LESON 31
Wat Nao Kingdom blo God?
Kingdom blo God hem main samting wea Bible storyim. Jehovah bae iusim datfala Kingdom for mekem plan blo hem for disfala earth kamap tru. Wat nao Kingdom blo God? Hao nao iumi savve hem rul distaem? Wat nao datfala Kingdom duim finis? And wat nao bae hem duim lo future? Bae iumi kasem ansa for olketa kwestin hia lo disfala leson and leson 32 and 33.
1. Wat nao Kingdom blo God, and hu nao King blo hem?
Kingdom hem wanfala gavman wea Jehovah God nao startim. King blo datfala Kingdom, Jesus Christ, hem stap lo heven and bae hem rul kam from there. (Matthew 4:17; John 18:36) Bible talem diswan abaotem Jesus: “Bae hem King . . . for olowe.” (Luke 1:32, 33) From Jesus hem King blo Kingdom blo God, hem bae rul ovarem evriwan lo earth.
2. Hu nao olketa wea rul witim Jesus?
Jesus no rul seleva. Olketa man and woman from “evri tribe and languis and pipol and kantri . . . bae kamap olketa king for rulim disfala earth.” (Revelation 5:9, 10) Start lo taem wea Jesus kam lo earth, staka million pipol kamap disaepol blo hem. Hao, evriwan nao bae rul witim hem? Nomoa. Only 144,000 nomoa bae go lo heven for rul witim Jesus. (Readim Revelation 14:1-4.) Olketa nara Christian wea stap lo earth bae stap anda lo datfala Kingdom.—Sams 37:29.
3. Why nao Kingdom blo God hem winim olketa gavman blo man?
Nomata olketa man wea rul trae for duim olketa gud samting, olketa no garem paoa for duim evri samting wea olketa laek duim. Olketa man wea rul changem olketa maet selfish and no laek for helpem pipol. Bat Jesus wea rul lo Kingdom blo God, no enitaem bae eniwan changem hem. God hem “mekem wanfala Kingdom fo kamap wea no eniwan save spoelem enitaem.” (Daniel 2:44) Jesus bae rul ovarem full earth and hem bae treatim evri pipol semsem. From hem lovem pipol, kaen, and treatim evriwan semsem, hem bae teachim pipol for duim sem samting tu lo each other.—Readim Aesaea 11:9.
DIG GO MOA
Bae iumi storyim Kingdom blo God hem winim olketa gavman blo man.
4. Gavman wea garem paoa wea bae rul ovarem full earth
Jesus Christ garem bigfala paoa for rul winim eni man wea rul lo history. Readim Matthew 28:18, then discussim tugeta disfala kwestin:
-
Hao nao paoa blo Jesus for rul hem difren from paoa blo olketa man wea rul?
Olketa gavman blo man savve change staka taem and each wan rul ovarem lelebet part nomoa lo earth. Hao nao Kingdom blo God? Readim Daniel 7:14 (NW), then discussim tugeta olketa kwestin hia:
-
Why nao iu tingse hem gud samting for Kingdom blo God “bae no savve finis”?
-
Why nao iu tingse hem gud samting for hem rul ovarem full earth?
5. Gavman blo man need for change
Why nao Kingdom blo God mas changem olketa gavman blo man? Pleim VIDEO, then discussim tugeta kwestin hia.
-
Wat nao iumi kasem taem olketa gavman blo man rulim iumi?
Read Ecclesiastes 8:9 (NW), then discussim tugeta olketa kwestin hia:
-
Iu tingse hem gud for Kingdom blo God changem olketa gavman blo man? Why nao olsem?
6. Olketa wea rul lo Kingdom blo God minim iumi
From King blo iumi, Jesus, hem stap lo earth bifor, hem savve “minim olketa wik point blo iumi.” (Hebrew 4:15) Datfala 144,000 faithful man and woman wea Jehovah chusim olketa for rul witim Jesus, olketa kam from “evri tribe and languis and pipol and kantri.”—Revelation 5:9.
-
For savve Jesus and olketa wea rul witim hem minim feeling blo iumi and olketa problem blo iumi, hao, datwan comfortim iu? Why nao olsem?
Jehovah chusim olketa man and woman from evri difren kaen baekgraon for rul witim Jesus
7. Olketa law blo Kingdom blo God hem gud winim olketa law blo eni gavman blo man
Olketa law wea olketa gavman mekem hem for helpem and protectim olketa citizen blo olketa. Kingdom blo God tu garem olketa law wea olketa citizen blo hem mas followim. Readim 1 Corinth 6:9-11, then discussim tugeta olketa kwestin hia:
-
Iu tingse world bae hao taem evriwan followim olketa law blo God? a
-
Iu tingse hem stret for Jehovah expectim olketa citizen blo Kingdom for respectim olketa law hia? Why nao olsem?
-
Wat nao hem showim pipol wea no obeyim olketa law hia savve change?—Lukim verse 11.
Olketa law wea gavman mekem hem for helpem and protectim olketa citizen blo hem. Kingdom blo God garem olketa law wea winim olketa law hia for protectim and helpem olketa citizen blo hem
SAMFALA SAVVE TALEM: “Kingdom hem stap lo heart blo iumi.”
-
Wat nao bae iu talem?
MAIN POINT
Kingdom blo God hem wanfala gavman lo heven wea bae rulim full earth.
Review
-
Hu nao olketa wea rul lo Kingdom blo God?
-
Why nao Kingdom blo God hem winim olketa gavman blo man?
-
Wat nao samfala samting wea Jehovah expectim olketa citizen blo Kingdom for duim?
FAENDAOT MOA
Read abaotem samting wea Jesus talem abaotem ples wea Kingdom hem stap.
“Hao, Kingdom blo God Hem Stap lo Heart?” (Article lo jw.org)
Why nao Olketa Jehovah’s Witness disaed for loyal lo Kingdom blo God winim gavman blo man?
Read abaotem samting wea Bible talem abaotem 144,000 wea Jehovah chusim olketa for rul witim Jesus.
Wat nao convincim wanfala woman lo prison for luksavve God nomoa savve mekem world for garem Justice?
“Mi Faendem Ansa for Olketa Samting wea No Followim Justice” (Awake!, November 2011)
Iu Laek Lukim Nara Samting?
OLKETA KWESTIN WEA STAKA PIPOL ASKEM
Wat Nao Bible Study Course blo Olketa Jehovah’s Witness?
Disfala Bible study course blo Olketa Jehovah’s Witness hem free nomoa, and iu savve iusim eni Bible transleison wea iu laekem. Iu savve invaetem olketa lo famili or eni fren blo iu for joinim disfala course.
