LESON 2
Hu Nao God?
1. Why nao hem fitim for iumi worshipim God?
Hem fitim for iumi worshipim God nomoa bikos hem nao givim iumi laef. Trufala God nao hem wakem evri samting. Hem no garem start and bae hem stap for olowe. (Psalm 90:2) Gud nius wea stap long Bible hem kam from God. (1 Timothy 1:11)—Readim Revelation 4:11.
2. Wanem nao Bible talem abaotem God?
No eni man hem lukim God enitaem bikos hem wanfala Spirit, wea datwan minim God no garem body olsem iumi olketa man. (John 1:18; 4:24) Nomata iumi no lukim hem, iumi savve lane abaotem olketa wei bilong God taem iumi lukluk long olketa samting wea hem wakem. Olsem taem iumi lukluk long olketa difren kaen frut and olketa flaoa, iumi savve God hem garem wisdom and love. Taem iumi tingim size bilong disfala universe, iumi savve God hem garem paoa.—Readim Rome 1:20.
Iumi savve lanem staka samting moa abaotem olketa wei bilong God taem iumi readim Bible. Olsem example, Bible storyim wanem God laekem and no laekem, hao hem deal witim pipol and wanem hem duim taem pipol duim gud samting or nogud samting.—Readim Psalm 103:7-10.
3. Waswe, God hem garem nem?
Jesus hem sei: “Dadi bilong mifala long heven, mifala laekem nem bilong iu for holy.” (Matthew 6:9) Nomata God garem staka title, hem garem wanfala nem nomoa. Long evri languis olketa garem difren wei for talem datfala nem. Long Pijin samfala sei “Jehovah,” bat samfala sei “Yawe.”—Readim Psalm 83:18.
Long staka Bible olketa aotem disfala nem Jehovah and changem witim olketa title olsem Lord or God. Bat long firstaem wea olketa raetem Bible, nem bilong God hem stap insaed Bible klosap 7,000 taem. Taem Jesus teachim pipol abaotem God hem talemaot nem bilong God long olketa.—Readim John 17:26.
Watchim disfala video Waswe, God Hem Garem Nem?
4. Waswe, Jehovah hem lovem iumi?
Olsem disfala dadi wea lovem pikinini bilong hem, God hem sorre taem hem lukim iumi safa
Waswe, wei wea staka pipol safa hem minim Jehovah hem God wea no lovem iumi? Samfala pipol sei God mekem iumi safa bikos hem laek for traem iumi, bat datwan hem no tru.—Readim James 1:13.
God letem iumi olketa man for disaedem samting, wea datwan showimaot hem respectim iumi. Iumi barava tinghae long wei wea God letem iumi for disaed for worshipim hem. (Joshua 24:15) Bat staka pipol disaed for duim olketa nogud samting long olketa narawan, and datwan mekem staka pipol for safa. Jehovah sorre tumas for lukim olketa nogud samting olsem.—Readim Genesis 6:5, 6.
Jehovah hem God wea lovem iumi. Hem laekem iumi for enjoyim laef. Klosap nao bae hem finisim wei for safa and pipol wea kosim datwan. Bat bifor hem duim datwan, hem garem gudfala reason for letem wei for safa gohed for lelebet taem. Long Leson 8, bae iumi lanem wanem nao datfala reason.—Readim 2 Peter 2:9; 3:7, 13.
5. Wanem nao iumi savve duim for fren gud witim God?
Jehovah laekem iumi for prea long hem mekem iumi fren witim hem. Hem interest long iumi wanwan. (1 John 5:14) Hem willing for forgivim iumi. Nomata samfala taem iumi duim samting wea no mekem hem hapi, God luksavve iumi traem best for duim stret samting. So nomata iumi no perfect iumi savve fren gud witim God.—Readim Psalm 103:12-14; James 4:8.
From Jehovah nao givim iumi laef, iumi shud lovem hem winim eni narawan. (Mark 12:30) Iu savve showimaot iu lovem God taem iu lane moa abaotem hem and duim wanem hem laekem. Datwan bae mekem iu fren gud witim hem.—Readim 1 Timothy 2:4; 1 John 5:3.
