1, 2. Wanem kwestin nao hem gud for iu tingim, and why nao diswan important?

TAEM iu studyim Bible kam kasem distaem, iu lanem hao staka pipol wea sei olketa worshipim God olketa teachim and duim samting wea God heitim. (2 Corinth 6:17) Dastawe Jehovah sei for iumi mas go aot from “Bigfala Babylon” wea hem nao evri false religion. (Revelation 18:2, 4) Each wan mas disaed sapos bae hem duim datwan or nomoa. Hem important for iu tingim diswan: ‘Waswe, mi laek for worshipim God long wei wea hem acceptim, or mi followim nomoa hao mi worshipim hem kam kasem distaem?’

² Hem gud tumas sapos iu lusim or resign finis from false religion. Bat maet iu no really let go yet long samfala kastom or celebration wea join witim false religion. Distaem bae iumi storyim samfala long olketa hia, and why hem barava important for iumi garem sem tingting olsem Jehovah abaotem olketa kastom and celebration hia.

3. (a) Why nao maet samfala faendem hem hard for stop for iusim idol and image long worship? (b) Wanem nao Bible talem abaotem wei for iusim idol and image long worship?

³ Samfala pipol garem olketa idol and image  long haos bilong olketa wea olketa iusim long worship. Sapos hem samting wea iu duim for staka year, maet iu faendem hem hard for let go long kaen samting olsem. Bat iu mas tingim diswan: Jehovah teachim iumi stretfala wei for worshipim hem. And Bible talem stret Jehovah no laekem iumi for iusim olketa idol and image long worship bilong iumi.—Readim Eksodas 20:4, 5; Sams 115:4-8; Aesaea 42:8; 1 John 5:21.

4. (a) Why nao iumi shud no worshipim olketa grani wea dae finis? (b) Why nao Jehovah talem olketa Israelite for no trae for story witim olketa wea dae finis?

⁴ Samfala pipol maet iusim taem and strong for duim olketa samting for mekem olketa grani wea dae finis for hapi. Maet olketa worshipim olketa tu. Bat iumi lanem olketa wea dae finis no savve helpem iumi or spoelem iumi. Olketa no go stap samwea bihaen olketa dae. Hem barava danger for trae for story witim olketa grani wea dae finis bikos eni message wea luk olsem eniwan kasem from olketa, really hem kam from olketa demon. Dastawe Jehovah talem olketa Israelite for mas no trae for story witim olketa wea dae finis or duim eni samting wea join witim devildevil.—Diutronomi 18:10-12. Lukim Endnote 26, and Endnote 31.

5. Wanem nao savve helpem iu for stop for iusim olketa idol long worship, or for stop for worshipim olketa grani wea dae finis?

⁵ Wanem nao savve helpem iu for stop for iusim olketa idol long worship, or for stop for worshipim olketa grani wea dae finis? Iu mas readim  Bible and tingting gud abaotem hao Jehovah ting long olketa samting hia. Jehovah “hemi barava les tumas” long olketa samting hia. (Diutronomi 27:15) Prea long Jehovah evriday for helpem iu garem sem tingting olsem hem abaotem diswan, and for helpem iu worshipim hem long wei wea hem acceptim. (Aesaea 55:9) Jehovah savve helpem iu for no fraet for lusim eni samting wea join witim false worship, so iu fit for barava trustim Hem.

6. Why nao pipol celebratem birthday bilong Jesus long December 25?

⁶ Staka pipol long world celebratem Christmas, and tingse datwan hem taem wea Jesus hem born. Bat Christmas hem join witim false worship. Wanfala encyclopedia sei pipol long Rome bifor wea no worshipim God savve celebratem birthday bilong sun long December 25. Olketa bigman bilong religion laekem pipol hia for kamap Christian so olketa disaed for celebratem birthday bilong Jesus long December 25 nomata Jesus no born long datfala day. (Luke 2:8-12) Olketa disaepol bilong Jesus no celebratem Christmas. Wanfala buk sei insaed 200 year bihaen Jesus hem born, “no eniwan savve long day wea hem born, and staka no interest tu for savve long datfala day.” (Sacred Origins of Profound Things) Pipol start for celebratem Christmas samfala handred year bihaen Jesus stap long earth.

