Kingdom bilong God hem wanfala gavman long heven. Datfala gavman bae finisim evri gavman long earth and God bae iusim datfala gavman for mekem plan bilong hem for heven and earth kamap tru. Datwan hem wanfala gud nius from God. Kingdom bilong God nao hem gavman wea olketa man needim. Klosap nao datfala Kingdom bae mekem evri pipol long earth for garem wan mind.​—Readim Daniel 2:44; Matthew 6:9, 10; 24:14.

2Wanfala kingdom hem mas garem king. Jehovah markem Son bilong hem, Jesus Christ, for King long Kingdom bilong Hem.​—Readim Revelation 11:15.

Watchim disfala video Wanem Nao Kingdom Bilong God?

Son bilong God hem nambawan King bikos hem kaen and strong for duim stret samting. (Matthew 11:28-30) And tu, hem garem paoa for helpem pipol bikos hem bae stap long heven and rulim disfala earth. Bihaen Jesus laef bak, hem go ap long heven and sidaon and weit long raet saed bilong Jehovah. (Hebrew 10:12, 13) Gogo, God givim paoa long hem for rul.​—Readim Daniel 7:13, 14.

Wanfala sekson wea olketa kolem “olketa holy wan” nao bae rul witim Jesus long heven. (Daniel 7:27) Olketa first wan long olketa holy wan hia wea Jesus chusim, hem olketa faithful aposol bilong hem. Kam kasem distaem, Jehovah hem gohed for chusim olketa faithful man and woman for  kamap olketa holy wan olsem. Olsem Jesus, body wea olketa holy wan laef bak long hem, hem spirit.​—Readim John 14:1-3; 1 Corinth 15:42-44.

Haomas pipol nao bae go long heven? Jesus kolem olketa “smol sekson.” (Luke 12:32) Datfala sekson bae hem kasem 144,000. Olketa bae rulim earth witim Jesus.​—Readim Revelation 14:1.

Kingdom bilong God hem start for rul long 1914. * First samting wea Jesus duim bihaen hem kamap King, hem torowem Satan and olketa demon bilong hem kam daon long earth. Satan hem kros fogud and kosim trabol for pipol long earth. (Revelation 12:7-10, 12) Start long datfala taem, hard taem wea olketa man kasem hem kamap worse tumas. Olketa samting olsem war, bigfala hangre, olketa nogud sik, and olketa earthquake hem part long wanfala saen wea showimaot klosap nao Kingdom bae stretem evri samting long earth.​—Readim Luke 21:7, 10, 11, 31.

Preaching waka wea gohed long full world distaem anda long Kingdom bilong God hem hipimap wanfala big crowd wea garem wan mind. Staka million pipol nao insaed datfala big crowd wea laek for stap anda long Kingdom bilong God wea Jesus hem King long hem. Kingdom bilong God bae protectim olketa taem hem finisim disfala nogud world. Evriwan wea laek for kasem gud samting from Kingdom bilong God mas lane for obeyim Jesus.​—Readim Revelation 7:9, 14, 16, 17.

Datfala Kingdom bae mekem plan bilong God for olketa man kamap tru insaed 1,000 year. Full earth bae kamap paradaes. Then Jesus bae givim bak datfala Kingdom go long God. (1 Corinth 15:24-26) Waswe, iu tingim eniwan wea iu laek for storyim Kingdom bilong God long hem?​—Readim Psalm 37:10, 11, 29.