Taem hasband and waef garem baby hem mekem tufala hapi fogud, bat hem big change tu for tufala. Sapos iu and marit partner bilong iu just garem baby, maet iutufala luksavve hao iutufala mas iusim plande taem and strong for lukaftarem hem. Maet hem isi for iutufala savve kros long each other from iutufala no savve sleep gud and from iutufala warim olketa samting for baby. Iutufala evriwan mas changem samfala samting mekem iutufala lukaftarem gud baby and for iutufala stap hapi tugeta. Long wanem wei nao Bible savve helpem iu for deal witim olketa samting hia?

BIBLE HEM SEI: “Man wea garem love hem patient and kaen.” And tu, hem ‘no tingim hemseleva nomoa, and no kwiktaem for kros.’ (1 Corinth 13:4, 5) Hem normal samting nomoa for wanfala mami tingim olowe baby bilong hem. Bat from iu wanfala waef tu, iu mas luksavve hasband bilong iu maet feel olsem iu no tingim hem nao, so iu mas tingim hem tu. Taem iu patient and kaen, datwan bae helpem hem for luksavve iu needim hem and iu laekem iutufala evriwan for lukaftarem baby.

Bible sei tu: “Iufala olketa hasband mas gohed minim gud waef bilong iufala.” (1 Peter 3:7) Hem gud for iu luksavve waef bilong iu bae iusim strong bilong hem for lukaftarem baby. Distaem hem garem narawan tu for tingim and maet hem taed fogud or wari. Maet samfala taem hem kros long iu, bat trae for no kros tu bikos “man wea no kwiktaem for kros hem garem wei for luksavve.” Trae for minim waef bilong iu and sapotim hem.—Proverbs 14:29.

SAMTING IU SAVVE DUIM:

• Dadi: Helpem waef bilong iu for lukaftarem baby, nomata long naet tu. No busy tumas long staka samting mekem iu savve spendem taem witim waef and baby bilong iu

• Mami: Taem hasband bilong iu laek duim samting for lukaftarem baby, letem hem for duim datwan. Sapos hem no savve gud hao for duim samting, no tok daonem hem bat long kaenfala wei showim hem hao for duim datwan

BIBLE HEM SEI: “Tufala bae kamap wanfala body nomoa.” (Genesis 2:24) Nomata iutufala garem baby, hem gud for tingim iu and marit partner bilong iu nao “wanfala body.” Waka hard for gohed stap gud tugeta.

Olketa waef, hem gud for tinghae long wei wea hasband helpem and sapotim iufala. Taem iu talem hasband iu tinghae long hem, datwan bae mekem hem hapi. (Proverbs 12:18) Olketa hasband, talem waef iu barava lovem and tinghae long hem. Praisem hem from hem lukaftarem gud famili bilong iutufala.—Proverbs 31:10, 28.

Bible sei tu: “Man mas no tingim hemseleva nomoa, bat hem mas tingim nara pipol tu.” (1 Corinth 10:24) Evritaem tingim marit partner bilong iu. Iutufala shud garem taem for story gud tugeta. Hem important for lisin gud taem marit partner hem story and for praisem hem. Iutufala mas tingim need and feeling bilong iutufala saed long sex. Bible hem sei: ‘Wanfala mas no stopem narawan for sleep witim hem, bat hasband and waef savve agree for no sleep tugeta for lelebet taem.’ (1 Corinth 7:3-5) So story tugeta abaotem diswan. Taem iu patient and minim feeling bilong marit partner bilong iu, datwan bae mekem iutufala stap gud tugeta.

SAMTING IU SAVVE DUIM:

• Mek sure iutufala spendem taem tugeta

• Duim olketa samting for showimaot iu tinghae long hasband or waef bilong iu, olsem for talem hem iu lovem hem or givim hem eni smol samting

BIBLE HEM SEI: “Start kam from taem iu baby yet, iu savve long olketa Holy Raeting wea savve mekem iu wise and wea savve sevem iu.” (2 Timothy 3:15) Iutufala mas disaedem wanem iutufala bae duim for teachim baby bilong iutufala. Hem savve lanem staka samting nomata hem insaed long bele bilong mami yet. Hem savve heresavve long voice bilong iu and taem mami and dadi hapi or sorre datwan savve affectim hem. Readim story long hem taem hem baby yet. Nomata maet hem no minim wanem iu readim, datwan savve helpem hem for laek read taem hem big lelebet.

Hem gud for baby bilong iu herem iu story abaotem Jehovah God and prea long hem. (Deuteronomy 11:19) Taem iu plei witim baby bilong iu, storyim olketa samting wea God wakem. (Psalm 78:3, 4) Gogo pikinini bilong iu bae luksavve iu lovem Jehovah and bae hem lovem Jehovah tu.

SAMTING IU SAVVE DUIM:

• Prea long Jehovah for givim iu wisdom for trainim baby bilong iu

• Helpem baby bilong iu lanem olketa samting long wei for storyim datwan evritaem long hem