7. Why nao olketa tru Christian no celebratem Christmas?

 ⁷ Staka pipol savve olketa samting olsem wei for wakem party and for givim present long taem bilong Christmas hem start kam from pipol wea no worshipim God. Olsem example, long England and long samfala ples long America bifor, hem tambu for celebratem Christmas bikos long datwan. Eniwan wea celebratem datwan bae olketa panisim hem. Bat gogo pipol start for celebratem Christmas moa. Why nao olketa tru Christian no celebratem Christmas? Olketa laek for mekem God hapi long evri samting wea olketa duim.

8, 9. Why nao olketa Christian long first century no celebratem birthday?

⁸ Nara samting wea staka pipol savve celebratem tu hem birthday bilong olketa. Waswe, hem stret for olketa Christian celebratem birthday? Bible storyim tufala birthday nomoa. Tufala birthday hia hem bilong tufala man wea no worshipim Jehovah. (Jenesis 40:20; Mark 6:21) Long bifor, pipol celebratem birthday for worshipim olketa false god. Dastawe olketa Christian long first century “ting long wei for celebratem birthday hem kastom bilong pipol wea no worshipim God.”—The World Book Encyclopedia.

⁹ Olketa pipol long Rome and Greece bifor bilivim each man born long sem day witim wanfala god. Olketa sei taem eniwan hem born, wanfala  spirit wea fren witim datfala god hem stap tu. And long tingting bilong pipol hia, man mas celebratem birthday mekem spirit hia gohed protectim hem.

10. Why nao olketa Christian distaem shud no celebratem birthday?

¹⁰ Waswe, iu tingse Jehovah hem acceptim olketa celebration wea join witim false religion? (Isaiah 65:11, 12, NW) Barava nomoa nao. Dastawe iumi no celebratem birthday or eni nara celebration wea join witim false religion.

11. Why nao pipol gohed keepim olketa celebration nomata olketa savve hem start kam from olketa wea no worshipim God? Wanem samting nao shud barava important long iu?

¹¹ Samfala pipol savve Christmas and olketa nara celebration hem start kam from olketa wea no worshipim God, bat olketa gohed for celebratem nomoa. Long tingting bilong olketa, taem bilong olketa celebration olsem hem chance for evriwan long famili spendem taem tugeta. Waswe, iu ting olsem tu? Hem no rong for iu laek for spendem taem witim famili bilong iu. Jehovah nao startim famili and hem laekem evriwan long famili for fren gud tugeta. (Ephesus 3:14, 15) Nomata olsem, iumi no keepim eni celebration for famili hapi long iumi, bat samting wea barava important nao hem for fren gud witim Jehovah. Dastawe aposol Paul sei: “Gohed for mek sure iufala savve long samting wea Lord hapi long hem.”—Ephesus 5:10.

12. Olketa wanem kaen celebration nao Jehovah no acceptim?

 ¹² Staka pipol tingse wea wanfala celebration start kam from hem smol samting nomoa, bat Jehovah no ting olsem. Jehovah no acceptim olketa celebration wea start kam from false worship, or wea mekhae long olketa man or kantri. Olsem example, pipol long Egypt bifor savve keepim staka celebration for mekhae long olketa false god bilong olketa. Bihaen olketa Israelite lusim Egypt, olketa followim wanfala celebration bilong olketa long Egypt and sei hem “fist for tinghae long [Jehovah].” Bat Jehovah panisim olketa bikos olketa duim datwan. (Eksodas 32:2-10) Profet Isaiah sei, “!Yufala mas no tasim enisamting wea hemi no klin long ae blong God!”—Readim Aesaea 52:11.

13. Olketa wanem kwestin nao maet iu garem taem iu disaed for stop for keepim olketa celebration olsem Christmas or birthday?

¹³ Taem iu disaed for stop for keepim olketa celebration olsem Christmas and birthday, maet iu garem staka kwestin. Olsem example: Hao nao bae mi ansarem olketa wea mi waka witim olketa sapos olketa askem mi why mi no celebratem Christmas? Waswe sapos samwan givim Christmas present long mi? Sapos marit partner bilong mi laekem mi for joinim eni celebration witim hem, bae mi hao? Wanem nao iu savve duim for mekem pikinini no sorre taem iufala no celebratem Christmas or birthday bilong hem?

14, 15. Sapos eniwan sei long iu, “Hapi Christmas!” or hem givim present long iu, wanem nao bae iu duim?

