Jehovah givim earth long olketa man. Hem hom bilong iumi. God no wakem Adam and Eve for stap long heven. Hem wakem olketa angel nao for stap long there. (Job 38:4, 7) God putim Adam long wanfala paradaes long garden bilong Eden. (Genesis 2:15-17) Jehovah givim hem and olketa pikinini bilong hem chance for laef olowe long earth.​—Readim Psalm 37:29; 115:16.

Long datfala taem, garden bilong Eden nomoa hem paradaes. God talem Adam and Eve for garem pikinini and fulimap earth. Then gogo tufala bae lukaftarem disfala earth and mekem full earth kamap paradaes. (Genesis 1:28) No enitaem disfala earth bae finis. Hem bae hom bilong olketa man for olowe.​—Readim Psalm 104:5.

Watchim disfala video Why Nao God Wakem Earth?

Adam and Eve no obeyim God, so Jehovah aotem tufala from datfala garden bilong Eden. Datfala paradaes hem nomoa nao, and olketa man no fit for mekem earth kamap paradaes moa. Start long datfala taem, earth hem fulap witim staka nogud pipol.—Job 9:24.​—Readim Genesis 3:23, 24.

Waswe, Jehovah forgetim nao plan bilong hem for disfala earth? Nomoa! Hem nao Olmaeti God and plan bilong hem bae kamap tru. (Isaiah 45:18) Bae hem mekem laef bilong olketa man kamap gud moa olsem hem planim long firstaem.​—Readim Psalm 37:11, 34.

Taem Jesus hem rul earth bae kamap Paradaes. Long war wea Bible kolem Armageddon, Jesus bae leadim olketa angel bilong God for finisim evriwan wea againstim God. Then Jesus bae torowem Satan insaed datfala hol wea deep tumas  and hem bae stap long there for 1,000 year. Pipol bilong God bae no dae long datfala war bikos Jesus bae leadim and protectim olketa. Olketa bae laef olowe long Paradaes long earth.​—Readim Revelation 20:1-3; 21:3, 4.

Wanem taem nao God bae finisim olketa nogud samting wea gohed long earth? Jesus talem wanfala “saen” wea showimaot taem wea end hem kakam klosap. Olketa nogud samting wea happen long world distaem hem mekem laef bilong olketa man stap long danger, and datwan showimaot iumi stap long taem wea “world hem gogo for finis.”​—Readim Matthew 24:3, 7-14, 21, 22.

Jesus bae rul ovarem earth for 1,000 year. Long datfala taem nao bae hem finisim wei for safa. (Isaiah 9:6, 7; 11:9) Jesus hem King and hem Hae Priest tu. From hem Hae Priest, bae hem finisim sin bilong olketa wea lovem God. So God bae iusim Jesus for finisim sik, wei for olo, and dae.​—Readim Isaiah 25:8; 33:24.

Pipol wea obeyim God bae stap long Paradaes. (1 John 2:17) Jesus sendem olketa follower bilong hem for lukaotem pipol wea hambol and for teachim olketa for duim wanem God laekem. Distaem staka million pipol waka hard for duim wanem Jehovah laekem mekem olketa fit for stap long Paradaes long earth. (Zephaniah 2:3) Long olketa Kingdom Hall bilong Olketa Jehovah’s Witness, pipol lanem hao for kamap gudfala hasband and dadi and hao for kamap gudfala waef and mami. Olketa pikinini witim dadi and mami worship tugeta and wanem olketa lanem from Bible helpem olketa for garem gudfala laef.​—Readim Micah 4:1-4.