LESON 48
Chusim Gud Olketa Fren blo Iu
Olketa gud fren savve mekem iumi hapi and helpem iumi taem iumi feisim olketa challenge. Bat Bible warnim iumi hao no evriwan olketa gud fren. So hao nao iu savve chusim gud olketa fren blo iu? Distaem iumi storyim olketa kwestin hia.
1. Hao nao olketa fren wea iu chusim savve influencim iu?
Pipol wea iumi spendem taem witim olketa savve influencim iumi lo gud or nogud wei, nomata lo social media. Dastawe Bible sei, “fren wetem waes man, bae yu waes. Fren wetem krangge man [olketa wea no lovem Jehovah], bae yu safa.” (Provebs 13:20) Olketa fren wea lovem and worshipim Jehovah savve helpem iu for fren gud witim God and for mekem olketa gud disison. Bat if iu fren gud witim pipol wea no worshipim Jehovah datwan savve spoelem frenship blo iu witim Hem. Dastawe Bible encouragem iumi for chusim gud olketa fren blo iumi! Taem iumi fren gud witim pipol wea lovem God, bae iumi kasem gud samting and olketa tu. Iumi savve “encouragem and strongim each other.”—1 Thessalonica 5:11.
2. Hao, olketa fren iumi chusim hem important lo Jehovah?
Jehovah hem chusim gud olketa fren blo hem. Bible sei, “Hemi [fren gud witim] olketa stretfala man.” (Provebs 3:32) Hao nao feeling blo Jehovah if iumi chusim olketa fren wea no lovem hem? Bae hem barava feel nogud! (Readim James 4:4.) Bat Jehovah bae hapi and fren witim iumi if iumi fren witim pipol wea lovem hem, and no fren witim nogud pipol.—Sams 15:1-4.
DIG GO MOA
Bae iumi storyim why hem important for chusim gud olketa fren blo iumi and wat iu savve duim for garem olketa gud fren.
3. No fren witim pipol wea garem nogud wei
Iumi no laek fren witim pipol wea no lovem God and no followim standard blo hem. Pleim VIDEO, then discussim tugeta disfala kwestin.
-
Wat nao maet iumi duim wea iumi no luksavve dat iumi associate witim nogud pipol?
Readim 1 Corinth 15:33, then discussim tugeta olketa kwestin hia:
-
Wat kaen pipol nao iu ting hem nogud for iu associate witim? Why nao olsem?
Readim Sams 119:63, then discussim tugeta disfala kwestin:
-
Hu nao iu shud chusim for fren blo iu?
Wanfala rotten apple savve spoelem evri apple. Hao nao maet wanfala fren blo iu wea garem nogud wei savve influencim iu?
4. Iumi savve fren gud witim olketa difren pipol
Bible storyim David and Jonathan, tufala man blo Israel bifor. Age blo Jonathan hem winim David and hem son blo King. Nomata olsem, tufala fren gud tugeta. Readim Fas Samuel 18:1, then discussim tugeta disfala kwestin:
-
Hao nao scripture hia showim iumi savve fren witim pipol wea age and baekgraon blo olketa difren?
Readim Rome 1:11, 12, then discussim tugeta disfala kwestin:
-
Wat nao olketa fren wea lovem Jehovah savve duim for encouragem each other?
Lo disfala video, lukim hao wanfala young brata faendem olketa fren lo ples wea hem no expectim. Pleim VIDEO, then discussim tugeta olketa kwestin hia.
-
Olsem iumi lukim lo video, why nao parents blo Akil story lo hem abaotem olketa fren blo hem lo skul?
-
Why nao hem laekem olketa fren blo hem lo skul?
-
Wat nao hem duim for no lonely tumas?
5. Wat iu savve duim for garem olketa gud fren
Bae iumi storyim hao iu savve faendem olketa gud fren and wat iu savve duim for fren gud witim olketa narawan. Pleim VIDEO.
Readim Provebs 18:24 and 27:17, then discussim tugeta olketa kwestin hia:
-
Wat nao olketa gud fren duim for helpem each other?
-
Hao, iu garem olketa gud fren olsem? If nomoa, wat nao iu savve duim for garem olketa gud fren?
Readim Philippi 2:4, then discussim tugeta disfala kwestin:
-
For garem olketa gud fren, iu tu mas fren gud witim olketa narawan. Hao nao iu savve duim datwan?
For garem olketa gud fren, iu tu mas fren gud witim olketa narawan
SAMFALA SAVVE TALEM: “Iu savve fren witim eniwan nomoa.”
-
Wat nao bae iu talem?
MAIN POINT
Taem iumi chusim gud olketa fren, iumi mekem Jehovah hapi and bae iumi kasem gud samting.
Review
-
Why nao olketa fren wea iumi chusim hem important lo Jehovah?
-
Wat kaen pipol nao iumi shud no fren witim?
-
Wat nao iumi savve duim for fren gud witim pipol wea lovem Jehovah?
FAENDAOT MOA
Read abaotem hao olketa gud fren savve helpem iumi taem iumi kasem hard taem.
“Duim Samting for Strongim Wei wea Iumi Fren Gud Tugeta Bifor End Kam” (Wastaoa, November 2019)
Read abaotem olketa samting iu savve duim for garem olketa gud fren.
Wat nao iu shud savve lo hem abaotem online frenship?
Lo datfala story, “Mi Laekem Tumas for Garem Wanfala Dadi,” read abaotem wat wanfala man duim for chusim moa olketa fren blo hem.
Iu Laek Lukim Nara Samting?
OLKETA KWESTIN WEA STAKA PIPOL ASKEM
Wat Nao Bible Study Course blo Olketa Jehovah’s Witness?
Disfala Bible study course blo Olketa Jehovah’s Witness hem free nomoa, and iu savve iusim eni Bible transleison wea iu laekem. Iu savve invaetem olketa lo famili or eni fren blo iu for joinim disfala course.
