Pipol evriwea lo world garem staka difren tingting abaotem alcohol. Samfala pipol laek for drink alcohol taem olketa stap witim olketa fren. Olketa narawan disaed for no drinkim eni alcohol. Samfala savve drink tumas gogo olketa daranga. Wat nao Bible talem abaotem alcohol?

1. Hao, hem rong for drinkim alcohol?

Bible no sei hem rong for drinkim alcohol. Taem Bible storyim staka gud samting wea God givim iumi, wanfala samting tu hem ‘waen wea iumi dringim fo mekem iumi hapi.’ (Sams 104:14, 15) Samfala faithful man and woman lo bifor wea Bible storyim, olketa tu drinkim alcohol.​—1 Timothy 5:23.

2. Wat nao advaes lo Bible for olketa wea disaed for drinkim alcohol?

Jehovah sei hem rong for man drinkim tumas alcohol nomata luk olsem hem no daranga, and tu, for man drink gogo hem daranga. (Galatia 5:21) Bible sei: “Yu no joenem olketa hu i spaka.” (Provebs 23:20) So if iumi disaed for drink nomata iumi stap seleva, iumi shud no drinkim tumas alcohol wea bae mekem iumi no tingting stret, no savve kontrolem toktok and wat iumi duim, or spoelem health blo iumi. If iumi no savve kontrolem haomas alcohol iumi drinkim, iumi shud stop for drinkim eni alcohol.

3. Wat nao iumi savve duim for respectim disison blo narawan abaotem alcohol?

Man seleva mas disaed if bae hem drinkim alcohol or nomoa. Iumi shud no judgem samwan wea drinkim lelebet alcohol, and tu, iumi shud no forcem samwan wea no laek for drink. (Rome 14:10) If iumi drink and hem savve kosim problem for olketa narawan, iumi shud stop for drink. (Readim Rome 14:21.) Iumi mas “no tingim [iumiseleva] nomoa, bat [iumi] mas tingim nara pipol tu.”​—Readim 1 Corinth 10:23, 24.

 DIG GO MOA

4. Disaed if bae iu drink or nomoa

Wat nao tingting blo Jesus abaotem wei for drinkim alcohol? Bae iumi storyim first mirakol blo Jesus for savve lo tingting blo hem. Readim John 2:1-11, then discussim tugeta olketa kwestin hia:

• Wat nao iumi savve lanem from disfala mirakol abaotem tingting blo Jesus lo alcohol and olketa wea drinkim?

• From Jesus sei hem no rong for drinkim alcohol, hao nao wanfala Christian shud ting lo samwan wea disaed for drink?

Nomata hem olraet for wanfala Christian drinkim alcohol, datwan no minim hem evritaem gud for hem drink. Readim Provebs 22:3, then ting raonem olketa samting lo disfala list wea maet helpem iu for disaed if bae iu drink or nomoa:

• Iu bae draev or iusim eni machine.

• Iu babule.

• Iu kasem advaes from doctor for no drinkim alcohol.

• Iu no savve kontrolem haomas alcohol iu drinkim.

• Law blo kantri stopem iu for no drinkim alcohol.

• Iu stap witim samwan wea disaed for no drink from hem no savve kontrol saed lo alcohol bifor.

Hao, iu shud provaedem alcohol lo wedding reception or lo eni nara party? For lukim wat nao savve helpem iu for disaed, pleim VIDEO.

Readim Rome 13:13 and 1 Corinth 10:31, 32. Bihaen iutufala readim each scripture, discussim tugeta disfala kwestin:

• Taem iu followim principle hia, hao nao hem savve helpem iu for mekem disison wea Jehovah bae hapi lo hem?

 5. Disaedem haomas alcohol bae iu drinkim

If iu disaed for drinkim alcohol, tingim diswan: Jehovah sei hem olraet for drinkim alcohol, bat hem sei hem rong for drinkim tumas alcohol. Why nao olsem? Readim Hosia 4:11, 18, then discussim tugeta disfala kwestin:

• Wat nao savve happen taem samwan drinkim tumas alcohol?

Wat nao savve helpem iumi for no drinkim tumas alcohol? Iumi mas balance, or luksavve lo limit blo iumi. Readim Provebs 11:2, then discussim tugeta disfala kwestin:

• Why nao hem gud for markem haomas alcohol bae iu drinkim?

6. Samting wea savve helpem samwan for no drinkim tumas alcohol

 MAIN POINT

Jehovah givim alcohol for iumi enjoyim, bat hem sei hem rong for drinkim tumas alcohol and for daranga.

Review

• Wat nao Bible talem abaotem alcohol?

• Wat nao olketa nogud samting wea savve kasem samwan wea drinkim tumas alcohol?

• Wat nao iumi savve duim for respectim disison blo narawan abaotem wei for drinkim alcohol?