God wea hem nao wakem iumi hem wise winim iumi. From hem Dadi wea lovem iumi hem laek for helpem iumi. And tu, hem wakem iumi long wei wea iumi needim hem for helpem iumi. (Jeremiah 10:23) Iumi evriwan needim God for helpem iumi, semsem olsem wanfala pikinini wea needim mami and dadi for helpem hem long laef. (Isaiah 48:17, 18) Present wea iumi kasem from God hem olketa Bible principle wea savve helpem iumi.​—Readim 2 Timothy 3:16.

Olketa law and principle bilong Jehovah helpem iumi for savve long best samting for duim long laef distaem and wanem for duim for kasem olketa blessing wea no savve finis long future. From God nao wakem iumi, hem fitim for iumi tinghae long olketa law and principle bilong hem and hapi for followim.​—Readim Psalm 19:7, 11; Revelation 4:11.

Olketa Bible principle hem olketa main truth wea stap long Bible. Bat olketa law stap for deal witim wanfala samting wea happen. (Deuteronomy 22:8) Iumi mas ting raonem wanfala principle for luksavve hao nao bae hem fitim wanfala samting wea happen. (Proverbs 2:10-12) Olsem example, Bible sei laef hem wanfala present from God. Datfala principle hem savve helpem iumi for duim samting for protectim iumi long waka, long haos, and taem iumi travel.​—Readim Acts 17:28.

Jesus storyim tufala principle wea barava important. First principle hem showimaot why God givim laef long iumi. Hem  nao for savve long God, lovem hem, and for worshipim hem. Iumi shud tingim disfala principle taem iumi mekem eni disison. (Proverbs 3:6) Olketa wea followim disfala principle, olketa fren gud witim God, kasem trufala hapi, and bae kasem laef olowe.​—Readim Matthew 22:36-38.

Mek-tu principle savve helpem iumi for stap gud witim olketa narawan. (1 Corinth 13:4-7) Iumi followim disfala principle taem iumi followim example bilong God long hao iumi showimaot love long nara pipol.​—Readim Matthew 7:12; 22:39, 40.

Olketa Bible principle helpem olketa famili for showimaot love mekem olketa stap gud tugeta. (Colossae 3:12-14) Nara Bible principle hem for tufala wea marit mas stap tugeta for olowe. Datwan hem savve protectim olketa famili.​—Readim Matthew 19:5.

Taem iumi followim olketa principle wea stap long Bible, datwan savve helpem iumi for no wari tumas abaotem olketa material samting and for iumi hapi. Olsem example, olketa boss savve laekem olketa wakaman wea honest and waka hard from olketa followim olketa Bible principle. (Proverbs 10:4, 26; Hebrew 13:18) Olketa Bible principle helpem iumi for no warim olketa samting wea iumi no needim and for luksavve wei wea iumi fren witim God nao hem important winim olketa material samting.​—Readim Matthew 6:24, 25, 33; 1 Timothy 6:8-10.

Taem iumi followim olketa Bible principle datwan savve protectim health bilong iumi. (Proverbs 14:30; 22:24, 25) Olsem example, taem iumi followim wanem Bible talem for no ova tumas long alcohol, datwan protectim iumi from olketa nogud sik and accident. (Proverbs 23:20) Jehovah no stopem iumi for drinkim alcohol bat sapos iumi drinkim, iumi mas no ova tumas. (Psalm 104:15; 1 Corinth 6:10) Olketa principle bilong God helpem iumi for garem gudfala tingting, and tu, for duim stretfala samting. (Psalm 119:97-100) Olketa tru Christian no followim wanem God talem for kasem gud samting for olketa seleva nomoa, bat olketa duim olsem for praisem Jehovah.​—Readim Matthew 5:14-16.