LESON 17
Wat Nao Olketa Wei blo Jesus?
Taem iumi lane abaotem olketa samting wea Jesus talem and duim taem hem stap lo earth, iumi savve lo olketa wei blo hem wea mekem iumi laek for fren witim hem and Dadi blo hem, Jehovah. Wat nao samfala wei blo hem? And hao nao iumi savve followim olketa wei blo Jesus?
1. Why nao hem fitim for iumi sei Jesus hem olsem Dadi blo hem?
For staka billion year wea Jesus stap lo heven, hem lukluk followim olketa samting wea Dadi blo hem duim and lane from hem. From datwan, tingting and feeling blo Jesus, and olketa samting wea hem duim barava olsem God. (Readim John 5:19.) Dastawe hem fit for sei: “Man wea lukim mi hem lukim Dadi tu.” (John 14:9) Taem iu lane abaotem olketa wei blo Jesus, bae iu savve gud lo Jehovah. Example nao, wei blo Jesus for tingim pipol showim Jehovah tu hem tingim iu.
2. Wat nao Jesus duim wea showim hem lovem Jehovah?
Jesus sei: “For mekem pipol long world savve mi lovem Dadi long heven, mi duim samting wea Dadi talem long mi.” (John 14:31) Taem Jesus stap lo earth, from hem lovem tumas Dadi blo hem, hem gohed obeyim Dadi nomata lo taem wea hem no isi. And tu, from hem lovem tumas Dadi blo hem, hem evritaem laek for story abaotem hem lo pipol and for helpem olketa narawan fren witim hem.—John 14:23.
3. Wat nao Jesus duim wea showim hem lovem pipol?
Bible sei Jesus “barava hapi tumas tu long olketa pipol.” (Provebs 8:31) Hem showimaot diswan taem hem story gud lo pipol and willing for helpem olketa. Olketa mirakol wea hem duim showim hem garem paoa and sorre lo pipol tu. (Mark 1:40-42) Hem kaen lo evriwan and no fevarem eniwan. Olketa toktok wea hem talem givim comfort and hope lo evriwan wea garem gudfala heart wea lisin lo hem. Jesus willing for safa and dae bikos hem lovem iumi olketa man. Bat hem lovem tumas olketa wea followim teaching blo hem.—Readim John 15:13, 14.
DIG GO MOA
Bae iumi lanem samfala samting moa abaotem wei blo Jesus, and hao for showim love and kaen olsem hem.
4. Jesus lovem Dadi blo hem
Iumi lane for lovem God from example blo Jesus. Readim Luke 6:12 and John 15:10; 17:26. Bihaen iutufala readim each scripture discussim tugeta disfala kwestin:
-
Wat nao iumi savve duim for lovem Jehovah olsem Jesus?
Jesus lovem Dadi blo hem lo heven and story lo hem evritaem lo prea
5. Jesus tingim pipol wea needim help
Jesus no tingim hemseleva nomoa bat hem tingim nara pipol. Nomata hem taed, hem iusim taem and strong blo hem for helpem pipol. Readim Mark 6:30-44, then discussim tugeta olketa kwestin hia:
-
Lo story hia, wat nao samfala samting Jesus duim wea showim hem tingim pipol?—Lukim verse 31, 34, 41, and 42.
-
Wat nao mekem Jesus for laek helpem pipol?—Lukim verse 34.
-
From Jesus followim wei blo Jehovah, wat nao iu lanem abaotem Jehovah from olketa samting hia wea Jesus duim?
-
Hao nao iumi savve followim wei blo Jesus for tingim pipol?
6. Jesus hem kaen
Nomata Jesus no garem staka samting hem sharem samting hem garem witim nara pipol, and hem talem iumi tu for kaen lo narawan. Readim Acts 20:35, then discussim tugeta disfala kwestin:
-
Olsem Jesus talem, wat nao savve mekem iumi hapi?
Pleim VIDEO, then discussim tugeta disfala kwestin.
-
Wat nao samfala wei wea iumi savve give nomata iumi no garem staka samting?
Maet iu laek savve
Bible sei for iumi prea lo Jehovah lo nem blo Jesus. (Readim John 16:23, 24.) Taem iumi duim olsem, iumi showim iumi tinghae lo samting wea Jesus duim for helpem iumi fren witim Jehovah.
SAMFALA SAVVE TALEM: “Pipol kasem nogud samting bikos God testim olketa.”
-
From Jesus followim wei blo Dadi blo hem for tingim pipol, hao nao datwan showim Jehovah no mekem olketa nogud samting for kasem iumi?
MAIN POINT
Jesus lovem Jehovah and olketa pipol tu. From Jesus followim wei blo Dadi blo hem, taem iu gohed lane abaotem hem bae iu savve gud lo Jehovah.
Review
-
Wat nao iumi savve duim for followim example blo Jesus for lovem Jehovah?
-
Wat nao iumi savve duim for followim example blo Jesus for lovem pipol?
-
Wat nao samfala wei blo Jesus wea iu laekem tumas?
FAENDAOT MOA
Read abaotem samfala wei blo Jesus wea iumi savve followim.
“Followim Example Bilong Jesus wea . . .” (Jesus—Road, Truth, and Laef, page 317)
Read abaotem why iumi mas prea lo nem blo Jesus.
“Why Prea Long Nem Bilong Jesus?” (Wastaoa, October 1, 2008)
Hao, Bible story abaotem hao Jesus luk?
Wat nao iumi savve lanem from hao Jesus treatim olketa woman?
“God Laekem Olketa Woman for Kasem Respect” (Wastaoa, October 1, 2012)
Iu Laek Lukim Nara Samting?
OLKETA KWESTIN WEA STAKA PIPOL ASKEM
Wat Nao Bible Study Course blo Olketa Jehovah’s Witness?
Disfala Bible study course blo Olketa Jehovah’s Witness hem free nomoa, and iu savve iusim eni Bible transleison wea iu laekem. Iu savve invaetem olketa lo famili or eni fren blo iu for joinim disfala course.
