LESON 39
Tingting blo God Abaotem Blood
Sapos iumi no garem blood, no eniwan lo iumi savve laef. God nao creatim iumi so hem garem raet for talem iumi hao for iusim blood. Wat nao hem talem abaotem blood? Hao, hem olraet for kaikaim blood or acceptim blood transfusion? And wat nao iu savve duim for mekem gud disison abaotem hao for iusim blood?
1. Hao nao tingting blo Jehovah abaotem blood?
Jehovah sei olsem lo olketa pipol blo hem lo Israel bifor: “Evrisamting wea hemi laef, laef blong hem hemi stap long blad blong hem.” (Levitikas 17:14) Lo tingting blo Jehovah, blood hem representim laef. From laef hem holy and hem present from God, blood tu hem holy.
2. Wat kaen wei for iusim blood nao God stopem?
No longtaem bihaen lo Flood, Jehovah talem olketa wea worshipim hem for mas no kaikaim blood. And hem talem disfala sem law lo nation blo Israel bifor. (Readim Jenesis 9:4 and Levitikas 17:10.) Bihaen Christian kongregeson hem start Jehovah talem tu disfala law. Governing body sei lo olketa Christian lo datfala taem: “Stap klia long blood.”—Readim Acts 15:28, 29.
Wat nao hem minim for stap klia lo blood? Tingim disfala example: Sapos doctor talem iu for stap klia from alcohol, bae iu no drinkim. Bat hao, bae iu kaikaim kaikai wea garem alcohol insaed or letem eniwan for injectim alcohol go lo body blo iu? Nomoa. Olsem tu, law blo Jehovah for stap klia from blood, hem minim iumi shud no drinkim blood and kaikaim meat blo animal wea olketa no aotem blood blo hem. And iumi shud no kaikaim eni kaikai wea olketa putim blood insaed.
Waswe, lo samfala treatment wea garem blood insaed and olketa operation wea doctor savve iusim blood taem olketa duim? Samfala treatment olketa barava againstim law blo God. Example nao, taem doctor givim blood transfusion hem savve iusim full blood or eniwan lo fofala main part blo blood, wea hem nao olketa red cell, white cell, platelet, and plasma. Samfala nara treatment maet olketa no againstim law blo God. Example nao, lo samfala treatment doctor savve iusim olketa blood fraction from fofala main part blo blood. And lo samfala operation doctor savve iusim blood blo man seleva. Taem iumi ting raonem olketa treatment and operation hia, man seleva nao mas mekem disison blo hemseleva. a—Galatia 6:5.
DIG GO MOA
Bae iumi storyim hao for disaedem olketa medical treatment wea iusim blood.
3. Disaedem olketa medical treatment wea Jehovah hapi lo hem
Wat nao iu savve duim for disaedem medical treatment wea iusim blood wea God hapi lo hem? Pleim VIDEO, then discussim tugeta why hem important for followim olketa step lo daon.
-
Prea for wisdom.—James 1:5.
-
Duim research for olketa Bible principle and ting raonem hao iu savve followim.—Provebs 13:16.
-
Faendaot lo olketa treatment and operation wea iu savve kasem from olketa doctor lo ples blo iu.
-
Disaedem olketa treatment wea iu bae no acceptim.
-
Mek sure disison blo iu hem mekem iu garem gudfala konsens.—Acts 24:16. b
-
For olketa samting wea iumi mas disaedem followim konsens, iumi mas luksavve no eniwan shud talem iumi wat for disaedem, nomata hasband or waef, elder, or Witness wea study witim iu.—Rome 14:12.
-
Raetem olketa disison blo iu.
4. Olketa Jehovah’s Witness faendem best treatment
Hem isi nomoa for followim law blo God abaotem blood and for kasem olketa best medical treatment wea no iusim blood. Pleim VIDEO.
Readim Titus 3:2, then discussim tugeta disfala kwestin:
-
Why nao iumi shud evritaem showimaot respect and kaen taem iumi story witim olketa doctor?
|
Christian no tekem |
Christian disaed seleva |
|---|---|
|
A. Blood plasma |
Olketa fraction from plasma |
|
B. Olketa white cell |
Olketa fraction from white cell |
|
C. Olketa platelet |
Olketa fraction from platelet |
|
D. Olketa red cell |
Olketa fraction from red cell |
5. Treatment and operation wea iusim blood fraction
Blood garem fofala main part, olketa red cell, white cell, platelet, and plasma. Olketa main part hia garem staka smol part insaed, wea olketa kolem lo olketa blood fraction. c Samfala lo olketa fraction hia olketa iusim insaed lo olketa medicine for help for faetem sik or for stopem blood for no gohed ran taem man hem garekil.
For disaedem treatment wea iusim blood fraction, each Christian mas disaed seleva followim konsens blo hem wea hem kasem training from Bible. Samfala maet disaed for no acceptim treatment or operation wea iusim olketa blood fraction. Olketa narawan maet konsens blo olketa letem olketa nomoa for acceptim olketa treatment wea iusim olketa blood fraction.
Taem iu mekem disison blo iu, tingim disfala kwestin:
-
Hao nao bae mi explainim lo doctor why mi no acceptim, or acceptim samfala treatment wea iusim olketa blood fraction?
ENIWAN MAET ASK: “Wat nao rong witim blood transfusion?”
-
Hao nao tingting blo iu abaotem blood transfusion?
MAIN POINT
Jehovah laekem iumi ting lo blood olsem samting wea holy.
Review
-
Why nao Jehovah ting lo blood olsem samting wea holy tumas?
-
Hao nao iumi savve law blo God for stap klia from blood hem apply tu lo blood transfusion?
-
Wat nao iu savve duim for mekem olketa gud disison abaotem treatment or operation wea iusim blood?
FAENDAOT MOA
Wat nao iu shud ting abaotem bifor iu disaedem sapos iu bae acceptim olketa operation wea bae iusim blood blo iuseleva?
Wat nao iu shud tingim taem iu disaed sapos bae iu acceptim olketa medical treatment wea iusim olketa blood fraction?
Wat nao mekem wanfala doctor for bilivim tingting blo Jehovah abaotem blood hem mek sense?
“Mi Acceptim Tingting Bilong God Abaotem Blood” (Wekap!, April 8, 2004)
Lukim hao olketa elder wea insaed Hospital Liaison Komiti helpem olketa brata and sista.
b Lukim point 5, “Treatment and Operation wea Iusim Blood Fraction,” and Endnote 3, “Olketa Treatment and Operation wea Iusim Blood.”
c Samfala doctor sei fofala main part blo blood hem semsem olsem olketa fraction blo blood. So iu need for explainim gud disison blo iu for no acceptim blood transfusion wea iusim full blood or olketa red cell, white cell, platelet, or plasma.
Iu Laek Lukim Nara Samting?
OLKETA KWESTIN WEA STAKA PIPOL ASKEM
Wat Nao Bible Study Course blo Olketa Jehovah’s Witness?
Disfala Bible study course blo Olketa Jehovah’s Witness hem free nomoa, and iu savve iusim eni Bible transleison wea iu laekem. Iu savve invaetem olketa lo famili or eni fren blo iu for joinim disfala course.
