LESON 12
Wat Nao Bae Helpem Iu for Gohed Studyim Bible?
Samfala maet faendem hard for studyim Bible. Bat bae iu kasem gud samting sapos iu no givap. Samfala taem, maet iu daotem sapos bae iu fit for gohed studyim Bible. Why nao hem gud for gohed study? Wat nao savve helpem iu for no givap nomata samfala againstim iu?
1. Why nao hem important for studyim Bible?
“Toktok bilong God hem laef and hem garem paoa.” (Hebrew 4:12) Bible savve helpem iu bikos hem storyim feeling and tingting blo God for iu. Hem savve helpem iu for savve lo truth wea stap lo Bible, garem wisdom, and hope. Samting wea barava important, Bible savve helpem iu for fren witim Jehovah. From Bible hem garem paoa, taem iu studyim bae hem helpem iu for garem gudfala laef.
2. Why nao hem important for luksavve truth wea stap lo Bible savve helpem iumi?
Truth wea stap insaed Bible hem olsem olketa expensive samting. Dastawe Bible encouragem iumi for “baem truth and no salem.” (Proverbs 23:23, NW) Taem iumi tinghae lo truth wea stap lo Bible, bae iumi waka hard for gohed studyim Bible nomata iumi kasem hard taem.—Readim Provebs 2:4, 5.
3. Hao nao Jehovah savve helpem iu for gohed study?
From Jehovah hem olmaeti Creator and hem fren blo iu, hem savve gud lo iu and hem laek for helpem iu for lane abaotem hem. Hem savve helpem iu for “laek duim samting and for [iu] duim datwan.” (Readim Philippi 2:13.) So sapos samfala taem iu needim help for study or for followim samting wea iu lanem, Jehovah savve helpem iu. Sapos iu kasem hard taem or pipol againstim iu, hem savve givim iu strong for winim datwan. Prea lo Jehovah evritaem for helpem iu gohed studyim Bible.—1 Thessalonica 5:17.
DIG GO MOA
Lanem samting wea iu savve duim for gohed studyim Bible nomata iu busy or narawan againstim iu. Then lanem wat Jehovah bae duim for helpem iu gohed study.
4. Bible study shud important winim eni nara samting
Samfala taem iumi maet tingse iumi busy tumas and luk olsem iumi no garem taem for studyim Bible. Wat nao savve helpem iumi? Readim Philippi 1:10, then discussim tugeta olketa kwestin hia:
-
Lo tingting blo iu, wat nao samfala “samting wea barava important” lo laef?
-
Wat nao iu savve duim for mekem Bible study blo iu hem important winim eni nara samting?
-
Sapos iu fulimap baket firstaem lo sandbis and putim go olketa ston, bae hem no fit
-
Sapos iu putim firstaem olketa ston, bae iu garem spes for putim staka sandbis. Olsem tu, sapos iu duim firstaem “olketa samting wea barava important” bae iu still garem taem for duim olketa nara samting
For iumi hapi, iumi needim God lo laef blo iumi and taem iumi studyim Bible datwan helpem iumi for savve lo God and worshipim hem. Readim Matthew 5:3, then discussim tugeta disfala kwestin:
-
Taem Bible study hem important winim eni nara samting, wat nao gud samting wea iumi savve kasem?
5. No givap nomata olketa narawan againstim iu
Samfala taem olketa narawan maet trae for discouragem iu for no studyim Bible. Lukim example blo Francesco. Pleim VIDEO, then discussim tugeta olketa kwestin hia.
-
Olsem iumi lukim lo video, wat nao olketa fren blo Francesco and mami blo hem duim taem hem storyim samting wea hem lanem lo olketa?
-
Wat nao olketa blessing wea hem kasem from hem no givap?
Readim 2 Timothy 2:24, 25, then discussim tugeta olketa kwestin hia:
-
Hao nao tingting blo famili and olketa fren blo iu abaotem samting wea iu lanem?
-
Olsem tufala verse hia storyim, wat nao iu shud duim taem samwan no hapi lo iu from iu studyim Bible? Why nao olsem?
6. Depend lo Jehovah for helpem iu
Taem iumi fren gud witim Jehovah bae iumi laekem tumas for mekem hem hapi. Nomata olsem, iumi savve faendem hard for changem samfala samting lo laef blo iumi mekem iumi followim olketa standard blo hem. Sapos iu feel olsem, no givap. Jehovah bae helpem iu. Pleim VIDEO, then discussim tugeta olketa kwestin hia.
-
Olsem iumi lukim lo video, wat nao samfala samting wea Jim changem lo laef blo hem for mekem Jehovah hapi?
-
Wat nao mekem iu tinghae lo example blo hem?
Readim Hebrew 11:6, then discussim tugeta olketa kwestin hia:
-
Wat nao bae Jehovah duim for olketa wea barava lukaotem hem, wea minim olketa wea traem best for savve lo hem and for mekem hem hapi?
-
Olsem verse hia storyim, hao, Jehovah hapi taem hem lukim iu traem best for studyim Bible? Why nao iu ting olsem?
ENIWAN MAET ASK: “Why nao iu studyim Bible witim Olketa Jehovah’s Witness?”
-
Wat nao bae iu talem?
MAIN POINT
Taem iu studyim Bible hem savve helpem iu for enjoyim laef for olowe, nomata hem no isi staka taem. Gohed depend lo Jehovah and hem bae blessim iu.
Review
-
Why nao iu tinghae tumas lo truth wea stap insaed Bible?
-
Taem iu “luksavve lo olketa samting wea barava important,” wat nao iu shud duim?
-
Why nao iu shud askem Jehovah for helpem iu for gohed studyim Bible?
FAENDAOT MOA
Read abaotem fofala samting wea helpem staka pipol for iusim gud taem blo olketa.
Lukim hao Jehovah helpem wanfala woman wea hasband blo hem no minim why hem traem best for mekem God hapi.
Lukim hao wanfala man kasem gud samting bikos waef blo hem no givap.
Samfala taem pipol accusim olketa Jehovah’s Witness and sei olketa savve separatem olketa famili. Hao datwan hem tru?
“Waswe, Olketa Jehovah’s Witness Divaedem Olketa Famili or Strongim Olketa?” (Article lo jw.org)
Iu Laek Lukim Nara Samting?
OLKETA KWESTIN WEA STAKA PIPOL ASKEM
Wat Nao Bible Study Course blo Olketa Jehovah’s Witness?
Disfala Bible study course blo Olketa Jehovah’s Witness hem free nomoa, and iu savve iusim eni Bible transleison wea iu laekem. Iu savve invaetem olketa lo famili or eni fren blo iu for joinim disfala course.
