LESON 09
Prea Savve Mekem Iu for Fren Gud Witim God
Enitaem iu feel olsem iu needim help? Hao iu garem olketa kwestin abaotem laef wea iu laek savve lo ansa blo olketa? Iu needim samwan for comfortim or encouragem iu? Hao iu laek fren gud witim Jehovah? Prea savve helpem iu lo olketa situation olsem. Bat wat nao stretfala wei for prea? Iu tingse God lisin lo prea blo evriwan? Wat nao iu savve duim for hem lisin lo prea blo iu? Bae iumi kasem ansa lo disfala leson.
1. Hu nao iumi shud prea lo hem, and wat nao iumi savve prea abaotem?
Jesus sei iumi shud prea nomoa lo Dadi blo iumi lo heven. Jesus tu bat prea lo Jehovah. Hem sei: “Iufala mas prea long wei olsem: ‘Dadi bilong mifala long heven . . . ’” (Matthew 6:9) Taem iumi prea lo Jehovah, datwan mekem iumi fren gud witim hem.
Iumi savve prea abaotem eni samting. Bat for God ansarem iumi, iumi mas prea abaotem samting wea followim will blo hem. “Eni samting wea iumi askem wea followim tingting bilong God, God hem herem iumi.” (1 John 5:14) Jesus talem iumi olketa stret samting for prea abaotem. (Readim Matthew 6:9-13.) Iumi savve prea abaotem olketa wari blo iumi and iumi mas talem thankiu tu for olketa samting wea God duim for iumi and for prea for olketa narawan.
2. Wat nao iumi shud duim taem iumi prea?
Bible sei for “talem evri samting wea stap lo heart blo [iumi] lo [God].” (Psalm 62:8, NW) So iumi shud prea lo God from heart blo iumi. Iumi savve prea big or smol and lo eni position wea showim respect. Iumi savve prea enitaem and lo eni ples.
3. Hao nao God ansarem olketa prea blo iumi?
Hem ansarem iumi lo olketa difren wei. Jehovah givim iumi Bible, wea iumi savve faendem ansa for olketa kwestin blo iumi. For readim Bible savve “[mekem] man wea no wise for kamap wise.” (Psalm 19:7, NW; readim James 1:5.) God savve helpem iumi for garem peace lo hard taem wea iumi kasem. Hem savve iusim pipol blo hem for helpem iumi lo taem wea iumi barava needim.
DIG GO MOA
Bae iumi storyim hao iu savve talem olketa prea from heart wea God acceptim, and tu hao prea savve helpem iu.
4. Samting wea God laekem iumi for duim taem iumi prea
Wat nao bae showim sapos God acceptim prea blo iumi or nomoa? Pleim VIDEO.
Jehovah laekem iumi for prea lo hem. Readim Psalm 65:2 (NW), then discussim tugeta olketa kwestin hia:
-
Iu tingse ‘God wea savve herem prea’ laekem iu for prea lo hem? Why nao iu ting olsem?
Iumi mas trae for followim olketa standard blo God for hem herem prea blo iumi. Readim Maeka 3:4 and 1 Peter 3:12, then discussim tugeta kwestin hia:
-
Wat nao iumi savve duim for Jehovah lisin lo prea blo iumi?
Lo taem blo war, olketa army lo tufala saed savve prea lo God for win. Iu tingse hem mek sense for God ansarem prea blo tufala saed evriwan?
5. Iumi shud prea from heart
Samfala pipol lane for repeatim olketa sem prea. Bat hem nao hao God laekem iumi for prea lo hem? Readim Matthew 6:7, then discussim tugeta disfala kwestin:
-
Wat nao iu savve duim for no talem “sem samting evritaem” lo prea blo iu?
Evriday, tingim wanfala blessing wea iu kasem from Jehovah and talem thankiu lo hem for datwan. Sapos iu duim olsem for wan week, bae iu no talem sem samting lo prea blo iu, bat bae iu prea abaotem sevenfala difren samting.
Wanfala gud dadi laekem pikinini for storyim feeling blo hem. Jehovah laekem iumi for duim sem samting tu taem iumi prea
6. Prea hem present from God
Hao nao prea savve helpem iumi especially lo olketa hard taem? Pleim VIDEO.
Bible promisim hao prea savve helpem iumi for garem peace lo mind. Readim Philippi 4:6, 7, then discussim tugeta olketa kwestin hia:
-
Nomata prea hem no evritaem finisim problem blo iumi, hao nao hem savve helpem iumi?
-
Wat nao samfala samting wea iu laek for prea abaotem?
Maet iu laek savve
Datfala word “amen” savve minim “ya, hem nao.” Lo taem blo Bible, pipol savve talem datfala word “amen” lo end blo olketa prea.—Fas Kronikols 16:36.
7. Markem taem for prea
Samfala taem maet iumi busy gogo iumi forget for prea. Wat nao showim prea hem important lo Jesus? Readim Matthew 14:23 and Mark 1:35, then discussim tugeta olketa kwestin hia:
-
Wat nao Jesus duim for garem taem for prea?
-
Wat taem nao iu ting hem fitim iu for prea?
SAMFALA SAVVE TALEM: “Prea hem samting for mekem man feel gud nomoa.”
-
Wat nao bae iu talem?
MAIN POINT
Prea wea iumi talem from heart helpem iumi for fren gud witim God, garem peace lo mind, and strongim iumi for duim samting wea Jehovah hapi lo hem.
Review
-
Hu nao iumi mas prea lo hem?
-
Wat nao iumi mas duim taem iumi prea?
-
Wat nao samfala samting wea prea savve helpem iumi lo hem?
FAENDAOT MOA
Faendaot lo olketa ansa for olketa kwestin wea staka pipol garem abaotem prea.
“Sevenfala Samting Iu Need for Savve Abaotem Prea” (The Watchtower, October 1, 2010)
Read abaotem why iu shud prea and wat iu savve duim for talem olketa gudfala prea.
Read abaotem wat Bible taem abaotem hu nao iumi shud prea lo hem.
Lo disfala music video, lukim sapos ples or taem wea iumi prea hem important.
Iu Laek Lukim Nara Samting?
OLKETA KWESTIN WEA STAKA PIPOL ASKEM
Wat Nao Bible Study Course blo Olketa Jehovah’s Witness?
Disfala Bible study course blo Olketa Jehovah’s Witness hem free nomoa, and iu savve iusim eni Bible transleison wea iu laekem. Iu savve invaetem olketa lo famili or eni fren blo iu for joinim disfala course.
