LESON 05
Bible Hem Message From God for Iumi
Jehovah givim iumi wanfala spesol present. Hem nao Bible and hem garem 66 smol buk insaed. Bat maet iu laek savve: ‘Sapos man nao raetem Bible, why nao iumi sei hem message blo God?’ For savve lo ansa, bae iumi storyim wat nao God duim mekem iumi kasem message blo hem lo Bible.
1. Why nao iumi sei message blo God nao stap lo Bible nomata olketa man nao raetem?
Foti-fala man nao raetem Bible insaed samting olsem 1,600 year, start from 1513 B.C.E. go kasem samting olsem 98 C.E. Olketa man hia garem difren baekgraon. Nomata olsem, evri buk lo Bible no againstim each other, bikos toktok blo God nao stap lo Bible. (Readim 1 Thessalonica 2:13.) Olketa wea raetem Bible no raet followim tingting blo olketa seleva. Bat “holy spirit nao leadim olketa . . . for talemaot toktok wea kam from God.” a (2 Peter 1:21) God iusim holy spirit for leadim olketa man for raetem evri toktok blo hem.—2 Timothy 3:16.
2. Hao, Bible savve helpem evriwan?
God sei “pipol bilong evri kantri, tribe, and languis” bae kasem gud samting from message wea stap lo Bible. (Readim Revelation 14:6.) Distaem Bible hem stap lo staka languis winim eni nara buk. Klosap evriwan readim or lisin lo message wea stap lo Bible, nomata wea olketa stap or wat kaen languis olketa story lo hem.
3. Wat nao Jehovah duim for mek sure Bible stap kam kasem distaem?
Olketa man wea raetem Bible raet lo olketa samting wea savve rotten. Olketa iusim olketa scroll wea olketa wakem lo skin blo animal or stik blo wanfala plant wea olketa kolem papyrus. Bat olketa man wea tinghae lo Bible mekem olketa copy lo Bible, and mek sure olketa barava copyim stret. Nomata olketa bigman lo gavman and religion trae for distroem Bible, samfala pipol willing for putim laef blo olketa lo danger for protectim. Jehovah no letem eniwan or eniting stopem hem for story lo iumi. Bible sei: “Toktok blong God blong yumi bae hemi stap . . . olowe.”—Aesaea 40:8.
DIG GO MOA
Bae iumi storyim hao God iusim holy spirit for helpem olketa man for raetem Bible, hao hem protectim, and wanem hem duim for iumi kasem Bible.
4. Bible hem message blo God
Pleim VIDEO. Then readim 2 Timothy 3:16, and discussim tugeta olketa kwestin hia.
-
Why nao iumi sei toktok blo God nao stap lo Bible, nomata olketa man nao raetem?
-
From God iusim olketa man for raetem message blo hem insaed Bible, hao nao tingting blo iu abaotem datwan?
Secretary raetem leta, bat message insaed hem blo man wea talem hem for raetem. Semsem tu, olketa man raetem Bible bat message insaed hem blo God
5. Pipol no savve distroem Bible
From God nao givim kam Bible, hem mek sure Bible stap kam kasem distaem. History showim olketa bigman blo gavman trae for distroem Bible. Olketa bigman lo religion trae for haedem tu. Bat staka pipol putim laef blo olketa lo danger for protectim Bible, nomata pipol againstim and sei for killim olketa dae. For savve lo wanfala wea duim datwan, pleim VIDEO, then discussim tugeta olketa kwestin hia.
-
From pipol putim laef blo olketa lo danger for protectim Bible, hao datwan mekem iu laek for readim? Why nao iu ting olsem?
Readim Sams 119:97, then discussim tugeta disfala kwestin:
-
Wat nao mekem staka pipol for putim laef blo olketa lo danger for transleitim and distributim Bible?
6. Buk wea savve helpem evri pipol
Olketa transleitim Bible lo staka languis and distributim winim eni buk lo history. Readim Acts 10:34, 35, then discussim tugeta olketa kwestin hia:
-
Why nao God laekem olketa for transleitim Bible lo staka languis and for distributim?
-
Wat nao iu laekem tumas abaotem Bible?
Klosap
100%
lo population blo world
garem Bible lo languis wea olketa minim
Bible stap lo winim
3,000
languis
lo full wan or samfala part
5,000,000,000
Namba lo olketa copy blo Bible wea olketa producim,
wea winim eni nara buk
SAMFALA SAVVE TALEM: “Bible hem old buk wea man nomoa raetem.”
-
Hao nao tingting blo iu?
-
Wat nao pruv wea showim Bible hem toktok blo God?
MAIN POINT
Bible hem toktok blo God, and God mek sure iumi herem message blo hem.
Review
-
Taem iumi sei God iusim olketa man for raetem Bible, wat nao datwan minim?
-
Wat nao tingting blo iu abaotem hao olketa no distroem Bible, and hao olketa transleitim and distributim?
-
From distaem iu savve God hem mek sure iu kasem message blo hem, hao nao tingting blo iu abaotem hem?
FAENDAOT MOA
Readim story abaotem hao Bible stap lo olketa old manuscript, then gogo olketa transleitim lo staka languis.
“Wat Nao Mekem Bible Stap Kam Kasem Distaem?” (Awake!, November 2007)
Read abaotem hao Bible stap kam kasem distaem, nomata hem feisim thrifala danger.
Lukim hao pipol putim laef blo olketa lo danger for transleitim Bible.
Pipol copyim and transleitim Bible staka taem. Wat nao mekem iu sure message blo God wea stap lo Bible no change?
“Waswe, Message Insaed Bible Hem Change?” (Article lo jw.org)
Iu Laek Lukim Nara Samting?
OLKETA KWESTIN WEA STAKA PIPOL ASKEM
Wat Nao Bible Study Course blo Olketa Jehovah’s Witness?
Disfala Bible study course blo Olketa Jehovah’s Witness hem free nomoa, and iu savve iusim eni Bible transleison wea iu laekem. Iu savve invaetem olketa lo famili or eni fren blo iu for joinim disfala course.
