹⁴ Preaching waka kasem evriwea long world. Jesus story olsem abaotem olketa last day: “Olketa disaepol bilong mi bae talemaot disfala gud nius abaotem Kingdom long evri ples long world.” (Matthew 24:3, 14) Olketa Jehovah’s Witness preachim gud nius abaotem Kingdom long winim 230 kantri long winim 900 languis. Olketa hia wea kam from “evri kantri and tribe” long world, gohed helpem pipol for savve wanem nao datfala Kingdom, and samting wea Kingdom hia bae duim for iumi olketa man. (Revelation 7:9) And olketa no kasem eni pei for duim disfala waka. Nomata staka pipol heitim and againstim olketa, olsem Jesus talem, no eni samting bae stopem datfala preaching waka.—Luke 21:17.

15. (a) Waswe, iu bilivim iumi stap long olketa last day, and why nao iu bilivim datwan? (b) Wanem nao bae happen long olketa wea obeyim Jehovah, and olketa wea no obeyim hem?

¹⁵ Waswe, iu bilivim iumi stap long olketa last day? Staka profesi long Bible abaotem olketa last day kamap tru nao. Klosap nao Jehovah bae talem pipol bilong hem for stop for duim datfala preaching waka, then “world bae finis.” (Matthew 24:14) Hao nao datwan bae happen? Datwan bae happen long Armageddon, taem God bae finisim evri nogud pipol. Jehovah bae iusim Jesus and olketa strongfala angel bilong hem for  finisim eniwan wea no laek for obeyim Hem and Son bilong hem. (2 Thessalonica 1:6-9) Bihaen datwan, Satan and olketa demon bae no laea moa long pipol. And evriwan wea obeyim God and wea sapotim Kingdom bilong hem bae lukim evri promis bilong God kamap tru.—Revelation 20:1-3; 21:3-5.

16. From disfala world hem klosap tumas for finis, wanem nao iu mas duim?

¹⁶ Klosap nao disfala nogud world bilong Satan bae finis. So hem barava important for tingim diswan, ‘Wanem nao mi mas duim?’ Jehovah laekem iu for gohed studyim Bible. Hem barava important for iu tinghae long datwan. (John 17:3) Evri week, Olketa Jehovah’s Witness garem olketa meeting wea savve helpem pipol for minim Bible. Hem gud sapos iu go evritaem long olketa meeting hia. (Readim Hebrew 10:24, 25.) Taem iu luksavve iu mas changem samfala samting long laef bilong iu, no fraet for duim datwan. Sapos iu duim olsem, iu bae fren gud witim Jehovah.—James 4:8.

17. Why nao staka pipol bae seke taem God finisim nogud pipol?

¹⁷ Aposol Paul sei God bae finisim nogud pipol long taem wea staka pipol no expectim, olsem taem wea “man for steal” hem kam for steal long naet. (1 Thessalonica 5:2) Jesus sei staka pipol bae ting nating long olketa samting wea pruvim iumi stap long olketa last day. Hem sei: “Taem  wea Son bilong man hem stap [wea minim, olketa last day] bae hem olsem taem bilong Noah. Bifor Flood hem kam, pipol gohed for kaikai, drink, and marit go kasem day wea Noah go insaed long ark. Olketa nating tinghae long samting wea Noah talemaot, gogo Flood hem kam nomoa and evriwan draon nao. Taem wea Son bilong man hem stap bae hem olsem tu.”—Matthew 24:37-39.

18. Wanem warning nao Jesus talem long iumi?

¹⁸ Jesus warnim iumi for no letem “wei for kaikai tumas and drink tumas witim wei for wari abaotem olketa samting wea [iumi] needim” for mekem iumi ting nating long taem wea iumi stap long hem. Hem sei taem disfala world hem finis “evriwan wea stap long disfala earth bae seke long datfala day,” olsem “wanfala animal hem seke taem hem pas insaed trap.” Then hem sei moa: “Iufala mas gohed for redi and barava prea strong evritaem mekem iufala savve ranawe from olketa samting hia wea bae happen and mekem iufala savve standap front long Son bilong man.” (Luke 21:34-36) Why nao hem barava important for obeyim datfala warning bilong Jesus? Bikos disfala nogud world bilong Satan hem klosap tumas nao for finis. Pipol wea obeyim Jehovah and Jesus nomoa bae no dae taem God finisim disfala nogud world, and bae olketa laef olowe long niu world.—John 3:16; 2 Peter 3:13.