 ¹⁴ Hem important for iusim gudfala tingting mekem iu savve long wanem nao for talem and duim. Olsem example, sapos pipol sei long iu, “Hapi Christmas!” iu no need for tanem baksaed long olketa. Iu savve sei nomoa, “Thankiu.” Bat sapos eniwan laek for savve why iu no keepim samfala celebration olsem Christmas and birthday, maet iu savve explainim long hem. Bat hem gud for evritaem story long kaenfala wei and long wei wea showimaot respect. Bible sei: “Toktok bilong iufala mas evritaem kaen and olsem iufala putim solt long hem, mekem iufala savve hao for givim ansa long evri man.” (Colossae 4:6) Maet iu talem olketa iu savve enjoyim wei for spendem taem and givim present long olketa narawan bat iu no duim long taem bilong olketa celebration olsem.

¹⁵ Wanem nao bae iu duim sapos eniwan givim present long iu? Bible no putim olketa rul for olketa kaen samting olsem, bat wanem iumi disaedem mas helpem iumi for gohed garem gudfala konsens. (1 Timothy 1:18, 19) Maet samwan wea laek givim present long iu hem no savve iu no keepim datfala celebration. Or maet hem sei long iu, “Mi savve iu no keepim olketa celebration olsem, bat mi laek givim disfala present long iu.” Taem samting olsem happen, iuseleva nao savve disaed sapos iu bae acceptim  datfala present or nomoa. Nomata wanem nao iu disaedem, iu mas mek sure iu gohed for garem gudfala konsens. Iumi no laek duim eni samting wea bae spoelem wei wea iumi fren witim Jehovah.

16. Hao nao bae iu deal witim famili bilong iu sapos olketa laekem iu for celebrate witim olketa?

¹⁶ Hao nao bae iu deal witim famili bilong iu sapos olketa laekem iu for celebrate witim olketa? Hem gud for iu no raoa witim olketa. Tingim diswan: Olketa garem raet for disaedem wanem olketa laek for duim. Sapos iu laekem olketa for kaen and respectim disison bilong iu, iu tu mas duim sem samting long olketa. (Readim Matthew 7:12.) Bat sapos famili bilong iu laekem iu for spendem taem witim olketa long taem olsem, wanem nao iu shud duim? Bifor iu mekem eni disison, prea long Jehovah for helpem iu for disaedem stretfala samting. Tingting gud abaotem datwan and duim samfala research. Important samting nao, hem for evritaem duim samting for mekem Jehovah hapi.

17. Wanem nao iu savve duim for pikinini bilong iu no sorre taem hem lukim olketa narawan celebratem Christmas and birthday?

¹⁷ Wanem nao iu savve duim for pikinini bilong iu no sorre taem hem lukim olketa narawan celebratem Christmas or birthday? Samfala taem, hem gud for iu planim samfala spesol samting for olketa, and iu savve mekem olketa sapraes taem iu givim present long olketa. Wanfala best present  wea iu savve givim long olketa nao hem for iu spendem taem witim olketa and for lovem olketa.

18. Why nao iumi shud go long olketa kongregeson meeting?

¹⁸ For mekem Jehovah hapi long iumi, iumi mas lusim false religion, and tu, olketa kastom and celebration wea join witim false religion. Bat iumi mas worshipim God long stretfala wei tu. Hao nao bae iumi duim datwan? Wanfala samting wea iu savve duim hem for go evritaem long olketa kongregeson meeting. (Readim Hebrew 10:24, 25.) Olketa meeting hem barava important part long tru worship. (Sams 22:22; 122:1) Iumi savve encouragem each other taem iumi hipap tugeta.—Rome 1:12.

19. Why nao hem important for storyim long olketa narawan truth wea iu lanem long Bible?

¹⁹ Narafala samting tu hem for storyim long olketa narawan wanem iu lanem long Bible. Staka pipol feel nogud tumas long olketa nogud samting wea happen long world. Maet iu savve long samfala pipol olsem. Storyim long olketa nambawan hope bilong iu for future. Taem iu evritaem go long olketa kongregeson meeting and storyim truth wea iu lanem long Bible long narawan, gogo bae iu no laek for joinim olketa kastom and celebration wea join witim false religion. Sapos iu traem best for worshipim Jehovah long stretfala wei, iu bae hapi and Jehovah bae barava blessim iu.—Malakae 3:10.