Nomata iumi lovem Jehovah tumas and traem best for no duim eni samting wea bae mekem hem feel nogud, samfala taem iumi savve mekem mistek. Bat samfala mistek hem big winim olketa narawan. (1 Corinth 6:9, 10) If iu duim bigfala sin, remember Jehovah still lovem iu, hem willing for forgivim and helpem iu.

1. Wat nao iumi mas duim mekem Jehovah forgivim iumi?

Olketa wea lovem Jehovah sorre tumas taem olketa savve olketa duim bigfala sin. Bat olketa kasem comfort from toktok wea Jehovah talem lo pipol blo hem wea sei: “Nomata sin blong yufala hemi barava had tumas for aotem olsem blad long waet kaleko, bat mi save mekem yufala fo kamap barava klin nomoa olsem snou.” (Aesaea 1:18) If iumi repent, Jehovah bae forgivim iumi. Wat nao showim iumi repent? Iumi sorre for wat iumi duim and stop for duim datwan, and askem Jehovah for forgivim iumi. Then iumi waka hard for changem tingting blo iumi, olketa samting wea savve mekem iumi for duim sin, and traem best for followim standard blo Jehovah.​—Readim Aesaea 55:6, 7.

2. Hao nao olketa elder savve helpem iumi taem iumi duim big sin?

If iumi duim big sin, Jehovah talem iumi for “askem olketa elder long kongregeson for helpem [iumi].” (Readim James 5:14, 15.) Olketa hia lovem Jehovah and olketa brata and sista. Olketa kasem training for helpem iumi fren bak moa witim Jehovah.​—Galatia 6:1.

Wat nao olketa elder duim for helpem iumi if iumi duim big sin? Tu or thrifala elder bae iusim Bible for helpem iumi luksavve wat iumi duim hem no stret. Olketa bae givim tu advaes for helpem iumi for no duim moa datwan. Olketa maet disaed for iumi no duim samfala samting lo kongregeson for lelebet taem go kasem taem iumi fren gud bak witim Jehovah. If eniwan duim big sin and hem no repent, olketa elder bae disfellowshipim hem mekem hem no spoelem olketa lo kongregeson.

 DIG GO MOA

3. Taem iumi confess lo Jehovah bae iumi fren bak witim hem

Eni sin wea iumi duim hem mekem Jehovah feel nogud, so hem fitim for iumi confess lo hem. Readim Sams 32:1-5, then discussim tugeta disfala kwestin:

• Why nao hem important for confessim olketa sin blo iumi lo Jehovah and no trae for haedem?

 4. Arrangement for disfellowship hem helpem evriwan

If eniwan duim bigfala sin and hem les for followim olketa standard blo Jehovah, bae hem disfellowship. From hem disfellowship, iumi bae no associate and no story witim hem. Readim 1 Corinth 5:6, 11 and 2 John 9-11, then discussim tugeta disfala kwestin:

• Lelebet yeast nomoa savve mekem flaoa for rise, hao nao wei for associate witim samwan wea disfellowship savve spoelem kongregeson?

 MAIN POINT

If iumi duim wanfala big sin bat iumi repent and stop for duim datwan, Jehovah bae forgivim iumi.

Review

• Why nao hem gud for iumi confessim olketa sin blo iumi lo Jehovah?

• Wat nao iumi mas duim mekem Jehovah forgivim iumi?

• If iumi duim wanfala big sin, why nao iumi shud story lo olketa elder?