LESON 53
Chusim Entertainment wea Mekem Jehovah Hapi
Jehovah hem “datfala hapi God.” (1 Timothy 1:11) Hem laekem iumi for hapi and for enjoyim laef. Hem hapi if iumi markem taem for rest from waka. Lo disfala leson, iumi bae storyim wat iumi savve duim for enjoyim datfala taem and duim samting wea Jehovah hapi lo hem.
1. Wat nao iumi shud tingim taem iumi chusim entertainment?
Wat nao iu laek for duim taem iu rest? Samfala laek for stap lo haos nomoa and readim buk, herem music, watch movie, or lukluk lo Internet. Olketa narawan laek for wakabaot witim fren blo olketa lo bush, swim lo sea or river, or pleim sports. Nomata wat kaen entertainment nao iumi chusim, iumi need for mek sure hem “samting wea Lord hapi long hem.” (Ephesus 5:10) Hem important for iumi duim datwan bikos staka entertainment distaem mekhae lo olketa samting wea Jehovah heitim olsem violence, for durong, or spiritism. (Readim Psalm 11:5, NW.) Wat nao bae helpem iumi for chusim gud entertainment?
If iumi garem olketa fren wea lovem Jehovah, olketa savve helpem iumi for chusim gud entertainment. Iumi lanem finis lo leson 48, man wea “fren wetem waes man, bae [hem] waes.” Bat if iumi associate evritaem witim pipol wea no followim standard blo God, “bae [iumi] safa.”—Provebs 13:20.
2. Why nao hem important for kontrolem taem wea iumi spendem lo entertainment?
Nomata entertainment wea iumi chusim hem gud wan, iumi need for careful for no spendem tumas taem lo datwan. Nogud nao iumi no garem taem for duim olketa important samting. Bible sei for iumi “iusim gud taem bilong [iumi].”—Readim Ephesus 5:15, 16.
DIG GO MOA
Bae iumi storyim hao for chusim gud entertainment.
3. No chusim entertainment wea nogud
Why nao iumi shud chusim gud entertainment? Pleim VIDEO, then discussim tugeta olketa kwestin hia.
-
Hao nao olketa game lo Rome bifor hem semsem olsem samfala entertainment distaem?
-
Olsem iumi lukim lo video, wat nao Danny lanem abaotem entertainment?
Readim Rome 12:9, then discussim tugeta disfala kwestin:
-
Hao nao verse hia savve helpem iu for chusim gud entertainment?
Wat nao samfala samting wea Jehovah heitim? Readim Provebs 6:16, 17 and Galatia 5:19-21. Bihaen iutufala readim each scripture, discussim tugeta disfala kwestin:
-
Which wan lo olketa samting wea olketa verse hia storyim nao staka entertainment distaem garem?
Hao for chusim gud entertainment
Tingim olketa kwestin hia:
-
Wat? Hao, hem mekhae lo eniting wea Jehovah heitim?
-
Taem? Hao, hem mekem iu no garem taem for duim olketa important samting?
-
Hu? Hao, hem mekem mi associate witim pipol wea no lovem Jehovah?
Hem gud for draeva no draev klosap tumas lo ples wea danger. Dastawe iumi shud no duim eni entertainment wea maet iumi savve bae hem spoelem iumi
4. Iusim gud taem blo iu
Pleim VIDEO, then discussim tugeta disfala kwestin.
-
Nomata brata lo video no watchim eni nogud movie, hao nao datwan stealim taem blo hem?
Readim Philippi 1:10, then discussim tugeta disfala kwestin:
-
Hao nao disfala verse savve helpem iumi for disaedem haomas taem iumi spendem lo entertainment?
5. Chusim entertainment wea gud
Nomata samfala entertainment Jehovah no hapi lo hem, staka entertainment stap wea iumi savve enjoyim. Readim Eklesiastes 8:15 and Philippi 4:8, then discussim tugeta disfala kwestin:
-
Wat nao samfala gud entertainment wea iu laekem?
Staka entertainment stap wea iu savve enjoyim
SAMFALA SAVVE TALEM: “No eniting rong witim entertainment wea mekhae lo violence, for durong, or spiritism, hard for mi duim ia.”
-
Wat nao bae iu talem?
MAIN POINT
Jehovah laekem iumi for chusim entertainment wea gud mekem iumi enjoyim.
Review
-
Wat kaen entertainment nao olketa Christian shud no duim?
-
Why nao iumi shud careful lo haomas taem iumi spendem lo entertainment?
-
Hao, iu laek for chusim entertainment wea mekem Jehovah hapi? Why nao olsem?
FAENDAOT MOA
Read abaotem hu nao responsible for chusim entertainment for iumi.
“Waswe, Olketa Jehovah’s Witness Tambuim Samfala Movie, Buk, or Song?” (Article lo jw.org)
Read abaotem samting wea savve helpem iu for chusim gud entertainment.
“Waswe, Iu Chusim Gudfala Hapitaem?” (Wastaoa, October 15, 2011)
Lo datfala story, “Mi No Heitim Nao Pipol From Difren Ples,” read abaotem why wanfala man changem olketa entertainment blo hem.
“Bible Changem Laef Bilong Pipol” (The Watchtower, February 1, 2010)
Lukim hao wanfala mami disaed for no watchim movie wea mekhae lo spiritism.
Iu Laek Lukim Nara Samting?
OLKETA KWESTIN WEA STAKA PIPOL ASKEM
Wat Nao Bible Study Course blo Olketa Jehovah’s Witness?
Disfala Bible study course blo Olketa Jehovah’s Witness hem free nomoa, and iu savve iusim eni Bible transleison wea iu laekem. Iu savve invaetem olketa lo famili or eni fren blo iu for joinim disfala course.
